ຂປລ.ຕາມ​ຂ່າວສານ ຫວຽດນາມ, ວັນທີ 25 ເດືອນມັງກອນ, ອົງການ​ແຮງ​ງານ ​ສາກົນ(ILO) ​ໃຫ້​ຮູ້​ວ່າ: ການ​ແຜ່​ລະບາດ ​ຂອງ ​ພະຍາດ ​ໂຄ​ວິດ-19 ​ໄດ້​ສ້າງ​ຄວາມ ​ເສຍ​ຫາຍ​ ຢ່າງ​ໃຫຍ່​ຫລວງ ​ໃຫ້​ແກ່ ຕະຫລາດ ວຽກເຮັດ ງານທຳ ​ທົ່ວ​ໂລກ, ​ເຮັດ​ໃຫ້ ທົ່ວ​ໂລກ ຕ້ອງສູນ​ເສຍ​ ວຽກເຮັດງານທຳ ຫລາຍກວ່າ​ 250 ລ້ານ ​ຕຳ​ແໜ່​ງ ​ໃນ​ປີ 2020. ​ ​ຕາມການຄົ້ນຄ້ວາ ຄັ້ງຫລ້າສຸດ ຂອງ ​ອົງການ​ ແຮງ​ງານ ​ສາກົນ ລະບຸວ່າ: ຍອດຈຳນວນ ​ຊົ່ວ​ໂມງ​ ​ເຮັດ​ວຽກ​ ໃນ​ທົ່ວ​ໂລກ ​ໄດ້​ຫລຸດ​ລົງ 8,8% ​ໃນ​ປີ 2020 ​ເມື່ອ​ທຽບ​ໃສ່ ໄຕ​ມາດ 4 ໃນປີ 2019. ສິ່ງດັ່ງກ່າວ ສະແດງໃຫ້ເຫັນວ່າ ປີ 2020 ທົ່ວ​ໂລກ ໄດ້ສູນເສຍ ວຽກເຮັດ ງານທຳເຖິງ 255 ລ້ານຕຳແໜ່ງ ກວມເອົາ 4 ເທົ່າເທຶ່ອ ຂອງ ຈຳນວນ ວຽກເຮັດງານທຳ ທ່ີຫລຸດລົງ ໃນໄລຍະ ວິກິດການ ເສດຖະກິດໂລກ ໃນປີ 2009.

ILO ​ໃຫ້​ຮູ້​ວ່າ: ​ໃນໄລຍະ ປະລິມານ ແຮງງານ ຫລຸດ​ລົງ​ ສົ່ງຜົນໃຫ້ ລາຍ​ຮັບ​ ແຮງ​ງານ ​ໃນທົ່ວ​ໂລກ ລວມມີ ປະມານ 3.700 ຕື້​ໂດ​ລາ ​ສະຫະລັດ, ຫລຸດ​ລົງ 8,3%  ຫລື 4,4 % ຂອງ GDP ທົ່ວ​ໂລກ. ເຖິງຢ່າງໃດ ກໍຕາມ,​ໃນປີ 2020. ປະລິມານ ຜູ້ເສຍວຽກເຮັດ ງານທຳ ໄດ້ເພີ່ມຂຶ້ນສູງສຸດ ເມື່ອທຽບໃສ່ ຊຸມປີ ຜ່ານມາ. ອັດຕາ ການວ່າງງານ ໃນທົ່ວໂລກ ເພີ່ມຂຶ້ນ 33 ລ້ານຄົນ, ກວມເອົາ 1,1%  ຍົກເອົາ ຍອດຈຳນວນ ເພີ່ມຂຶ້ນເປັນ 220 ລ້ານຄົນ ແລະ ອັດຕາ ການວ່າງງານ ໃນທົ່ວໂລກ ກວມເອົາ 6,5%. ທ່ານກີໄຣເດີ ຜູ້ອຳນວຍການໃຫຍ່ອົງການແຮງງານ ສາກົນ ກ່າວວ່າ ນີ້ຖືເປັນ ວິກິດການ ຢ່າງຮ້າຍແຮງ ທ່ີສຸດ ທ່ີຕະຫລາດ ວຽກເຮັດ ງານທຳ ໃນທົ່ວໂລກ. ນອກຈາກນັ້ນ ທ່ານຍັງກ່າວວ່າ ຍັງມີອີກປະມານ 81 ລ້ານຄົນ ທ່ີບໍ່ໄດ້ລົງທະບຽນ ເຂົ້າໃນ ບັນຊີ ການວ່າງງານ ແລະ ອື່ນໆ./.

KPL