ຂປລ
ປີກາຍນີ້ ເວລາຮຽນ ຂອງນັກ ຮຽນ ທົ່ວໂລກ ສູນເສຍໄປ 2 ໃນ3 ຂອງປີການສຶກສາ ຍ້ອນການແຜ່ລະບາດ ພະຍາດໂຄວິດ-19 ເຮັດໃຫ້ຕ້ອງປິດໂຮງຮຽນ ເສຍໂອກາດ ໃນການຮຽນໜັງສື ແຕກຕ່າງກັນໄປ
ຂປລ.ເມື່ອບໍ່ດົນມານີ້, ອົງການສຶກສາ ວິທະຍາສາດ ແລະ ວັດທະນະທຳແຫ່ງ ສະຫະ ປະຊາຊາດ(UNESCO)ເປີດເຜີຍວ່າ: ປີກາຍນີ້ ເວລາຮຽນ ຂອງນັກ ຮຽນ ທົ່ວໂລກ ສູນເສຍໄປ 2 ໃນ3 ຂອງປີການສຶກສາ ຍ້ອນການແຜ່ລະບາດ ພະຍາດ ໂຄວິດ-19 ເຮັດໃຫ້ຕ້ອງປິດ ໂຮງຮຽນ ເສຍໂອກາດ ໃນການຮຽນໜັງສື ແຕກຕ່າງກັນໄປ ໃນແຕ່ລະ ພາກພື້ນເຊັ່ນ: ປະເທດ ໃນພາກພື້ນ ອາເມລິກາ ລາຕິນ ແລະ ແຖບທະເລ ກາຣາອິບ ປິດໂຮງຮຽນ ຍ້ອນໂຄວິດ-19 ໂດຍສະເລ່ຍ 5ເດືອນ. ສ່ວນປະເທດ ໃນເອີຣົບ ປິດໂຮງຮຽນ 2 ເດືອນເຄິ່ງ.ຂະນະທີ່ ປະເທດໃນເຂດ ໂອຊຽນເນຍ ປິດໂຮງຮຽນ ພຽງ 1ເດືອນ.ໃນໄລຍະ 1ປີຜ່ານມາ ພະຍາດໂຄວິດ-19 ລະບາດ ມີນັກຮຽນ ຫລາຍກວ່າ 800 ລ້ານຄົນ ຫລື ກວ່າເຄິ່ງໜຶ່ງ ຂອງນັກຮຽນ ທົ່ວໂລກ ຕ້ອງຜະເຊີນກັບ ຄວາມສັບສົນທີ່ສຸດ ເພື່ອປັບຕົວ ດ້ານການຮຽນ ມີ31 ປະເທດ ທີ່ໂຮງຮຽນ ປິດການຮຽນ ການສອນ ແລະ ອີກ 48ປະເທດ ທີ່ປັບຫລຸດ ຕາຕະລາງສອນ ຫລື ສອນເປັນ ບາງເວລາເທົ່ານັ້ນ.ນອກຈາກນີ້ ພາກການສຶກສາ ທົ່ວໂລກ ໄດ້ຮັບເງິນ ສະໜັບສະໜູນ ພຽງ0,78% ຂອງມາດຕະການ ຊ່ວຍເຫລືອ ທົ່ວໂລກ ແລະ ມີແນວໂນ້ມ ທີ່ຍອດເງິນ ຊ່ວຍເຫລືອ ຈະຫລຸດລົງ ຢ່າງຕໍ່ເນື່ອງ./.
ຮຽບຮຽງຂ່າວໂດຍ ສະໄຫວ
KPL
