ຂປລ. ປະເທດຍີ່ປຸ່ນ ມີ​ແຜນຈະເປີດ ເຕັກໂນໂລຊີ​ໃໝ່, ລົດ​ໂຣບອດ ​ແຕ໋ກຊີ (Robot Taxi) ທີ່ບໍ່ມີຄົນຂັບ ​ໃນໂອ​ລິມປິກ ປີ 2020 ທີ່ ໂຕກຽວ​ ​ຊຶ່ງ​ກ່ອນໜ້ານີ້​ ໃນໂອ​ລິມປິກ​ ປີ 1964 ຍີ່ປຸ່ນ ກໍ​ໄດ້ເປີດຕົວ ລົ​ດ​ໄຟ​ຄວາມ​ໄວສູງ ຊິງກັງ​​ເຊັນ (Shinkansen) ມາ​ແລ້ວ. ປັດຈຸບັນ, ລົດດັ່ງ​ກ່າວ​ ຢູ່​ໃນ​ຂັ້ນ​ຕອນ ການທົດລອງ ແລະ ພັດທະນາ ຈຸດປະສົງ ກໍເພື່ອຮັບໃຊ້ ໃນງານໂອ​ລິມປິກ ​ແລະ ຮັບ​ໃຊ້ຜູ້ສູງອາຍຸ ພາຍໃນປະເທດ ທີ່ມີ​ຈໍານວນ​ເພິ່ມຂຶ້ນ ປະມານ 1 ໃນ 4 ຂອງປະຊາຊົນ ເປັນຜູ້ສູງອາຍຸ 65 ​ປີ ຂຶ້ນ​ໄປ.

ລົດຊະນິດ​ນີ້ ໄດ້ຮັບການພັດທະນາ ໂດຍບໍລິສັດ Taxi Robot ຂອງປະເທດຍີ່ປຸ່ນ ທີ່ສ້າງຕັ້ງຂຶ້ນ ໃນປີ 2015. ເຊິ່ງລົດຄວບຄຸມ ໂດຍລະບົບ ຄອມພິວເຕີ ທັນ​ສະ​ໄໝ ແລະ ມີຄວາມປອດໄພ, ລາຄາບໍ່ແພງ ແລະ ນຳໃຊ້ ສະດວກສະບາຍ ພຽງແຕ່ລົງ app ຢູ່ໃນໂທລະສັບ smart phone ກໍສາມາດໃຊ້ໄດ້ ແລະ ບອກຈຸດໝາຍປາຍທາງ. ແຕ່ຕ້ອງໄດ້ເສຍເງິນ 1 ໂດລາສະຫະລັດ ໃນການບໍລິການຕໍ່ຄັ້ງ. ໂຣບອດ ​ແຕ໋ກຊີ ຄວບຄຸມໂດຍລະບົບ GPS, ມີກ້ອງ ແລະ ລະບົບ ເຊັນເຊີເລເຊີ ສີ່ມຸມ ນໍາທາງໂດຍ radar ທີ່ມີຄວາມສາມາດ ຫລົບຫລີກສິ່ງກີດຂວາງ ແລະ ຢຸດໄດ້ເອງ ແລະ ອື່ນໆ.

ລົດ ໂຣບອດ ​ແຕ໋ກຊີ ກໍສາມາດຂັບໄດ້ຄືກັນ, ​ແຕ່ກົດໝາຍ ຂອງປະເທດຍີ່ປຸ່ນ ຍັງບໍ່ໄດ້ອະນຸຍາດ ໃຫ້ລົດ ທີ່ບໍ່ມີຄົນຂັບ ແລ່ນໃນເສັ້ນທາງ, ດັ່ງນັ້ນ ບໍລິສັດ ຜູ້ພັດທະນາລົດ ກໍຕ້ອງໄດ້ພັດທະນາ ທັງລະບົບຂອງລົດ ແລະ ກົດໝາຍ ໃນອະນາຄົດ. ນີ້​ແມ່ນ​ການ​ໃຫ້​ສຳພາດ​ ຂອງພະນັກງານ ຂອງບໍລິສັດ ທ່ານ ໂຕໂມຍູກິ ອາກິຍາມາ (Tomoyuki A kiyama) ໄດ້ກ່າວຕໍ່ນັກຂ່າວ ຂ່າວສານປະເທດລາວ ວັນທີ 26 ພຶດສະພາ, ໃນງານວາງສະແດງ ໃນ​ກອງປະຊຸມ ສຸດຍອດ G7, ທີ່ເມືອງມີເອະ (Mie) ປະເທດຍີ່ປຸ່ນ.

KPL