ຂປລ
ທ່ານ ສີ ຈິ້ນຜິງ ປະທານປະເທດຈີນ ເປັນປະທານ ກອງປະຊຸມຜູ້ນຳ ເສດຖະກິດ ອົງການຮ່ວມມື ເສດຖະກິດອາຊີ-ປາຊີຟິກ ຫລື APEC ຄັ້ງທີ 33 ຢູ່ສູນແລກປ່ຽນສາກົນນະຄອນເຊີ່ນເຈີ້ນ ແຂວງກວາງຕຸ້ງ ຂອງ ສປ ຈີນ ແລະ ກ່າວຄຳປາໄສສຳຄັນພາຍໃຕ້ຫົວຂໍ້ “ສ້າງປະຊາຄົມອາຊີ-ປາຊີຟິກ, ສືບຕໍ່ຂຽນບົດໃໝ່ໃນ ‘ສິ່ງມະຫັດສະຈັນອາຊີ-ອາຊີຟິກ’”.

ຂປລ.ວິທະຍຸ ໂທລະພາບ ສູນກາງຈີນ, ວັນທີ 19 ພະຈິກນີ້, ທ່ານ ສີ ຈິ້ນຜິງ ປະທານປະເທດຈີນ ເປັນປະທານ ກອງປະຊຸມຜູ້ນຳ ເສດຖະກິດ ອົງການຮ່ວມມື ເສດຖະກິດອາຊີ-ປາຊີຟິກ ຫລື APEC ຄັ້ງທີ 33 ຢູ່ສູນແລກປ່ຽນສາກົນນະຄອນເຊີ່ນເຈີ້ນ ແຂວງກວາງຕຸ້ງ ຂອງ ສປ ຈີນ ແລະ ກ່າວຄຳປາໄສສຳຄັນພາຍໃຕ້ຫົວຂໍ້ “ສ້າງປະຊາຄົມອາຊີ-ປາຊີຟິກ, ສືບຕໍ່ຂຽນບົດໃໝ່ໃນ ‘ສິ່ງມະຫັດສະຈັນອາຊີ-ອາຊີຟິກ’”.ທ່ານ ສີຈິ້ນຜິງ ຊີ້ໃຫ້ເຫັນວ່າ: ການຮ່ວມມືອາຊີ-ປາຊີຟິກ ຕ້ອງປັບຕົວໃຫ້ເຂົ້າກັບສະຖານະການໃໝ່, ຊຸກຍູ້ການສ້າງປະຊາຄົມອາຊີ-ປາຊີຟິກ ທີ່ຮ່ວມທຸກຮ່ວມສຸກ, ເປີດກວ້າງ ແລະ ເຊື່ອມໂຍງ, ບຸກເບີກການປະດິດສ້າງໃໝ່, ແລະ ພັດທະນາ ແບບກວມລວມ.ທ່ານ ສີ ຈິ້ນຜິງ ກ່າວຕື່ມວ່າ: ສປ ຈີນ ແມ່ນຜູ້ສົ່ງເສີມ, ຜູ້ຊຸກຍູ້ ແລະ ຜູ້ນຳໜ້າໃນການຮ່ວມມື ເສດຖະກິດອາຊີ-ປາຊີຟິກ. ສປ ຈີນ ຍິນດີຮ່ວມກັບທຸກຝ່າຍ, ສຸມສະຕິປັນຍາ ແລະ ເຕົ້າໂຮມກຳລັງເພື່ອ ຮ່ວມກັນສ້າງເສົາຄ້ຳຂອງປະຊາຄົມອາຊີ-ປາຊີຟິກ. ໜຶ່ງ, ເພີ່ມທະວີເສົາຄ້ຳ ດ້ານເສດຖະກິດການຄ້າ; ສອງ, ຍົກລະດັບເສົາຄ້ຳ ດ້ານການເຊື່ອມໂຍງ ເຊື່ອມຈອດ; ສາມ, ສ້າງເສົາຄ້ຳ ດ້ານການປະດິດສ້າງໃໝ່; ສີ່, ປັບປຸງເສົາຄ້ຳດ້ານການພັດທະນາໃຫ້ໝັ້ນທ່ຽງ. ທ່ານ ສີຈິ້ນຜິງ ປະກາດວ່າ: ສປ ຈີນ ຈະສະໜອງທຶນ ຈຳນວນ 20 ລ້ານໂດລາ ສະຫະລັດ ເພື່ອສະໜັບສະໜູນ ການຮ່ວມມືຕົວຈິງ ຂອງອົງການຮ່ວມມື ເສດຖະກິດ ອາຊີ-ປາຊີຟິກ, ແລະ ຈະສ້າງຕັ້ງສູນຄົ້ນຄວ້າ ປະຊາຄົມອາຊີ-ປາຊີຟິກ ຢູ່ນະຄອນເຊີ່ນເຈີ້ນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL