ທ່ານ ອາດສະພັງທອງ ສີພັນດອນ ສສຊ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ໄດ້ສະເໜີບາງຄຳເຫັນໃຫ້ປັບປຸງບາງມາດຕາ ຂອງກົດໝາຍວ່າດ້ວຍການບິນພົນລະເຮືອນທີ່ເຫັນວ່າຍັງບໍ່ທັນສອດຄ່ອງ ເພື່ອເຮັດໃຫ້ກົດໝາຍດັ່ງກ່າວ ມີຄວາມຄົບຖ້ວນ, ຮັດກຸມ ແລະ ສອດຄ່ອງກັບສະພາບການຕົວຈິງໃນປັດຈຸບັນ ເປັນຕົ້ນ:

• ການກຳນົດເຂດຫ້າມບິນ (ມາດຕາ 68): ສະເໜີໃຫ້ຄົ້ນຄວ້າປັບປຸງຊື່ຂອງມາດຕາ ໂດຍໃຫ້ມີການອະທິບາຍລາຍລະອຽດກ່ຽວກັບເຂດຫ້າມບິນເພີ່ມຕື່ມ, ພ້ອມນັ້ນ ໃຫ້ຕິດພັນກັບຄຳນິຍາມໃນມາດຕາ 31 ຂໍ້ທີ 3 ຕື່ມອີກ.

• ຄວາມຮັບຜິດຊອບຕໍ່ເຄື່ອງຝາກທາງໄປສະນີ (ມາດຕາ 114): ສະເໜີໃຫ້ກຳນົດຄວາມໝາຍຂອງເຄື່ອງຝາກທາງໄປສະນີທີ່ເກືອດຫ້າມ ແລະ ຜິດກົດໝາຍ ໃຫ້ຈະແຈ້ງ, ພ້ອມທັງສະເໜີໃຫ້ເພີ່ມພັນທະ ແລະ ຄວາມຮັບຜິດຊອບຂອງຜູ້ຮັບບໍລິການ, ຜູ້ໂດຍສານ ແລະ ເຄື່ອງຝາກ ໃນກໍລະນີທີ່ພົບເຫັນເຄື່ອງຝາກທາງໄປສະນີທີ່ຜິດກົດໝາຍ.

• ການຄຸ້ມຄອງເຮືອບິນທີ່ບໍ່ມີຄົນຂັບ ຫຼື ໂດຣນ (ມາດຕາ 150): ສະເໜີໃຫ້ຄົ້ນຄວ້າກໍລະນີການນຳໃຊ້ແບບສະໝັກຫຼິ້ນ. ໃນພາກປະຕິບັດຕົວຈິງ, ການຄຸ້ມຄອງ ແລະ ຕິດຕາມກວດກາເຮືອບິນປະເພດນີ້ ຜ່ານມາແມ່ນຕ້ອງຂໍອະນຸມັດຈາກກະຊວງປ້ອງກັນປະເທດ (ປກຊ) ແລະ ກະຊວງປ້ອງກັນຄວາມສະຫງົບ (ປກສ) ໂດຍບໍ່ໄດ້ຜ່ານກົມການບິນ. ດັ່ງນັ້ນ, ຖ້າກົດໝາຍສະບັບນີ້ປະກາດໃຊ້, ກົມການບິນພົນລະເຮືອນ ຕ້ອງໄດ້ປະສານສົມທົບກັບ ປກຊ ແລະ ປກສ ຢ່າງແໜ້ນແຟ້ນ ເພື່ອຕິດຕາມກວດກາບັນຫາທີ່ຕິດພັນກັບຄວາມໝັ້ນຄົງຂອງປະເທດຊາດ. ນอกจากນີ້, ເພື່ອຮັບປະກັນຄວາມສ່ຽງ ແລະ ຄວາມໝັ້ນຄົງ ຄວນຂະຫຍາຍການອະທິບາຍໃນມາດຕານີ້ໃຫ້ກວ້າງຂວາງຕື່ມອີກ.

• ທີ່ຕັ້ງ ແລະ ໂຄງປະກອບຂອງອົງການການບິນພົນລະເຮືອນ (ມາດຕາ 173 ຫາ 175): ເຫັນວ່າຮ່າງກົດໝາຍຍັງບໍ່ທັນກຳນົດແຈ້ງກ່ຽວກັບທີ່ຕັ້ງ ແລະ ໂຄງປະກອບຂອງອົງການດັ່ງກ່າວ, ຈຶ່ງສະເໜີໃຫ້ມີການສົມທຽບກັບຮູບແບບການຈັດຕັ້ງຂອງອົງການການບິນພົນລະເຮືອນສາກົນ; ໃນນັ້ນ ຄວນເພີ່ມມາດຕາສະເພາະທີ່ກຳນົດແຈ້ງກ່ຽວກັບການຈັດຕັ້ງ, ການເຄື່ອນໄຫວ, ໂຄງປະກອບກົງຈັກ ແລະ ລະດັບຂັ້ນການຄຸ້ມຄອງ. ພ້ອມກັນນັ້ນ, ເພື່ອເປັນການອຳນວຍຄວາມສະດວກ ແລະ ຍົກສູງປະສິດທິພາບໃນການເຄື່ອນໄຫວຈັດຕັ້ງປະຕິບັດວຽກງານຕົວຈິງ, ສະເໜີໃຫ້ພິຈາລະນາຍົກລະດັບກົມການບິນພົນລະເຮືອນ ຂຶ້ນເປັນຂັ້ນ “ສະຖາບັນ” ຫຼື “ທະບວງ” ທີ່ຂຶ້ນກັບກະຊວງໂຍທາທິການ ແລະ ຂົນສົ່ງ ໂດຍກົງ.

ການປະກອບຄຳເຫັນດັ່ງກ່າວ ແມ່ນແນໃສ່ຮັບປະກັນໃຫ້ກົດໝາຍວ່າດ້ວຍການບິນພົນລະເຮືອນ (ສະບັບປັບປຸງ) ມີຄວາມຄົບຖ້ວນ, ສາມາດບັງຄັບໃຊ້ໄດ້ຢ່າງມີປະສິດທິພາບ, ຮອງຮັບການຂະຫຍາຍຕົວຂອງເຕັກໂນໂລຊີໃໝ່ ແລະ ປົກປັກຮັກສາຄວາມໝັ້ນຄົງປອດໄພຂອງຊາດໄດ້ຢ່າງຮັດກຸມ.

ຂ່າວ: ທະນູທອງ

KPL