ຂປລ.  ໂດຍການເປັນປະທານຂອງ ສະຫາຍ ວັນໄຊ ພອງສະຫວັນ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ທັງເປັນຫົວໜ້າອົງການຕ້ານການສໍ້ລາດບັງຫລວງ ສູນກາງ, ມີສະຫາຍ ນາງ ລີວົງ ລາວລີ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ, ມີຄະນະນໍາອົງການໄອຍະການປະຊາຊົນສູງສຸດ, ຫ້ອງການ, ຫົວໜ້າກົມ, ສະຖາບັນຄ້ົນຄວ້າ ແລະ ຝຶກອົບຮົມໄອຍະການອົງການໄອຍະການປະຊາຊົນສູງສຸດ, ອົງການໄອຍະການປະຊາຊົນພາກ, ແຂວງ, ນະຄອນຫລວງວຽງຈັນ ແລະ ເຂດ ໃນທ່ົວປະເທດເຂ້ົາຮ່ວມທັງແບບເຊິ່ງໜ້າ ແລະ ແບບທາງໄກ.

    ສະຫາຍ ຄໍານຸທອນ ສູນວິເລີດ ກໍາມະການຄະນະບໍລິຫານງານພັກ, ຮອງປະທານກວດກາພັກ, ຫົວໜ້າກົມກວດກາອົງການໄອຍະການປະຊາຊົນສູງສຸດ ໄດ້ຜ່ານບົດສະຫລຸບການຈັດຕັ້ງປະຕິບັດວຽກ ງານກວດກາອົງການໄອຍະການປະຊາຊົນໄລຍະ 5 ປີ (2021- 2025), ກຳນົດທິດທາງແຜນການ 5 ປີ(2026-2030)ໂດຍໄດ້ຍົກໃຫ້ເຫັນຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານກວດກາຜ່ານມາ. ພ້ອມກັນນັ້ນ, ຄະນະນໍາອົງການໄອຍະການປະຊາຊົນສູງສຸດ ກໍໄດ້ຈັດຕ້ັງເຊ່ືອມຊຶມ,  ເຜີຍແຜ່ເນື້ອໃນຈິດໃຈ ແລະ ຜົນສຳເລັດຂອງກອງປະຊຸມວຽກງານກວດກາທົ່ວປະເທດ ຄັ້ງທີ V, ມະຕິກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫລວງ, ຄຳແນະນຳການຈັດຕັ້ງປະຕິບັດກົດລະບຽບພັກ ສະໄໝທີ XII ກ່ຽວກັບວຽກງານຕິດຕາມ, ກວດກາຂອງພັກ ແລະ ແຜນພັດທະນາວຽກງານກວດກາ 5 ປີ (2026-2030).

    ໂອກາດດ່ັງກ່າວ, ສະຫາຍ ວັນໄຊ ພອງສະຫວັນ ໄດ້ນໍາເອົາເນື້ອໃນສໍາຄັນຂອງບົດໂອ້ລົມສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ທີ່ໄດ້ກ່າວຕໍ່ກອງປະຊຸມວຽກງານກວດກາທ່ົວປະເທດ ຄ້ັງທີ V ໃນ ວັນທີ 2 ກໍລະກົດ 2026 ຜ່ານມາ ມາເຜີຍແຜ່ເຊື່ອມຊຶມໃຫ້ບັນດາພະນັກງານ-ລັດຖະກອນພາຍໃນອົງການໄອຍະການປະຊາຊົນ ໄດ້ຮັບຮູ້ ແລະ ເຂົ້າໃຈເນື້ອໃນຢ່າງເລິກເຊິ່ງ, ພ້ອມທັງເນັ້ນຫລາຍບັນຫາສຳຄັນທ່ີຕ້ອງເອົາໃຈໃສ່ຜັນຂະຫຍາຍໃຫ້ເປັນຮູບປະທຳເປັນ ຕົ້ນການກໍ່ສ້າງພັກ-ພະນັກງານ, ການຍົກສູງຄຸນນະພາບວຽກງານກວດກາ ແລະ ການດຳເນີນຄະດີມີຄວາມໂປ່ງໃສ, ຍຸຕິທຳ ແລະ ຖືກຕ້ອງຕາມກົດໝາຍ, ການປະສານສົມທົບລະຫວ່າງບັນດາອົງການ ໃນຂະບວນການຍຸຕິທຳ, ການຜັນຂະຫຍາຍມະຕິຂອງພັກ, ການຮ່ວມມືກັບຕ່າງປະເທດ ແລະ ການປັບປຸງແບບແຜນການນຳພາ. ບັນດາເນື້ອໃນດັ່ງກ່າວ ລ້ວນແຕ່ເປັນບັນຫາສຳຄັນທີ່ຕ້ອງໄດ້ຮັບການເອົາໃຈໃສ່ ແລະ ນຳໄປຈັດຕ້ັງປະຕິບັດຢ່າງເຂັ້ມງວດ, ໂດຍສະເພາະການຍົກສູງຄຸນນະພາບ ແລະ ປະສິດທິຜົນຂອງວຽກງານກວດກາ, ວຽກງານໄອຍະການປະຊາຊົນ, ການຮັບປະກັນຄວາມຍຸຕິທຳ, ການປະຕິບັດກົດໝາຍຢ່າງເຄັ່ງຄັດ ແລະ ການປະສານສົມທົບລະຫວ່າງອົງການທີ່ກ່ຽວຂ້ອງ ເພື່ອໃຫ້ການດຳເນີນວຽກງານເປັນໄປຢ່າງມີເອກະພາບ, ໂປ່ງໃສ ແລະ ຖືກຕ້ອງຕາມລະບຽບ ກົດໝາຍ.

          ຂ່າວ: ອອປສ