ຂປລ
ທ່ານ ວະລາດີເມຍ ປູຕິນ ປະທານາທິບໍດີ ລັດເຊຍໄດ້ສົນທະນາ ທາງໂທລະສັບກັບ ທ່ານ ໂດນັນ ທຣຳ ປະທານາທິບໍດີ ສ.ອາເມລິກາ, ໂດຍສອງຝ່າຍ ໄດ້ບັນລຸຄວາມເຫັນ ເປັນເອກະພາບກັນ ກ່ຽວກັບການສະໜອງ ນ້ຳມັນກາຊວນ ຂອງຣັດເຊຍ ໃຫ້ແກ່ ສ.ອາເມລິກາ ແລະ ຕະຫລາດໂລກ.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 9 ຕຸລານີ້, ທ່ານ ວະລາດີເມຍ ປູຕິນ ປະທານາທິບໍດີ ລັດເຊຍ ໄດ້ສົນທະນາ ທາງໂທລະສັບກັບ ທ່ານ ໂດນັນ ທຣຳ ປະທານາທິບໍດີ ສ.ອາເມລິກາ, ໂດຍສອງຝ່າຍ ໄດ້ບັນລຸ ຄວາມເຫັນ ເປັນເອກະພາບກັນ ກ່ຽວກັບ ການສະໜອງ ນ້ຳມັນກາຊວນ ຂອງຣັດເຊຍ ໃຫ້ແກ່ ສ.ອາເມລິກາ ແລະ ຕະຫລາດໂລກ. ໃນມື້ດຽວກັນ, ກະຊວງການເງິນ ຂອງ ສ.ອາເມລິກາ ປະກາດວ່າ: ຈະຜ່ອນຄາຍ ມາດຕະການ ລົງໂທດຕໍ່ ການຄ້າ ນ້ຳມັນກາຊວນ ຂອງລັດເຊຍ ໃນອີກບໍ່ເທົ່າໃດເດືອນຕໍ່ໜ້າ. ນັກວິເຄາະເຫັນວ່າ: ການຕົກລົງດັ່ງກ່າວ ຂອງລັດຖະບານ ໂດນັນ ທຣຳ ມີຈຸດປະສົງເພື່ອຜ່ອນຄາຍ ສະຖານະການເຄັ່ງຕຶງ ຂອງການສະໜອງ ນ້ຳມັນກາຊວນ ພາຍໃນປະເທດ ກ່ອນການເລືອກຕັ້ງ ກາງສະໄໝ ຂອງ ສ.ອາເມລິກາ, ຫລຸດຜ່ອນຜົນກະທົບ ຂອງລາຄານ້ຳມັນທີ່ສູງ ໃນໂອກາດ ການເລືອກຕັ້ງ ຂອງພັກຣີພັບລີກັນ. ແຕ່ຍ້ອນຫລາຍປັດໄຈ, ຜົນກະທົບຕົວຈິງ ຂອງການສະໜອງ ນ້ຳມັນກາຊວນ ຈາກລັດເຊຍເຂົ້າຕະຫລາດ ຕໍ່ການຮັກສາ ສະຖຽນລະພາບ ຂອງລາຄານ້ຳມັນເຊື້ອໄຟ ໃນສາກົນ ອາດຈະມີຈຳກັດ. ຢູ່ພາຍໃນປະເທດ ສະຫະລັດ ອາເມລິກາ ກໍ່ມີຫາງສຽງຕິຕຽນຕໍ່ເລື່ອງນີ້, ໂດຍເຫັນວ່າ ທ່ານ ໂດນັນ ທຣຳ ຍອມອ່ອນຂໍ້ໃຫ້ຕໍ່ ລັດເຊຍ ແຕ່ຝ່າຍດຽວ ເພື່ອຜົນປະໂຫຍດ ທາງການເລືອກຕັ້ງ ຈະທຳລາຍຜົນປະໂຫຍດຂອງພັນທະມິດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
