ຂປລ. ທະນາຄານແຫ່ງ ສປປ ລາວ (ທຫລ) ຈະສືບຕໍ່ດຳເນີນນະໂຍບາຍເງິນຕາແບບປະສົມປະ ສານ ເພື່ອຮັກສາສະຖຽນລະພາບດ້ານເສດຖະກິດມະຫາພາກ ແລະ ດ້ານເງິນຕາ ໂດຍຈະສຸມໃສ່ຄວບຄຸມອັດຕາເງິນເຟີ້, ຮັກສາຄ່າເງິນກີບ, ຄຸ້ມຄອງປະລິມານເງິນ ແລະ ອັດຕາແລກປ່ຽນ, ພ້ອມທັງຊຸກຍູ້ສິນເຊື່ອໃຫ້ໄຫລເຂົ້າສູ່ຂະແໜງການຜະລິດ, ກະສິກຳ, ອຸດສາຫະກຳປຸງແຕ່ງ ແລະ ຂະແໜງການສົ່ງອອກ.

ທ່ານ ນາງ ບຸນຄຳ ວໍລະຈິດ ຜູ້ວ່າການທະນາຄານແຫ່ງ ສປປ ລາວ ຊີ້ແຈງຕໍ່ຄຳຊັກຖາມຂອງ ສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 7 ຕຸລາ 2026 ຫລາຍບັນຫາສຳຄັນ ຕິດພັນກັບການຈັດຕັ້ງປະຕິບັດວຽກງານຂອງ ທຫລ ໂດຍສະເພາະ ການນໍາໃຊ້ນະໂຍບາຍເງິນຕາ ເພື່ອຮັກສາສະຖຽນລະພາບດ້ານເສດຖະກິດມະຫາພາກ ແລະ ດ້ານເງິນຕາໃນຕໍ່ໜ້າ. ຕໍ່ບັນຫານີ້, ຜູ້ວ່າການທະນາຄານ ຊີ້ແຈງວ່າ: ການນໍາໃຊ້ນະໂຍບາຍເງິນຕາ ເພື່ອຮັກສາສະຖຽນລະພາບດ້ານເສດຖະກິດມະຫາພາກ ໂດຍສະເພາະແມ່ນການຄຸ້ມຄອງອັດຕາເງິນເຟີ້ ທຫລ ຈະເນັ້ນດໍາເນີນນະໂຍບາຍເງິນຕາ ເພື່ອຄວບຄຸມປະລິມານເງິນ (M2) ໃຫ້ມີຄວາມເໝາະສົມ ເພື່ອບໍ່ໃຫ້ກະທົບຕໍ່ອັດຕາເງິນເຟີ້ ໃນໄລຍະທີ່ເສດຖະກິດຍັງມີຄວາມຕ້ອງການແຫລ່ງທຶນ ໃນການພັດ ທະນາຢ່າງມະຫາສານ.

ສຳລັບ ອັດຕາເງິນເຟີ້ ໃນໄລຍະ 9 ເດືອນຕົ້ນປີ 2026 ຢູ່ໃນລະດັບ 7,9% ຜ່ານການຄົ້ນຄວ້າຂອງ ທຫລ ເຫັນວ່າ: ປັດໄຈສຳຄັນທີ່ຜັກດັນໃຫ້ເງິນເຟີ້ສູງຂຶ້ນ ຕົ້ນຕໍແມ່ນມາຈາກລາຄາໄຟຟ້າ, ຮອງລົງມາແມ່ນລາຄານໍ້າມັນເຊື້ອໄຟ ແລະ ປັດໄຈດ້ານອັດຕາແລກປ່ຽນ. ສໍາລັບ ອັດຕາເງິນເຟີ້ສະເລ່ຍໝົດປີ 2026 ຄາດວ່າຈະຢູ່ໃນລະດັບ 7,9% ຊຶ່ງຄາດວ່າຈະເກີນແຜນ ທີ່ສະພາແຫ່ງຊາດ ໄດ້ຮັບຮອງໝົດປີ 2026 ຢູ່ໃນລະດັບ 5% (ເໜັງຕີງ ±2%) ໃນຂະນະທີ່ ປີ 2027 ທຫລ ຈະສູ້ຊົນຄວບຄຸມໃຫ້ເງິນເຟີ້ສະເລ່ຍຢູ່ລະຫວ່າງ 5,5-5,8% ຫລື ໂດຍລວມບໍ່ເກີນ 6% ໂດຍອີງໃສ່ການຄາດຄະເນວ່າລາຄານ້ຳມັນເຊື້ອໄຟຈະບໍ່ຜັນຜວນຮຸນແຮງຄືປີ 2026. ເພື່ອບັນລຸເປົ້າໝາຍດັ່ງກ່າວ, ທຫລ ຈະສຸມໃສ່ຄວບຄຸມປະລິມານເງິນໃຫ້ຢູ່ໃນລະດັບທີ່ເໝາະສົມ ຜ່ານການຄວບຄຸມອັດຕາການຂະຫຍາຍຕົວຂອງສິນເຊື່ອ. ໃນນີ້, ຈະຄຸ້ມຄອງໃຫ້ຂະຫຍາຍຕົວບໍ່ເກີນ 16% ຕໍ່ປີ (ປັດຈຸບັນຢູ່ໃນລະດັບ 17,6%). ໄປພ້ອມກັບການຄຸ້ມຄອງສະຖຽນລະພາບຂອງຄ່າເງິນກີບ; ຄຸ້ມຄອງອັດຕາແລກປ່ຽນໃຫ້ມີຄວາມສະ ຫງົບ ແລະ ບໍ່ສ້າງແຮງກົດດັນໃຫ້ອັດຕາເງິນເຟີ້, ພັດທະນາເຄື່ອງມືປ້ອງກັນຄວາມສ່ຽງອັດຕາແລກ ປ່ຽນ, ຄຸ້ມຄອງ ແລະ ຕິດຕາມການເຄື່ອນໄຫວຕະຫລາດແລກປ່ຽນເງິນຕາຕ່າງປະເທດ ເພື່ອເປັນເຄື່ອງມືໃນການດຸ່ນດ່ຽງ ເງິນຕາຕ່າງປະເທດຢູ່ໃນສັງຄົມ ຕີຖອຍການເຄື່ອນໄຫວແລກປ່ຽນເງິນຕາ ຢູ່ນອກລະບົບທະນາຄານ; ຄົ້ນຄວ້າສ້າງຕະຫລາດຊື້-ຂາຍແລກປ່ຽນເງິນຕາຕ່າງປະເທດມູນຄ່າສູງ ເພື່ອໃຫ້ນິຕິບຸກຄົນ ໂດຍສະເພາະຜູ້ນຳເຂົ້າ-ສົ່ງອອກສາມາດຊື້-ຂາຍເງິນຕາໄດ້ຫລາຍຂຶ້ນ; ຄົ້ນຄວ້າເພີ່ມຊ່ອງທາງການຊື້-ຂາຍເງິນຕາຕ່າງປະເທດ ຜ່ານກົນໄກການປະມູນ ເພື່ອຄຸ້ມຄອງອັດຕາແລກປ່ຽນ ແລະ ສ້າງຄັງສໍາຮອງເງິນຕາຕ່າງປະເທດ ຜ່ານຕະຫລາດລະຫວ່າງທະນາຄານ; ຄຸ້ມຄອງການນໍາເຂົ້າສິນຄ້າ ໂດຍສະເພາະການນໍາເຂົ້ານໍ້າມັນເຊື້ອໄຟ ໃຫ້ແທດເໝາະກັບສະພາບປະຈຸບັນ; ຄົ້ນຄວ້າ ແລະ ຈັດຕັ້ງປະຕິ ບັດນະໂຍບາຍສິນເຊື່ອ ໃຫ້ຂະແໜງກະສິກຳ ແລະ ຂະແໜງການຜະລິດ ເພື່ອທົດແທນການນໍາເຂົ້າ ແລະ ສົ່ງເສີມການສົ່ງອອກ ໂດຍຊຸກຍູ້ທະນາຄານທຸລະກິດ ທີ່ມີສະພາບຄ່ອງສ່ວນເກີນສະໜອງສິນເຊື່ອ, ສືບຕໍ່ຄົ້ນຄວ້າກົນໄກການກຳນົດລາຍການສິນຄ້າຈໍາເປັນ ເພື່ອປັບສ້າງໂຄງສ້າງລາຄາ ແລະ ມາດຕະການໃນການຄຸ້ມຄອງລາຄາສິນຄ້າ ແລະ ສ້າງຕະຫລາດປະມູນສິນຄ້າ ເພື່ອເພີ່ມປະສິດທິພາບໃນການຄຸ້ມຄອງລາຄາສິນຄ້າ. ພ້ອມນີ້, ທຫລ ຈະເລັ່ງສ້າງຄວາມຕ້ອງການນຳໃຊ້ເງິນກີບ ໂດຍສຸມໃສ່ຮັກ ສາຄ່າເງິນກີບໃຫ້ມີສະຖຽນລະພາບ, ຢູ່ໃນລະດັບທີ່ຄວບຄຸມໄດ້, ນຳເງິນຕາຕ່າງປະເທດເຂົ້າສູ່ລະບົບ ແລະ ຄຸ້ມຄອງເງິນຕາຈາກການສົ່ງອອກໃຫ້ໄດ້ 75% ໃນທ້າຍປີ 2026 ແລະ 85% ໃນທ້າຍປີ 2030, ພ້ອມທັງຄົ້ນຄວ້າສ້າງຍຸດທະສາດ ຫັນສູ່ການນຳໃຊ້ເງິນກີບເປັນສະກຸນດຽວໃນປະເທດ ໃນໄລຍະ 2026-2035. ພ້ອມນີ້, ທຫລ ໄດ້ສືບຕໍ່ພັດທະນາການສົ່ງເສີມການນໍາໃຊ້ສະກຸນເງິນທ້ອງຖິ່ນໃນການຊໍາລະການຄ້າ ແລະ ການລົງທຶນ ຮ່ວມກັບປະເທດເພື່ອນບ້ານ ເປັນຕົ້ນ ໄດ້ເຊື່ອມຕໍ່ລະບົບຊຳລະຍ່ອຍຂ້າມແດນຜ່ານ QR Code ກັບ 4 ປະເທດ ຄື: ໄທ, ສສ ຫວຽດນາມ, ກຳປູເຈຍ ແລະ ສປ ຈີນ, ພ້ອມທັງຊຸກຍູ້ ແລະ ຍົກລະດັບ ການຂະຫຍາຍຂອບເຂດການເຊື່ອມຕໍ່່ລະບົບ Finlink ຂອງກະຊວງການເງິນ ກັບບັນດາທະນາຄານທຸລະກິດ, ຄົ້ນຄວ້າການໝູນໃຊ້ນະວັດຕະກໍາທາງດ້ານການເງິນ (Fintech) ເຂົ້າມາໝູນໃຊ້ເຂົ້າໃນວຽກງານການເງິນການທະນາຄານ, ປັດຈຸບັນ ໄດ້ເລີ່ມທົດສອບລະບົບປ່ອຍກູ້ລາຍຍ່ອຍເເບບດີຈິຕອນ ເພື່ອສົ່ງເສີມການເຂົ້າເຖິງການບໍລິການທາງດ້ານການເງິນ, ຫລຸດຜ່ອນຕົ້ນທຶນ ແລະ ຍົກສູງການນໍາໃຊ້ເງິນຕາເເຫ່ງຊາດ. ນອກນັ້ນ, ຍັງໄດ້ເປີດໂຄງການໃຫ້ບໍລິ ການຊຳລະຍ່ອຍຂ້າມແດນ ລາວ-ຈີນ ດ້ວຍ e-CNY ເພື່ອອຳນວຍຄວາມສະດວກແກ່ນັກທ່ອງທ່ຽວຈີນໃນການຊຳລະຄ່າສິນຄ້າ ແລະ ບໍລິການຜ່ານ QR Code.

ດ້ານສິນເຊື່ອ, ທຫລ ຈະສົ່ງເສີມໃຫ້ທະນາຄານທຸລະກິດສະໜອງສິນເຊື່ອທີ່ມີຄຸນນະພາບ, ຮັດ ກຸມ, ທັນສະໄໝ ແລະ ມີຈຸດສຸມ ຊຶ່ງ ທຫລ ກໍຄື ລັດຖະບານ ໄດ້ຮັບຮອງນະໂຍບາຍຄຸ້ມຄອງສິນເຊື່ອ ຂອງ ສປປ ລາວ ຮອດປີ 2030 ໂດຍໄດ້ກໍານົດວິໄສທັດ, ທິດທາງ, ຄາດໝາຍ ແລະ ແຜນການ ຈັດຕັ້ງປະຕິບັດ ຂອງ ທຫລ ໃນໄລຍະ 5 ປີ (2026-2030), ນະໂຍບາຍນີ້ ປະກອບມີ 11 ແຜນງານ, 30 ຕົວຊີ້ວັດ ແລະ ໄດ້ກໍານົດກົນໄກການຈັດຕັ້ງປະຕິບັດບັນດາແຜນງານດັ່ງກ່າວ ໂດຍຈະສຸມໃສ່ສ້າງ ແລະ ພັດທະນາພື້ນຖານໂຄງລ່າງດ້ານຂໍ້ມູນສິນເຊື່ອ; ພັດທະນາເຄື່ອງມືຄຸ້ມຄອງ, ຕິດຕາມ ແລະ ປະເມີນຄວາມສ່ຽງສິນເຊື່ອ; ການແກ້ໄຂໜີ້ບໍ່ເກີດດອກອອກຜົນ (NPLs) ແລະ ສະພາບໜີ້ ໃນລະບົບທະນາຄານ; ສະໜອງສິນເຊື່ອທີ່ມີປະສິດທິພາບ ເພື່ອຄວາມຍືນຍົງ, ສົ່ງເສີມສະກຸນເງິນກີບພາຍໃນ ແລະ ໃຫ້ສອດຄ່ອງກັບຂະແໜງການຈຸດສຸມຂອງຂະແໜງເສດຖະກິດ ແຕ່ລະໄລຍະ; ການຍົກສູງບົດ ບາດ ການບໍລິຫານຄຸ້ມຄອງສິນເຊື່ອຂອງທະນາຄານທຸລະກິດ; ການສ້າງ ແລະ ພັດທະນາຜະລິດຕະພັນສິນເຊື່ອ ໃຫ້ມີຄວາມຫລາກຫລາຍ, ທັນສະໄໝ ແລະ ປະຊາຊົນສາມາດເຂົ້າເຖິງແຫລ່ງທຶນໄດ້ ໄປຄຽງຄູ່ກັບການພັດທະນາຕະຫລາດທຶນ ໃຫ້ເປັນຊ່ອງທາງລະດົມທຶນໄລຍະຍາວ ຂອງທະນາຄານທຸລະກິດ.

ທ່ານ ນາງ ບຸນຄຳ ວໍລະຈິດ ຍັງໄດ້ຍົກໃຫ້ເຫັນ ແລະ ອະທິບາຍ ກ່ຽວກັບການນໍາໃຊ້ເຄື່ອງມືທາງດ້ານການເງິນ ແລະ ກົນໄກການເຮັດວຽກຮ່ວມກັບຂະແໜງການຂອງລັດຖະການ ໃນການຮັກສາສະຖຽນລະພາບດ້ານເງິນຕາ ແລະ ຄ່າຂອງເງິນກີບ; ການຄຸ້ມຄອງລາຍຮັບເງິນຕາຕ່າງປະເທດ ຈາກການສົ່ງອອກຜ່ານລະບົບທະນາຄານ ໂດຍສະເພາະການນໍາເຂົ້າເງິນຕາຈາກການສົ່ງອອກສິນຄ້າ ຢູ່ດ່ານສາກົນ, ດ່ານທ້ອງຖິ່ນ, ທ່າບົກ, ການນໍາເຂົ້າທຶນຈົດທະບຽນຈາກການລົງທຶນຕ່າງປະເທດ ແລະ ການເຂົ້າເຖິງແຫ່ງທຶນຂອງທະນາຄານທຸລະກິດ.

ໂດຍ: ທະນູທອງ

ພາບ: ອ່າຍຄຳ

KPL