ຂປລ
ກອງປະຊຸມເວທີປຶກສາຫາລືທຸລະກິດ ພະລັງງານຈີນ-ຣັດເຊຍ ຄັ້ງທີ 8 ໄດ້ຈັດຂຶ້ນຢູ່ນະຄອນວະລາດີໂວສະຕັອກປະເທດຣັດເຊຍ. ທ່ານ ສີ ຈິ້ນຜິງ ປະທານປະເທດຈີນ ໄດ້ສົ່ງສານຊົມເຊີຍເຖິງ ກອງປະຊຸມດັ່ງກ່າວ
ຂປລ.ວິທະຍຸ ໂທລະພາບ ສູນກາງຈີນ, ວັນທີ 4 ກັນຍານີ້, ກອງປະຊຸມເວທີປຶກສາຫາລືທຸລະກິດ ພະລັງງານຈີນ-ຣັດເຊຍ ຄັ້ງທີ 8 ໄດ້ຈັດຂຶ້ນຢູ່ນະຄອນວະລາດີໂວສະຕັອກປະເທດຣັດເຊຍ. ທ່ານ ສີ ຈິ້ນຜິງ ປະທານປະເທດຈີນ ໄດ້ສົ່ງສານຊົມເຊີຍເຖິງ ກອງປະຊຸມດັ່ງກ່າວ. ເນື້ອໃນສານລະບຸວ່າ: ປີນີ້ແມ່ນປີຄົບຮອບ 30 ປີ ຂອງການສ້າງຕັ້ງສາຍພົວພັນ ຄູ່ຮ່ວມປະສານງານທາງຍຸດທະສາດ ລະຫວ່າງ ສປ ຈີນ-ຣັດເຊຍ ແລະ ປີຄົບຮອບ 25 ປີຂອງການລົງນາມ “ສົນທິສັນຍາວ່າດ້ວຍບ້ານໃກ້ເຮືອນຄຽງທີ່ດີ ແລະ ການຮ່ວມມື ໄມຕີຈິດມິດຕະພາບ ລະຫວ່າງ ສປ ຈີນ-ຣັດເຊຍ”. ພາຍໃຕ້ການປ່ຽນແປງທີສັບສົນຂອງສະຖານະການສາກົນ, ສາຍພົວພັນຄູ່ຮ່ວມປະສານງານທາງຍຸດທະສາດຮອບດ້ານ ໃນຍຸກໃໝ່ລະຫວ່າງ ສປ ຈີນ-ຣັດເຊຍ ໄດ້ຮັບການພັດທະນາໃນລະດັບສູງ, ການຮ່ວມມືດ້ານພະລັງງານລະຫວ່າງ ສປ ຈີນ-ຣັດເຊຍ ໄດ້ຮັບຜົນສຳເລັດ ທີ່ອຸດົມສົມບູນ, ຊຸກຍູ້ການພັດທະນາຮ່ວມກັນ ຂອງສອງປະເທດຢ່າງເຂັ້ມແຂງ ເຊິ່ງກາຍເປັນແບບຢ່າງດ້ານການຮ່ວມມືສອງຝ່າຍ ທີ່ຕ່າງຝ່າຍຕ່າງໄດ້ຮັບຜົນປະໂຫຍດ.
ເນື້ອໃນສານເນັ້ນໜັກວ່າ: ປັດຈຸບັນ, ສະຖານະການດ້ານພະລັງງານສາກົນ ໄດ້ມີການປັບຕົວຢ່າງເລິກເຊິ່ງ, ໂອກາດ ແລະ ສິ່ງທ້າທາຍກ່ຽວພັນກັນ. ຈີນຍິນດີຮ່ວມກັບຣັດເຊຍລົງເລິກການຮ່ວມມືດ້ານພະລັງງານຢ່າງບໍ່ຢຸດຢັ້ງ ແລະ ຮ່ວມກັນປົກປັກຮັກສາ ຄວາມໝັ້ນທ່ຽງ ແລະ ການດຳເນີນງານທີ່ດີຂອງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງດ້ານພະລັງງານ. ໃນມື້ດຽວກັນ, ທ່ານ ວະລາດີເມຍ ປູຕິນ ປະທານາທິບໍດີຣັດເຊຍ ກໍໄດ້ສົ່ງສານຊົມເຊີຍເຖິງ ກອງປະຊຸມດັ່ງກ່າວເຊັ່ນດຽວກັນ./
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
