ຂປລ
ນັບແຕ່ວັນທີ 1 ກັນຍາ 2026 ເປັນຕົ້ນໄປ, ພາກລັດໄດ້ເຂົ້າມາຄຸ້ມຄອງ, ປົກປັກຮັກສາ ແລະ ບໍລິຫານຈັດການແຫລ່ງທ່ອງທ່ຽວມໍລະດົກໂລກວັດພູຈຳປາສັກ ຢ່າງເຕັມຮູບແບບ ພາຍຫລັງໂຄງການພັດທະນາແຫລ່ງທ່ອງທ່ຽວດັ່ງກ່າວ ຂອງກຸ່ມບໍລິສັດ ຍິ່ງໂຊກໄຊ ຈຳກັດຜູ້ດຽວ ໄດ້ສິ້ນສຸດກຳນົດອະນຸຍາດລົງທຶນແລ້ວ ໃນວັນທີ 22 ມິຖຸນາ 2026 ທີ່ຜ່ານມາ.
ຂປລ. ພາຍຫລັງສິ້ນສຸດສັນຍາສຳປະທານລົງທຶນ, ຄະນະກຳມະການປົກຄອງແຂວງຈຳປາສັກ ໄດ້ອອກຂໍ້ຕົກລົງ ສະບັບເລກທີ 805/ຄປຂ, ລົງວັນທີ 20 ສິງຫາ 2026 ອະນຸມັດໃຫ້ພະແນກວັດທະນະທຳ ແລະ ການທ່ອງທ່ຽວ (ວທ) ແຂວງຈໍາປາສັກ ເຂົ້າປົກປັກຮັກສາ ແລະ ຄຸ້ມຄອງແຫລ່ງທ່ອງທ່ຽວມໍລະດົກໂລກວັດ ພູຈຳປາສັກ. ພ້ອມດຽວກັນນັ້ນ, ໄດ້ອອກຂໍ້ຕົກລົງ ສະບັບເລກທີ 806/ ຄປຂ ແຕ່ງຕັ້ງຄະນະຮັບຜິດຊອບຄຸ້ມຄອງໂດຍເກັບຮັກສາພື້ນທີ່ ແລະ ແຈ້ງການ ສະບັບເລກທີ 25/ຄປຂ, ລົງວັນທີ 31 ສິງຫາ 2026 ເພື່ອໃຫ້ພະແນກ ວທ ແຂວງຈຳປາສັກ ປະສານສົມທົບກັບພະແນກການທ່ີກ່ຽວຂ້ອງຂອງແຂວງ ແລະ ເມືອງປາສັກ ເຂົ້າຄຸ້ມຄອງຕາມສິດ ແລະ ພາລະບົດບາດ.
ຜ່ານການເຂົ້າປະຕິບັດໜ້າທີ່ຕົວຈິງ ຂອງຄະນະກຳມະການຮັບຜິດຊອບ ເລີ່ມແຕ່ວັນທີ 1 ກັນຍາ 2026 ເປັນຕົ້ນມາ ເຫັນວ່າ ໄດ້ຮັບການຮ່ວມມືເປັນຢ່າງດີຈາກທຸກພາກສ່ວນ ໂດຍສະເພາະການບໍລິຫານຈັດການຂາຍປີ້ເຂົ້າຊົມ, ປີ້ລົດ ກ໊ອບ ແລະ ການຈັດສັນສະຖານທີ່ຝາກລົດຜ່ານປະຕູກາງ ເພື່ອຄວາມເປັນລະບຽບຮຽບຮ້ອຍ. ປັດຈຸບັນ, ແຫລ່ງທ່ອງທ່ຽວຍັງເປີດບໍລິການໃຫ້ນັກທ່ອງທ່ຽວເຂົ້າຊົມຕາມປົກກະຕິ ເຊັ່ນ: ໂຮງນາງສີດາ ແລະ ຈຸດສຳຄັນຕ່າງໆ. ນອກຈາກນີ້, ພາກລັດຍັງໄດ້ວາງແຜນຄຸ້ມຄອງ ແລະ ພັດທະນາພື້ນທີ່ທັງໄລຍະສັ້ນ ແລະ ໄລຍະຍາວ ເປັນຕົ້ນການຮັກສາຄວາມສະອາດ, ການປັບປຸງສິ່ງແວດລ້ອມ, ຈຸດນັ່ງພັກເຊົາ ແລະ ສູນບໍລິການນັກທ່ອງທ່ຽວ.
ໃນໂອກາດນີ້, ຂໍເຊີນຊວນບັນດານັກທ່ອງທ່ຽວທັງພາຍໃນ, ຕ່າງປະເທດ ແລະ ພໍ່ແມ່ປະຊາຊົນ ເຂົ້າມາທ່ຽວຊົມ, ສະແຫວງບຸນ ແລະ ກາບໄຫວ້ສັກກາລະບູຊາສິ່ງສັກສິດ ຢູ່ສະຖານທີ່ທ່ອງທ່ຽວມໍລະດົກໂລກ ວັດພູຈຳປາສັກ ແຫ່ງນີ້ໄດ້.
ຂໍ້ມູນ-ພາບ: ພະແນກ ວທ ແຂວງ ຈໍາປາສັກ
KPL
