ຂປລ
ຄະນະພົວພັນຕ່າງປະເທດສູນກາງພັກ (ຄຕພ) ຈັດປາຖະກະຖາເຜີຍແຜ່, ເຊື່ອມຊຶມມູນເຊື້ອວັນຢຶດອໍານາດທົ່ວປະເທດ 23 ສິງຫາ 1945 ຄົບຮອບ 81 ປີ ແລະ 23 ສິງຫາ 1975 ຄົບຮອບ 51 ປີ ແລະ ວັນລັດຖະທຳມະນູນແຫ່ງ ສປປ ລາວ ຄົບຮອບ 35 ປີ (15/8/1991- 15/8/2026) ໃນວັນທີ 3 ກັນຍາ 2026 ນີ້,
ຂປລ. ໃຫ້ກຽດເຜີຍແຜ່ໂດຍ ສະຫາຍ ບຸນເຫລືອ ພັນດານຸວົງ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີຄະນະບໍລິຫານງານພັກ, ຄະນະກົມ, ຄະນະພະແນກ ແລະ ພະນັກງານຫລັກແຫລ່ງ ຂອງຄະນະພົວພັນຕ່າງປະເທດສູນກາງພັກເຂົ້າຮ່ວມ. ສະຫາຍ ບຸນເຫລືອ ພັນດານຸວົງ ໄດ້ຫວນຄືນມູນເຊື້ອປະຫວັດຄວາມເປັນມາຂອງວັນຢຶດອໍານາດ 23 ສິງຫາ ຊຶ່ງເປັນວັນແຫ່ງໄຊຊະນະຂອງການຕໍ່ສູ້ປະຕິວັດທີ່ຍືດເຍື້ອຍາວນານ ແລະ ເຕັມໄປດ້ວຍນໍ້າໃຈພິລະອາດຫານ, ຄວາມເສຍສະລະທັງຊີວິດ ແລະ ເລືອດເນື້ອ ຂອງປະຊາຊົນລາວບັນດາເຜົ່າ, ແມ່ນໝາກຜົນຂອງການນໍາໃຊ້ສາມບາດຄ້ອນຍຸດທະສາດ ແລະ ໝູນໃຊ້ທິດສະດີມາກ-ເລນິນ ຢ່າງປະດິດສ້າງ ຊຶ່ງໄດ້ຊີ້ໃຫ້ເຫັນແຈ້ງເຖິງການນໍາພາ ທີ່ຖືກຕ້ອງ ແລະ ສະຫລາດສ່ອງໃສ ຂອງພັກປະຊາຊົນປະຕິວັດລາວ. ເຫດການດັ່ງກ່າວ, ເປັນການບົ່ງບອກເຖິງຄວາມປະລາໄຊອັນເຈັບແສບ ຂອງຈັກກະພັດຜູ້ຮຸກຮານ, ແມ່ນວັນໄຂສັງກາດໃໝ່ຂອງປະຊາຊົນລາວ ທີ່ໄດ້ຮັບຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ມີລະບອບການເມືອງທີ່ເປັນເອກະພາບ ພາຍໃຕ້ການນໍາພາຂອງພັກປະຊາຊົນປະຕິວັດລາວ ຈຶ່ງເຮັດໃຫ້ປະເທດຊາດໄດ້ຮັບການສ້າງສາພັດທະນາ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ບົດບາດ ຂອງ ສປປ ລາວ ໄດ້ຮັບການຍົກສູງຂຶ້ນໃນເວທີພາກພື້ນ ແລະ ສາກົນ.
ພ້ອມນີ້, ສະຫາຍ ຫົວໜ້າຄະນະ ພົວພັນຕ່າງປະເທດສູນກາງພັກ ຍັງໄດ້ຍົກໃຫ້ເຫັນເຖິງຄວາມສໍາຄັນຂອງລັດຖະທຳມະນູນ, ພາຍຫລັງປະເທດຊາດ ໄດ້ຮັບການປົດປ່ອຍການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຄວາມຈຳເປັນຕ້ອງຫັນໄປສູ່ລະບຽບກົດໝາຍ. ຍ້ອນແນວນັ້ນ, ລັດຖະທຳມະນູນສະບັບທຳອິດຂອງ ສປປ ລາວ ຈຶ່ງໄດ້ຖືກສ້າງຂຶ້ນ ແລະ ປະກາດໃຊ້ໃນວັນທີ 15 ສິງຫາ 1991. ຜ່ານການຈັດຕັ້ງປະຕິບັດລັດຖະທຳມະນູນສະບັບທໍາອິດ ແລະ ເພື່ອຕອບສະໜອງຄວາມຮຽກຮ້ອງຕ້ອງການໃນແຕ່ລະໄລຍະ, ສະພາແຫ່ງຊາດ ຈ່ຶງໄດ້ພິຈາລະນາ ແລະ ຮັບຮອງເອົາລັດຖະທຳມະນູນສະບັບປັບປຸງ ເທື່ອທີໜຶ່ງໃນປີ 2003, ເທື່ອທີສອງ ໃນປີ 2015 ແລະ ເທື່ອທີສາມ ໃນປີ 2025 ຊຶ່ງແມ່ນສະບັບທີ່ນໍາໃຊ້ໃນປັດຈຸບັນ, ພ້ອມທັງໄດ້ຫັນເອົາ ເນື້ອໃນຈິດໃຈຂອງລັດຖະທຳມະ ນູນ ເປັນກົດໝາຍໃນຂະແໜງການ ຕ່າງໆ ແລະ ນິຕິກຳໃຕ້ກົດໝາຍເປັນ ຈໍານວນຫລາຍ ເພ່ືອເປັນເຄື່ອງມື ໃນການຄຸ້ມຄອງລັດ, ຄຸ້ມຄອງເສດ ຖະກິດ-ສັງຄົມດ້ວຍກົດໝາຍ ໃຫ້ ນັບມື້ເປັນລະບົບຄົບຊຸດຂຶ້ນເທື່ອລະ ກ້າວ, ເປັນພື້ນຖານຄໍ້າປະກັນໃຫ້ແກ່ການປະຕິບັດ ແລະ ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ.
ການເຊື່ອມຊຶມເອກະສານດັ່ງກ່າວ, ເພື່ອໃຫ້ພະນັກງານຄະນະພົວ ພັນຕ່າງປະເທດສູນກາງພັກ ເຫັນໄດ້ເຖິງຄວາມໝາຍສໍາຄັນທາງປະຫວັດສາດຂອງຊາດ ໃນການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່, ພ້ອມທັງປຸກລະດົມຂົນຂວາຍໃຫ້ສະມາຊິກພັກ- ພະນັກງານ ມີສະຕິຕື່ນຕົວສູງຕໍ່ ລັດຖະທຳມະນູນ, ກົດໝາຍ ແລະ ນິຕິກຳຕ່າງໆ ເພື່ອສາມາດນໍາໄປຈັດຕັ້ງປະຕິບັດເຂົ້າສູ່ໜ້າວຽກຕົວຈິງ, ປະກອບສ່ວນບູລະນະລະບອບປະຊາທິປະໄຕປະຊາຊົນ ເພື່ອສ້າງໃຫ້ເປັນລັດ ປົກຄອງດ້ວຍກົດໝາຍທີ່ເຂັ້ມແຂງ ຂຶ້ນເປັນກ້າວໆ.
ຂ່າວ: ຄຕພ
KPL
