ຂປລ
ຄະນະພົວພັນຕ່າງປະເທດ ສູນກາງພັກ (ຄຕພ) ຈັດສໍາມະນາວິທະຍາສາດພາຍໃຕ້ 2 ຫົວຂໍ້: “ກົດໝາຍສາກົນ ແລະ ສົນທິສັນຍາສາກົນ ທີ່ ສປປ ລາວ ເປັນພາຄີ” ແລະ “ວຽກງານພິທີການທູດສາຍພັກ” ເພື່ອຂໍ່ານັບຮັບຕ້ອນວັນສໍາຄັນທາງປະຫວັດສາດຂອງພັກ- ຂອງຊາດ ຄື: ວັນລັດຖະທໍາມະນູນແຫ່ງຊາດ ຄົບຮອບ 35 ປີ (15/8/1991-15/8/2026) ແລະ ວັນຢຶດອໍານາດ ຄົບຮອບ 51 ປີ (23/8/1975-23/8/2026) ໃນວັນທີ 26 ສິງຫາ 2026.
ຂປລ. ໂດຍການເປັນປະທານຂອງສະຫາຍ ສິງຫານະຄອນ ສີຫາລາດ ປະທານຄະນະບໍລິຫານງານກໍາມະບານ, ຄະນະພົວພັນຕ່າງປະເທດສູນກາງພັກ, ຫົວໜ້າຫ້ອງການ ຄຕພ, ພ້ອມດ້ວຍພະນັກງານ-ສະມາຊິກ 3 ອົງການຈັດຕັ້ງມະຫາຊົນ ຂອງຄະນະພົວພັນ ຕ່າງປະເທດສູນກາງພັກ ເຂົ້າຮ່ວມ.
ການຈັດສໍາມະນາໃນຄັ້ງນີ້ ເພື່ອຍົກລະດັບຄວາມຮູ້, ຄວາມເຂ້ົາໃຈໃຫ້ແກ່ພະນັກງານ-ລັດຖະກອນ, ນັກຄ້ົນຄວ້າ ແລະ ຜູ້ເຂ້ົາຮ່ວມກ່ຽວກັບເນື້ອໃນສໍາຄັນຂອງສົນສັນຍາ ແລະ ກົດໝາຍທີ່ ສປປ ລາວ ເປັນພາຄີໃຫ້ເລິກເຊິ່ງຍິ່ງຂ້ຶນ ແລະ ເພື່ອຍົກສູງຄວາມຮັບຜິດຊອບ ທາງການເມືອງຕາມຄໍາຂວັນຂອງຄະນະພົວພັນຕ່າງປະເທດສູນກາງພັກ ຄື: “ຄິດເລິກ ເບ່ິງໄກ ໄປຖືກ”.
ພ້ອມທັງ, ເພີ່ມທະວີທັກສະວຽກງານພິທີການທູດເປັນຕົ້ນມາລະຍາດທາງສັງຄົມ ແລະ ມາລະຍາດທາງສາກົນ, ພິທີການຕ້ອນຮັບ, ການພົບປະສອງຝ່າຍ ແລະ ຫລາຍຝ່າຍເພື່ອນໍາໄປຜັນຂະຫຍາຍ ແລະ ຈັດຕັ້ງປະຕິບັດເຂົ້າໃນວຽກງານຕົວຈິງ ໃຫ້ມີປະສິດທິພາບ ແລະ ຖືກຕ້ອງຕາມມາດຕະຖານສາກົນ. ໂອກາດນ້ີ, ສະຫາຍ ຫົງສາ ອິນທິລາດ ຮອງຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ໄດ້ບັນຍາຍ ແລະ ແລກປ່ຽນໃນຫົວຂໍ້ “ກົດໝາຍສາກົນ ແລະ ສົນທິສັນຍາສາກົນ ທີ່ ສປປ ລາວ ເປັນພາຄີ” ແລະ ສະຫາຍ ນາງ ບຸນມະນີເງິນ ສຸທໍາມະວົງ ຮັກສາການຫົວໜ້າພະແນກພິທີການ, ຄະນະພົວພັນຕ່າງປະເທດສູນກາງພັກ ໄດ້ຂຶ້ນບັນຍາຍໃນຫົວຂໍ້ “ວຽກງານພິທີການທູດສາຍພັກ”. ຫລັງຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ມີການຖາມ-ຕອບ, ແລກປ່ຽນຄໍາຄິດຄໍາເຫັນຮ່ວມກັນຢ່າງກວ້າງຂວາງ ຊ່ຶງເປັນການສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງໃຫ້ແກ່ຜູ້ເຂົ້າຮ່ວມ ກໍຄື ສະມາຊິກພັກ-ພະນັກງານພາຍໃນຄະນະພົວພັນຕ່າງປະເທດສູນກາງພັກ.
ຂ່າວ: ຄຕພ
KPL
