ຂປລ
ໃນຂອບເຂດ ການຢ້ຽມຢາມ ຣັດເຊຍ ຢ່າງເປັນທາງການຂອງ ທ່ານ ມິນອອງລາຍ(Min Aung Hlaing) ປະທານາທິບໍດີ ມຽນມາ, ວັນທີ 18 ສິງຫາ, ຢູ່ວັງ ເຄມລິນ(Kremlin), ທ່ານ ວາລາດີເມຍ ປູຕິນ(Vladimir Putin) ປະທານາທິບໍດີ ລັດເຊຍ ໄດ້ໂອ້ລົມເຈລະຈາກັບຄູ່ ຮ່ວມຕຳແໜ່ງ ມຽນມາ, ແລກປ່ຽນ ກ່ຽວກັບ ການພົວພັນສອງຝ່າຍ ໃຫ້ເຂັ້ມແຂງ ຍິ່ງຂຶ້ນ.
ຂປລ.ວິທະຍຸກະຈ່າຍສຽງ ຫວຽດນາມ, ໃນຂອບເຂດ ການຢ້ຽມຢາມ ຣັດເຊຍ ຢ່າງເປັນທາງການຂອງ ທ່ານ ມິນອອງລາຍ(Min Aung Hlaing) ປະທານາທິບໍດີ ມຽນມາ, ວັນທີ 18 ສິງຫາ, ຢູ່ວັງ ເຄມລິນ(Kremlin), ທ່ານ ວາລາດີເມຍ ປູຕິນ(Vladimir Putin) ປະທານາທິບໍດີ ລັດເຊຍ ໄດ້ໂອ້ລົມເຈລະຈາກັບຄູ່ ຮ່ວມຕຳແໜ່ງ ມຽນມາ, ແລກປ່ຽນ ກ່ຽວກັບ ການພົວພັນສອງຝ່າຍ ໃຫ້ເຂັ້ມແຂງຍິ່ງຂຶ້ນ. ໃນໂອກາດນີ້ ທ່ານ ວາລາດີເມຍ ປູຕິນ, ປະທານາທິບໍດີ ລັດເຊຍ ໄດ້ເນັ້ນໜັກວ່າ: ການພົວພັນ ລະຫວ່າງ ລັດເຊຍ ແລະ ມຽນມາ ພວມພັດທະນາ ຢ່າງຕັ້ງໜ້າ, ພ້ອມທັງ ຕີລາຄາສູງ ການປະສານສົມທົບ ຂອງປະເທດນີ້ໃນການພົວພັນ ລະຫວ່າງ ລັດເຊຍ ແລະ ອາຊຽນ. ການພົວພັນ ລະຫວ່າງ ສອງປະເທດ ໄດ້ສ້າງຕັ້ງແຕ່ປີ 1948 ແລະ ມີການພັດທະນາ ຢ່າງບໍ່ຢຸດຢັ້ງ, ພິເສດໃນຊຸມປີມໍ່ໆມານີ້ ນັບມື້ ນັບມີຄວາມໄວ້ເນື້ອ ເຊື່ອໃຈ ແລະ ສະໜັບສະໜູນ ການຊຸກຍູ້ການພົວພັນ ລະຫວ່າງ ລັດເຊຍ ແລະ ອາຊຽນ. ທັງສອງປະເທດ ຕັ້ງໜ້າປະສານສົມທົບ ໃນເວທີສາກົນ. ເຖິງຢ່າງໃດກໍຕາມ ຕ້ອງສືບຕໍ່ຍູ້ແຮງ ການຮ່ວມມືດ້ານເສດຖະກິດ, ໃນນັ້ນ ສອງຝ່າຍ ໄດ້ມີບັນດາພື້ນຖານ ແລະ ໂຄງການທີ່ດີ. ການພົວພັນໃນຂົງເຂດ ຄວາມໝັ້ນຄົງ ກໍ່ພວມໄດ້ຮັບການເພີ່ມທະວີ. ສ່ວນ ທ່ານ ມິນອອງລາຍ ຢັ້ງຢືນວ່າ: ມຽນມາ ແມ່ນຄູ່ຮ່ວມມື ທີ່ມີຄວາມໄວ້ເນື້ອເຊື່ອໃຈຂອງ ລັດເຊຍ ຢູ່ອາຊີ ຕາເວັນອອກສ່ຽງໃຕ້ ແລະ ພ້ອມແລ້ວ ທີ່ຈະເປີດກວ້າງ ການຮ່ວມມື ໃນຫລາຍຂົງເຂດ. ພ້ອມທັງ ຮຽກຮ້ອງໃຫ້ບັນດານັກລົງທຶນ ລັດເຊຍ ເພີ່ມທະວີການລົງທຶນຢູ່ ມຽນມາ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
