ຂປລ
ໃນຂະນະທີ່ ຈໍານວນປະຊາກອນຊ້າງອາຊີ ໃນທົ່ວໂລກ ຫລຸດລົງ ຢ່າງຕໍ່ເນື່ອງ, ກຸ່ມຊ້າງອາຊີຢູ່ ສປ ຈີນ ປາກົດມີທ່າອຽງ ເພີ່ມຂຶ້ນ ແບບສວນກະແສ. ຊ້າງປ່າອາຊີຢູ່ ສປ ຈີນ ດໍາລົງຊີວິດ ແບບກະແຈກກະຈາຍ ຢູ່ທ້ອງຖິ່ນຕ່າງໆເປັນຕົ້ນ ແມ່ນກິ່ງແຂວງສິບສອງພັ່ນນາ, ນະຄອນຜູເອີ ແລະ ນະຄອນຫລິນຊາງ ແຂວງຢຸນນານ. ໃນຊຸມປີ 1980, ກຸ່ມຊ້າງອາຊີ ຢູ່ ສປ ຈີນ ເຫລືອພຽງ ປະມານ 150 ໂຕ.
ຂປລ.ວິທະຍຸ-ໂທລະພາບ ສູນກາງຈີນ,ອີງຕາມຕົວເລກ ຂໍ້ມູນຫລ້າສຸດ ທີ່ອົງການປ່າໄມ້ ແລະ ທົ່ງຫຍ້າແຫ່ງຊາດຈີນສະແດງໃຫ້ເຫັນວ່າ: ໃນຂະນະທີ່ ຈໍານວນປະຊາກອນຊ້າງອາຊີ ໃນທົ່ວໂລກ ຫລຸດລົງ ຢ່າງຕໍ່ເນື່ອງ, ກຸ່ມຊ້າງອາຊີຢູ່ ສປ ຈີນ ປາກົດມີທ່າອຽງເພີ່ມຂຶ້ນ ແບບສວນກະແສ. ຊ້າງປ່າອາຊີຢູ່ ສປ ຈີນ ດໍາລົງຊີວິດ ແບບກະແຈກກະຈາຍ ຢູ່ທ້ອງຖິ່ນຕ່າງໆເປັນຕົ້ນ ແມ່ນກິ່ງແຂວງສິບສອງພັ່ນນາ, ນະຄອນຜູເອີ ແລະ ນະຄອນຫລິນຊາງ ແຂວງຢຸນນານ. ໃນຊຸມປີ 1980, ກຸ່ມຊ້າງອາຊີຢູ່ ສປ ຈີນ ເຫລືອພຽງ ປະມານ 150 ໂຕ. ຜ່ານການອະນຸລັກ ມາເປັນເວລາຫລາຍປີ ໄດ້ເພີ່ມຂຶ້ນປະມານ 400 ໂຕ. ເກືອບວ່າທຸກໆກຸ່ມຊ້າງລ້ວນແຕ່ມີຊ້າງນ້ອຍເກີດໃໝ່ໃນທຸກປີ, ຖືວ່າກຸ່ມຊ້າງອາຊີຢູ່ຈີນໄດ້ເຂົ້າສູ່ໄລຍະແຜ່ພັນຢ່າງວ່ອງໄວ. ປັດຈຸບັນ, ສປ ຈີນ ໄດ້ສ້າງໃຫ້ມີເຂດສະຫງວນ ທໍາມະຊາດຊ້າງອາຊີ 11 ແຫ່ງ ໂດຍໄດ້ຈັດສັນທີ່ຢູ່ອາໄສ ຂອງຊ້າງປະມານ 240.000 ເຮັກຕາ, ຖານແຫລ່ງຫົວອາຫານ ຂອງຊ້າງປະມານ 2,467 ເຮັກຕາ ແລະ “ໂຮງອາຫານຂອງຊ້າງ” ປະມານ 800 ເຮັກຕາ ທີ່ປູກພືດຕ່າງໆສໍາລັບຊ້າງ ເຊັ່ນ: ຫຍ້າ, ໄມ້ໄຜ່ ແລະ ຕົ້ນກ້ວຍ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
