ຂປລ. ນອກຈາກນັ້ນ, ຄະນະຝ່າຍລາວ ຍັງໄດ້ເຂົ້າຢ້ຽມຂ່ຳນັບ ທ່ານ ຟາມ ຢາ ຕຸກ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີແຫ່ງ ສສ ຫວຽດນາມ ເພື່ອລາຍງານສະພາບການຮ່ວມມື ແລະ ຜົນສຳເລັດໃນການຈັດຕັ້ງປະຕິບັດວຽກງານການຮ່ວມມື ໃນຂະແໜງກະສິກຳ ແລະ ສິ່ງແວດລ້ອມ ໃນໄລຍະ 5 ປີຜ່ານມາ. 

        ໂອກາດນີ້, ທ່ານຮອງນາຍົກລັດຖະມົນຕີ ສສ ຫວຽດນາມ ໄດ້ເນັ້ນເຖິງຄວາມສຳຄັນ ຂອງການຮ່ວມມືມິດຕະພາບແບບພິເສດຂອງ ລາວ- ຫວຽດນາມ ໂດຍສະເພາະໃນຂົງເຂດກະສິກຳ ແລະ ສິ່ງແວດລ້ອມ, ພ້ອມທັງຈະສະໜັບສະໜູນ ແລະ ຊຸກຍູ້ສົ່ງເສີມການຮ່ວມມື ໂດຍສະເພາະການຊຸກຍູ້ສົ່ງເສີມຫົວໜ່ວຍທຸລະກິດກະສິກຳ ຂອງ ສສ ຫວຽດນາມ ທີ່ມາລົງທຶນ ຢູ່ ສປປ ລາວ ໃຫ້ເກີດດອກອອກຜົນ ແລະ ມີຜົນສຳເລັດຢ່າງເປັນຮູບປະທຳ. ນອກນັ້ນ, ທ່ານ ລິນຄຳ ດວງສະຫວັນ ແລະ ຄະນະ ໄດ້ພົບປະກັບລັດຖະມົນຕີກະຊວງການເງິນ ສສ ຫວຽດນາມ ເພື່ອປຶກສາຫາລືກ່ຽວກັບການເສີມຂະຫຍາຍການຮ່ວມມື ແລະ ການລົງທຶນດ້ານກະສິກຳລາວ-ຫວຽດນາມ. ປັດຈຸບັນ, ວິສາຫະກິດຫວຽດນາມມີການລົງທຶນດ້ານກະສິກຳ ຢູ່ ສປປ ລາວ ຈຳນວນ 276 ໂຄງການດ້ວຍມູນຄ່າທຶນ ຈົດທະບຽນສະສົມ 6,2 ຕື້ກວ່າ ໂດລາສະຫະລັດ ແລະ ໃນປີຜ່ານມາມີການລົງທຶນໃໝ່ 560 ລ້ານກວ່າ ໂດລາສະຫະລັດ ຊຶ່ງສະແດງໃຫ້ເຫັນເຖິງຄວາມເຊື່ອໝັ້ນຂອງນັກລົງທຶນຫວຽດນາມ ຕໍ່ທ່າແຮງຂອງ ສປປ ລາວ. ພ້ອມນີ້, ທັງສອງຝ່າຍ ເຫັນດີສືບຕໍ່ການຮ່ວມມືໃນຂົງເຂດກະສິກຳ ແລະ ສິ່ງແວດລ້ອມ ໂດຍສະເພາະການລົງທຶນຂອງພາກທຸລະກິດກະສິກຳ-ປ່າໄມ້ ຂອງ ສສ ຫວຽດນາມ ຢູ່ ສປປ ລາວ ແລະ ເຫັນດີໃຫ້ມີການແຕ່ງຕັ້ງຄະນະຕິດຕາມກວດກາການລົງທຶນ ຂອງຫົວໜ່ວຍທຸລະກິດ ສສ ຫວຽດນາມ ຢູ່ ສປປ ລາວ ເພື່ອໃຫ້ປະຕິບັດຢ່າງມີປະສິດທິຜົນ ແລະ ເປັນຮູບປະທຳ.

        ຄຽງຄູ່ກັນນັ້ນ, ຄະນະຜູ້ແທນລາວ ຍັງໄດ້ພົບປະກັບພາກສ່ວນກ່ຽວຂ້ອງ ເພື່ອເສີມຂະຫຍາຍການຮ່ວມມື ໂດຍສະເພາະໃນຂົງເຂດການຄ້ົນຄວ້າດ້ານກະສິກຳ-ປ່າໄມ້ ເປັນຕົ້ນສະຖາບັນວິທະຍາສາດປ່າໄມ້, ສະຖາບັນວິທະຍາສາດກະສິກຳ ແລະ ສະຖາບັນວາງແຜນ ແລະ ອອກແບບກະສິກຳ ຂອງ ສສ ຫວຽດ ນາມ. ໃນນີ້, ໄດ້ເຊັນບົດບັນທຶກຄວາມເຂົ້າໃຈ ກ່ຽວກັບການແລກປ່ຽນທາງດ້ານວິຊາການ ແລະ ການຮ່ວມມືດ້ານວິທະຍາສາດ ແລະ ພົບປະກັບກຸ່ມອຸດສາຫະກຳຢາງພາລາ. ພ້ອມທັງຢ້ຽມຢາມພື້ນຖານການຜະລິດ ຢູ່ແຂວງ ນິງບິ່ງ ເປັນຕົ້ນໂຮງງານນ້ຳໝາກໄມ້ກະປ໋ອງ Doveco ແລະ ພື້ນທີ່ການຜະລິດພືດ ສໍາລັບສະໜອງສູ່ໂຮງງານປຸງແຕ່ງຈໍານວນໜຶ່ງ. 

       ການເຄື່ອນໄຫວຄັ້ງນີ້, ບໍ່ພຽງແຕ່ເປັນການຮັດແໜ້ນສາຍພົວພັນ ມິດຕະພາບແບບພິເສດ ລາວ- ຫວຽດນາມເທົ່ານັ້ນ, ແຕ່ຍັງເປັນການຍົກລະດັບການຮ່ວມມືພິເສດຢ່າງຮອບດ້ານ ໃນຂະແໜງກະສິກຳ ແລະ ສິ່ງແວດລ້ອມ ເພື່ອຮັບປະກັນດ້ານການຄ້ຳປະກັນຄວາມໝັ້ນຄົງ ດ້ານສະບຽງອາຫານ, ຊຸກຍູ້ສົ່ງເສີມການລົງທຶນ ແລະ ການຄ້າຂອງສອງຝ່າຍ, ການຄຸ້ມຄອງ ແລະ ອະນຸລັກຊັບພະຍາກອນທຳມະຊາດ, ນ້ຳ ແລະ ສິ່ງແວດລ້ອມຕາມທິດ ສີຂຽວ ແລະ ຍືນຍົງຂອງສອງປະ ເທດ, ສອງຂະແໜງການ ແລະ ປະ ຊາຊົນສອງຊາດ ອີກດ້ວຍ.

ຂໍ້ມູນ-ພາບ: ຂ່າວສານກະສິກຳ

KPL