ຂປລ
ໃນຕອນບ່າຍຂອງວັນທີ 15 ກໍລະກົດ 2026, ສະຫາຍ ທອງສະຫວັນ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນກະຊວງການ ຕ່າງປະເທດ ສສ ຫວຽດນາມ.
ຂປລ. ນຳໂດຍ ສະຫາຍ ນາງ ເລ ທີ ທູ ຮັ່ງ ຮອງລັດຖະມົນຕີກະຊວງການຕ່າງ ປະເທດແຫ່ງ ສສ ຫວຽດນາມ ພ້ອນຄະນະໃນໂອກາດເດີນທາງ ມາຮ່ວມກອງປະຊຸມພົບປະສອງຝ່າຍ ລະຫວ່າງ ສອງກະຊວງການຕ່າງປະເທດ ແຫ່ງ ສປປ ລາວ ແລະ ສສ ຫວຽດນາມ ກ່ຽວກັບການຮ່ວມມື, ແລກປ່ຽນບົດຮຽນວຽກງານພົວພັນຄົນເຊື້ອຊາດລາວ/ຫວຽດນາມ ຢູ່ຕ່າງປະເທດ ຊຶ່ງຈັດຂຶ້ນໃນວັນທີ 15-16 ກໍລະກົດ 2026 ທີ່ກະຊວງການຕ່າງປະເທດ.ພາຍຫລັງການເຂົ້າຢ້ຽມຂໍ່ານັບຄະນະຜູ້ແທນດັ່ງກ່າວ ກໍໄດ້ສືບຕໍ່ເຂົ້າຮ່ວມກອງປະຊຸມພົບປະສອງຝ່າຍລະຫວ່າງກົມພົວພັນຄົນເຊື້ອຊາດລາວຢູ່ຕ່າງປະເທດ ແລະ ຄະນະກຳມະການແຫ່ງລັດເພື່ອຊາວ ຫວຽດນາມຢູ່ຕ່າງປະເທດ ໂດຍ ການເປັນປະທານຮ່ວມຂອງ ສະຫາຍ ພົງສະຫວັນ ສີສຸລາດ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ຜູ້ຊີ້ນຳວຽກງານພົວພັນຄົນເຊື້ອຊາດລາວຢູ່ຕ່າງ ປະເທດ ແລະ ສະຫາຍ ນາງ ເລ ທິ ທູ ຮັ່ງ ຮອງລັດຖະມົນຕີກະຊວງການຕ່າງປະເທດແຫ່ງ ສສ ຫວຽດ ນາມ, ຜູ້ຊີ້ນຳຄະນະກຳມະການແຫ່ງລັດ ເພື່ອຊາວຫວຽດນາມ ຢູ່ຕ່າງປະເທດ. ກອງປະຊຸມໄດ້ມີການປຶກສາຫາລືແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນຮ່ວມກັນຢ່າງກົງໄປກົງມາໃນຫລາຍບັນຫາທີ່ສຳຄັນ ເພື່ອແນໃສ່ຮັດແໜ້ນສາຍພົວພັນມິດຕະພາບ ແລະ ຄວາມສາມັກຄີພິເສດຂອງສອງກະຊວງ.
ກອງປະຊຸມຄັ້ງນີ້, ໄດ້ດຳເນີນໄປ ດ້ວຍບັນຍາກາດທີ່ສ້າງສັນ, ເຕັມໄປດ້ວຍໄມຕີຈິດມິດຕະພາບ ແລະ ສະໜິດສະໜົມກັນແໜ້ນແຟ້ນເປັນຢ່າງດີ ຊຶ່ງໄດ້ກາຍເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດຂອງສອງພັກ ສອງລັດ ກໍຄືສອງກົມພົວພັນຄົນເຊື້ອຊາດລາວຢູ່ຕ່າງປະເທດ ແລະ ຄະນະກຳມະການແຫ່ງລັດ ເພື່ອຊາວຫວຽດນາມຢູ່ຕ່າງປະເທດ. ພ້ອມນີ້, ທັງສອງຝ່າຍ ກໍໄດ້ລົງນາມບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມື, ແລກປ່ຽນບົດຮຽນວຽກງານພົວພັນຄົນເຊື້ອຊາດລາວ ແລະ ຄົນເຊ້ືອຊາດຫວຽດນາມຢູ່ຕ່າງປະເທດ.
KPL
