ຂປລ.ວິທະຍຸ ກະຈາຍສຽງ ຫວຽດນາມ, ລ​າ​ຄາ​ນ້ຳ​ມັນ​ໂລກ ​ເພີ່ມ​ຂຶ້​ນ​ສູງ​ ໃນ​ວາ​ລະ​ທຸ​ລະ​ກຳ​ ຂອງ​​ວັນ​ທີ 20 ກໍ​ລະ​ກົດ, ພາຍ​ຫລັງ​ທີ່ ສ.ອາ​ເມ​ລິ​ກາ ເປີດບັ້ນ​ບຸກ​ໂຈມ​ຕີໃໝ່​ ແນ​ໃສ່ ອີ​ຣານ, ໃນ​ຂະ​ນະ​ທີ່ ​ບັນ​ດາ​ການ​ຜັນ​ແປ ​ດ້ານ​ຄວາມ​ໝັ້ນ​ຄົງ​ ຢູ່​ຊ່ອງ​ແຄບ​ ທະ​ເລຮໍມຸສ(Hormuz) ສືບ​ຕໍ່​ເຮັດ​ໃຫ້​ເກີດ​ ຄ​ວາມ​ວິ​ຕົກ​ກັງ​ວົນ ​ກ່ຽວ​ກັບຄວາມ​ສ່ຽງ​ ແຫລ່ງ​ສະ​ໜອງ​ ພະ​ລັງ​ງານ​ທົ່ວ​ໂລກ ​ຖືກ​ຂາດ​ວັກ ​ຂາດ​ຕອນ. ໃນ​ວາ​ລະ​ທຸ​ລະ​ກຳ, ລາ​ຄາ​ນ້ຳ​ມັນ Brent ມີ​ຈຸດ​ເວ​ລາ​ເພີ່ມ​ຂຶ້​ນ 3,8% ຂຶ້ນກວ່າ 91 ໂດລາສະຫະລັດ/ຖັງ, ເຊິ່ງ​ເປັນ​ລະ​ດັບ​ສູງ​ສຸດ​ ນັບ​ແຕ່​ວັນ​ທີ 11 ມິ​ຖຸ​ນາ, ໃນ​ຂະ​ນະ​ທີ່​ ລາ​ຄາ​ນຳ​ມັນ​ດິບ ອາ​ເມ​ລິ​ກາ (WTI) ເພີ່ມ​ຂຶ້ນ​ເກືອບ 85 ໂດລາສະຫະລັດ/ຖັງ. ສາເຫດ​ຂອງ​ສະ​ພາບ​ລາ​ຄາ​​ຂຶ້​ນ​ສູງ ແມ່ນ​ຍ້ອນ ສ.ອາ​ເມ​ລິ​ກາ ສືບ​ຕໍ່​ດຳ​ເນີນ ​ບັນ​ດາ​ການ​ເຄື່ອນ​ໄຫວ ​ດ້ານ​ການ​ທະ​ຫານ​ແນ​ໃສ່ ອີ​ຣານ, ເຮັດ​ໃຫ້​ເພີ່ມ ​ຄວາມ​ວິ​ຕົກ​ກັງ​ວົນ ​ກ່ຽວ​ກັບ ​ຄວາມ​ສ່ຽງ​ ແຫລ່ງ​ສະ​ໜອງ​ນ້ຳ​ມັນ​ ຜ່ານ​ຊ່ອງ​ແຄບ ​ທະ​ເລ Hormuz ຖືກ​ຂາດ​ວັກ​ ຂາດ​ຕອນ. ນີ້​ແມ່ນ​ເສັ້ນ​ທາງ ​ຂົນ​ສົ່ງ​ຍຸດ​ທະ​ສາດ, ແຫ່ງ​ທີ່​ມີ 1/5 ​ປະ​ລິ​ມານ ​ບໍ​ລິ​ໂພກ ​ນ້ຳ​ມັນ​ທົ່​ວ​ໂລກ ​ທີ່ໄດ້​ຂົນ​ສົ່ງ ​ຜ່ານ​ທາງ​ທະ​ເລ. ກ່ອນໜ້ານັ້ນ,​ວັນ​ທີ 19 ກໍ​ລະ​ກົດ, ສ.ອາ​ເມ​ລິ​ກາ ໄດ້​ປຸກ​ລະ​ດົມ​ ການ​ບຸກ​ໂຈມ​ຕີໃໝ່​ແນ​ໃສ່​ ອີ​ຣານ, ເປັນ​ມື້​ທີ່ 9 ຢ່າງ​ລ້ຽນ​ຕິດ​ທີ່ ສ.ອາ​ເມ​ລິ​ກາ ດຳ​ເນີນ​ບັນ​ດາ​ການ​ບຸກ​ໂຈມ​ຕີ​ ແນ​ໃສ່ ອີ​ຣານ, ພາຍ​ຫລັງ​​ ການ​ປະ​ທະ​ກັນ​ຢູ່ ຕາ​ເວັນ​ອອກ​ກາງ ເກີດ​ຂຶ້ນ​ຄືນ​ໃໝ່​ ໃນ​ຕົ້ນ​ເດືອນ ກໍ​ລະ​ກົດ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL