ຂປລ.  ຍົກສູງຄຸນນະພາບ, ປະສິດທິພາບ ແລະ ຄວາມທັນສະໄໝຂອງວຽກງານສື່ມວນຊົນ, ໃຫ້ສາມາດຕອບສະໜອງຕໍ່ສະພາບການໃໝ່ ແລະ ການພັດທະນາຂອງສັງຄົມໃນຍຸກດີຈິຕອນ ຊຶ່ງການສ້າງການຫັນປ່ຽນວຽກງານສື່ມວນຊົນ ໄປສູ່ຄຸນນະພາບໃໝ່ຢ່າງແຂງແຮງນັ້ນ ຕ້ອງດໍາເນີນບົນຈິດໃຈ “ຍົກສູງບົດບາດການນຳພາຂອງພັກພັດທະນາວຽກ ງານສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ” ໂດຍເນັ້ນການສ້າງສື່ມວນຊົນທີ່ມີຄຸນນະພາບ, ທັນສະໄໝ, ມີຄວາມຮັບຜິດຊອບ ແລະ ສາມາດຮັບມືກັບຂ່າວປອມ, ຂໍ້ມູນບິດເບືອນ ແລະ ສິ່ງທ້າທາຍຈາກການນຳໃຊ້ເຕັກໂນໂລຊີໃໝ່ໄດ້ຢ່າງມີປະສິດທິຜົນ.

       ສະຫາຍ ຄຳພັນ ເຜີຍຍະວົງ ກຳມະການກົມການ ເມືອງສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ໃຫ້ຮູ້ໃນກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I ເມື່ອບໍ່ດົນນີ້ວ່າ: ເພື່ອຮັບປະກັນສ້າງການຫັນປ່ຽນວຽກງານສື່ມວນຊົນ ໄປສູ່ຄຸນນະພາບໃໝ່ ຢ່າງແຂງແຮງນັ້ນ ຕ້ອງດໍາເນີນບົນຈິດໃຈ “ຍົກສູງບົດບາດການນຳພາຂອງພັກ ພັດທະນາວຽກງານສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ” ໂດຍຈະປ່ຽນແປງຈິນຕະນາການໃໝ່ ໃນການພັດທະນາວຽກງານສື່ມວນຊົນໃນຍຸກໃໝ່ ດ້ວຍການເຊື່ອມຊຶມທັດສະນະຊີ້ນຳຂອງພັກ ໃຫ້ປະກົດເປັນຮູບປະທຳເທື່ອລະກ້າວ, ພ້ອມກັນນັ້ນ ຕ້ອງເດັດດ່ຽວຫັນໄປສູ່ຈິນຕະນາ ການເປັນເຈົ້າຕົນເອງໃຫ້ຫລາຍຂຶ້ນ, ກ້າຄິດ, ກ້າເຮັດ ແລະ ກ້າຮັບຜິດຊອບ, ກ້າເຄື່ອນໄຫວເພື່ອ ຜົນປະໂຫຍດຂອງພັກ, ຂອງຊາດ; ເພີ່ມທະວີບົດບາດການນໍາພາທີ່ເຂັ້ມແຂງຂອງພັກຕໍ່ສື່ມວນຊົນ ແລະ ສັງຄົມດ້ວຍການຖືເອົາການກໍ່ສ້າງພັກເປັນປັດໄຈຕັດສິນ ໂດຍສ້າງໃຫ້ການຈັດຕັ້ງພັກ ໃນອົງການສື່ມວນຊົນທຸກຂັ້ນ ມີຄວາມປອດໃສ, ເຂັ້ມແຂງ ແລະ ໜັກແໜ້ນ; ຍົກລະດັບ ຄວາມຮູ້ທາງດ້ານທິດສະດີການ ເມືອງ-ການປົກຄອງ ຕິດພັນກັບຍຸກ ດີຈິຕອນ ແລະ ປັນຍາປະດິດ ດ້ວຍການປະຕິບັດເຂັ້ມງວດ ລະບອບຮໍ່າຮຽນທິດສະດີການເມືອງ ຕິດພັນກັບການສະໜອງຂໍ້ມູນຂ່າວສານ, ປັບປຸງຄວາມຮັບຮູ້ໃໝ່ຂອງພະນັກງານ- ນັກຂ່າວ, ບັນນາທິການຂ່າວ ແລະ ນັກເຕັກນິກໃນບັນດາອົງການສື່ ມວນຊົນຢ່າງຕໍ່ເນື່ອງ; ເພີ່ມທະວີຄວາມເຂັ້ມງວດໃນການຈັດຕັ້ງປະ ຕິບັດຈັນຍາບັນວິຊາຊີບດ້ວຍການ ປັບປຸງກົນໄກການຄຸ້ມຄອງລະບົບການຂຶ້ນທະບຽນນັກຂ່າວ, ການເຄື່ອນໄຫວ ຂອງສໍານັກຂ່າວສານ ແລະ ການອະນຸຍາດຕ່າງໆ ໃຫ້ຮັດກຸມຕາມກົດໝາຍກໍານົດໄວ້, ເອົາໃຈໃສ່ຄຸ້ມຄອງການເຄື່ອນໄຫວ ຂອງສະມາຄົມນັກຂ່າວແຫ່ງ ສປປ ລາວ ໃຫ້ປະຕິບັດຖືກຕ້ອງຕາມພາລະບົດບາດຢ່າງເປັນເຈົ້າການ.

    ສຳລັບຄາດໝາຍສູ້ຊົນຈະຄຸ້ມ ຄອງສື່ມວນຊົນທັງພາກລັດ ແລະ ເອກະຊົນ ພາຍໃຕ້ກົດໝາຍກຳນົດຢ່າງເຂັ້ມງວດ, ສື່ເອກະຊົນ ແລະ ຜູ້ມີອິດທິພົນ ທີ່ດຳເນີນກິດຈະການເຜີຍແຜ່ຂໍ້ມູນຂ່າວສານຕ້ອງຂຶ້ນທະບຽນກັບກົມສື່ມວນຊົນຢ່າງເປີດເຜີຍຕາມ ກົດໝາຍ; ພັດທະນາສ່ືມວນຊົນລາວ ເປັນຕົ້ນແມ່ນ 5 ສື່ຫລັກຂອງລັດ ໃຫ້ມີຄວາມໜັກແໜ້ນເຂັ້ມແຂງ, ກ້າວເຂົ້າສູ່ຄຸນນະພາບໃໝ່, ມີຄວາມວ່ອງໄວ, ທັນສະໄໝ ແລະ ໜ້າເຊື່ອຖືໄດ້, ຮັບປະກັນໃຫ້ສື່ມວນຊົນ ສາມາດປະຕິບັດບົດບາດ ໃນນາມ ເປັນເຄື່ອງມື, ເປັນກະບອກສຽງອັນແຫລມຄົມໃນການໂຄສະນາ, ເຜີຍແຜ່ແນວທາງແຜນນະໂຍບາຍ ຂອງພັກ, ນະໂຍບາຍ, ກົດໝາຍຂອງລັດ; ພັດທະນາເນື້ອຫາໃຫ້ມີຄວາມສ້າງສັນ ແລະ ເຂົ້າເຖິງຄົນຮຸ່ນໃໝ່, ສ້າງເນື້ອຫາທີ່ມີທັງ “ສາລະ” ແລະ “ຄວາມໜ້າສົນໃຈ” ຄວບຄູ່ກັນ. ການເລົ່າເລື່ອງຜ່ານວິດີໂອສັ້ນ, ສາລະຄະດີ ຫລື ການນຳສະເໜີແບບດີ ຈິຕອນທີ່ທັນສະໄໝ ໄປຄວບຄູ່ກັບ ການພັດທະນາບຸກຄະລາກອນ ທີ່ ເຮັດວຽກໃນອົງການສື່ມວນຊົນ ໂດຍສະເພາະນັກຂ່າວລຸ້ນໃໝ່ ໃຫ້ມີ ທັກສະຮອບດ້ານທັງດ້ານວິຊາຊີບ, ເຕັກໂນໂລຊີ, ພາສາຕ່າງປະເທດ ແລະ ຈັນຍາບັນວິຊາຊີບ; ນຳໃຊ້ສື່ມວນຊົນເຂົ້າໃນການປົກປັກຮັກສາ ແລະ ເສີມຂະຫຍາຍມູນເຊື້ອປະຕິວັດອັນດີງາມຂອງພັກຂອງຊາດ; ປຸກລະດົມຄວາມສາມັກຄີປອງດອງ ແລະ ສ້າງຄວາມເຊື່ອໝັ້ນ ຂອງມະຫາຊົນ ຕໍ່ການນໍາພາຂອງພັກ.

ຂ່າວ: ທະນູທອງ; ພາບ: ອ່າຍຄຳ

KPL