ຂປລ. ພູຟ້າ ນັບເປັນພູເຂົາສັກສິດ ແລະ ເປັນສູນລວມຈິດໃຈຂອງປະຊາຊົນແຂວງຜົ້ງສາລີ ມາແຕ່ບູຮານນະການ. ພູຟ້າຕັ້ງຢູ່ທາງທິດຕາເວັນອອກສ່ຽງເໜືອຂອງເທສະບານເມືອງຜົ້ງສາລີ ມີຄວາມສູງ 1.640 ແມັດ ຈາກລະດັບນ້ຳທະເລ ແລະ ເປັນຍອດພູທີ່ສູງເດັ່ນໃນບໍລິເວນ. ພື້ນທີ່ກວ່າ 200 ເຮັກຕາ ຖືກປົກຄຸມດ້ວຍປ່າໄມ້ອັນອຸດົມສົມບູນ ເປັນແຫລ່ງອາໄສຂອງສັດປ່ານາໆຊະນິດ ແລະ ພືດສະໝຸນໄພພື້ນເມືອງຫລາຍຊະນິດ ທີ່ປະຊາຊົນນຳໃຊ້ເປັນຢາປິ່ນປົວພະຍາດມາແຕ່ກ່ອນ. ໃນອະດີດ ພູຟ້າ ເປັນຖິ່ນອາໄສຂອງສັດປ່າຫາຍາກຫລາຍຊະນິດ ເຊັ່ນ: ເສືອ, ຊ້າງ, ແຮດ, ກະທິງ, ກວາງ ແລະ ນົກຍຸງ. ປັດຈຸບັນສັດປ່າຈຳນວນຫລາຍໄດ້ຍ້າຍຖິ່ນອາໄສຍ້ອນການຂະຫຍາຍຕົວຂອງຊຸມຊົນ, ແຕ່ຍັງມີສັດປ່າ ແລະ ແມງ ໄມ້ຫລາຍຊະນິດອາໄສຢູ່ເຮັດໃຫ້ພູຟ້າ ກາຍເປັນແຫລ່ງທ່ອງທ່ຽວທາງທຳມະຊາດທີ່ງົດງາມ.

ຕາມຕຳນານ ນິທານພື້ນບ້ານ ກ່າວຂານກັນມາວ່າ: ປາງກ່ອນກີ້ຢູ່ເທິງຈອມພູສູງແຫ່ງນີ້ ຍັງມີເຄືອເຂົາໃຫຍ່ຕົ້ນໜຶ່ງ ຊື່ວ່າ: ເຄືອເຂົາຫລວງ. ເຄືອເຂົາດັ່ງກ່າວ ມີອາຍຸຫລາຍພັນປີ ແລະ ນັບມື້ນັບປົ່ງຍອດອອກໃບສູງຂຶ້ນ ເຮັດໃຫ້ຍອດຂອງເຄືອເຂົາຫລວງດັ່ງກ່າວ ເລືອຂຶ້ນໄປເຖິງເມືອງພະຍາແຖນແຫ່ງໜຶ່ງ ທີ່ຢູ່ສະຫວັນຊັ້ນຟ້າ, ເຄືອເຂົາຫລວງນີ້ ໄດ້ເລືອເຂົ້າໄປເຖິງພະລາດສະວັງຂອງພະຍາແຖນ, ພະຍາແຖນເລີຍໄດ້ສັ່ງໃຫ້ບັນດາເສນາໝາມາດໃຊ້ມີດຕັດຍອດຂອງເຄືອເຂົາຫລວງນັ້ນຖິ້ມ, ປະກົດວ່າຍິ່ງຕັດຍອດເຄືອເຂົາກໍ່ຍຶງປົ່ງຍອດອອກໄວຂຶ້ນເລື້ອຍໆ, ພະຍາແຖນເກີດມີການສົງໄສວ່າ ເຄືອດັ່ງກ່າວແມ່ນມາຈາກໃສ ເຫດໃດຈຶ່ງມາຮອດເມືອງພະຍາແຖນຂອງຕົນ. ມີມື້ໜຶ່ງ ພະຍາແຖນຈຶ່ງໄດ້ຕັດສິນໃຈ ຊອກຫາທີ່ມາຂອງຕົ້ນເຄືອເຂົາຕົ້ນນີ້. ພະຍາແຖນນຳພາເສນາບໍລິວານຕິດຕາມມານຳຈຳນວນໜຶ່ງ ພ້ອມກັນເລີ່ມຕົ້ນ ຕາມຈາກຍອດຂອງເຄືອເຂົາຫລວງເພື່ອຊອກຫາຕົ້ນຂອງມັນ. ພວກເຂົາໄດ້ໃຊ້ເວລາຫລາຍມື້ຫລາຍຄືນ ຈຶ່ງສາມາດລົງມາພົບເຫັນຕົ້ນຂອງເຄືອເຂົາຫລວງ. ປະກົດວ່າຕົ້ນເຄືອເຂົາຫລວງຕົ້ນນີ້ ມີຕົ້ນກຳເນີດຈາກພູສູງແຫ່ງໜຶ່ງໃນເມືອງມະນຸດມະນາ. ເມື່ອຮູ້ທີ່ມາຂອງເຄືອເຂົານີ້ແລ້ວ ພະຍາແຖນກໍສຸດທີ່ດີອົກດີໃຈ ທີ່ໄດ້ມາພົບຕົ້ນເຄືອເຂົາຫລວງ ຢູ່ເມືອງມະນຸດ. ຈາກນັ້ນພະຍາແຖນພ້ອມດ້ວຍບໍລິວານກໍໄດ້ພາກັນກັບຄືນສູ່ເມືອງຟ້າສະຫວັນ ແລ້ວໄດ້ປະກາດໃຫ້ຊາວເມືອງພະຍາແຖນຮູ້ຈັກ ເຖິງທີ່ມາຂອງຕົ້ນເຄືອເຂົາຫລວງ ແລະ ໄດ້ເລົ່າເລື່ອງຕ່າງໆ ໃນເລື່ອງທີ່ຕົນເອງເຫັນບັນດາມະນຸດທີ່ດຳລົງຊີວີດຢູ່ເຂດໃກ້ຄຽງພູສູງໜ່ວຍນີ້. ຕັ້ງແຕ່ນັ້ນມາ ຊາວເມືອງພະຍາແຖນທັງຫລາຍ ໄດ້ພາກັນລົງມາທ່ຽວທີ່ເມືອງມະນຸດ ເພື່ອລົງມາເບິ່ງການດຳລົງຊີວິດຂອງມະນຸດ ໃນໂລກເບື້ອງລຸ່ມດ້ວຍການໃຊ້ເຄືອເຂົາຫລວງເປັນຂັ້ນໄດ. ໃນເວລາດຽວກັນນັ້ນ, ລູກສາວຂອງພະຍາແຖນ ຊື່ ນາງ ກີ່ນນາລີ ກໍເຄີຍລົງມາທ່ຽວຫລິ້ນ ບໍລິເວນພູສູງແຫ່ງນີ້ເຊັ່ນດຽວກັນ. ຢູ່ໃກ້ຄຽງ ບໍລິເວນພູສູງແຫ່ງນີ້ກໍຍັງມີໜອງນ້ຳໃຫຍ່ ແຫ່ງໜຶ່ງ ທີ່ນາງ ກີ່ນນາລີ ເຄີຍລົງມາອາບນ້ຳໃນເວລາແດດຮ້ອນ. ຈາກນິທານພື້ນບ້ານດັ່ງກ່າວ ພູສູງໜ່ວຍນີ້ສາມາດເປັນເສັ້ນທາງຂຶ້ນສູ່ເມືອງສະຫວັນຊັ້ນຟ້າ. ດັ່ງນັ້ນ, ຊາວບ້ານຈຶ່ງໃສ່ຊື່ພູໜ່ວຍນີ້ວ່າ ພູຟ້າ. ອີງຕາມເລື່ອງນິທານດັ່ງກ່າວ ໜອງນ້ຳໃຫຍ່ທີ່ກ່າວໃນນິທານນັ້ນ ຍັງປະກົດມີຢູ່ ທີ່ຫລັກຫ້າ ຊື່ງຊາວບ້ານເຄີຍເອີ້ນໜອງນີ້ວ່າ: ໜອງກີ່ນນາລີ ຈົນມາເຖີງປັດຈຸບັນ.

ແນວໃດກໍຕາມ, ຢູ່ເທິງຈອມພູແຫ່ງນີ້ ຍັງມີ “ພະທາດມິ່ງຂວັນພູຟ້າ” ທີ່ເລີ່ມກໍ່ສ້າງໃນວັນທີ 22 ພະຈິກ 2004 ແລະ ສຳເລັດໃນວັນທີ 1 ພຶດສະພາ 2005. ພະທາດນີ້ມີຄວາມຍາວ 15 ແມັດ, ກວ້າງ 15 ແມັດ ແລະ ສູງ 15 ແມັດ ເປັນພະທາດທີ່ໃຫຍ່ທີ່ສຸດສ້າງໄວ້ເທິງຈອມພູຟ້າ. ພະທາດມິ່ງຂວັນຟ້າ ເປັນປູຊະນີຍະສະຖານທີ່ສຳຄັນຂອງແຂວງຜົ້ງສາລີ, ເປັນທີ່ສັກກາລະບູຊາຂອງຊາວພຸດທັງ ຫລາຍ. ໃນທຸກປີ ລະຫວ່າງວັນທີ 3-5 ພຶດສະພາ ປະຊາຊົນຈະພ້ອມໃຈກັນຂຶ້ນໄປສັກກາລະບູຊາ ເພື່ອຂໍພອນ ແລະ ຄວາມເປັນສິລິມົງຄຸນ. ທຸກໆ 4 ປີ ຍັງມີການຈັດບຸນໃຫຍ່ ດ້ວຍພິທີຕັກບາດ, ຍາດນ້ຳ ແລະ ກິດຈະກຳວັດທະນະທຳ ທີ່ສະທ້ອນເຖິງຄວາມສາມັກຄີ ແລະ ຄວາມເລື່ອມໃສໃນພຸດທະສາສະໜາຂອງປະຊາຊົນ. ດ້ວຍຄຸນຄ່າດ້ານທຳມະຊາດ, ປະຫວັດສາດ, ຕຳນານ ແລະ ຄວາມເຊື່ອທາງສາສະໜາ, ພູຟ້າ ຈຶ່ງເປັນມໍລະດົກອັນລ້ຳຄ່າຂອງແຂວງຜົ້ງສາລີ ແລະ ເປັນໜຶ່ງໃນແຫລ່ງທ່ອງທ່ຽວທີ່ສຳຄັນ ທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າໄປທ່ອງຊົມແຫລ່ງທ່ອງທ່ຽວພູຟ້າ ມາກາບໄຫ້ວຂໍພອນ ພະທາດມິ່ງຂວັນພູຟ້າ ແລະ ສຳຜັດຄວາມງາມ ຮຽນຮູ້ຕຳນານອັນຊົງຄຸນຄ່າຂອງດິນແດນແຫ່ງນີ້.