ຂປລ
ມີຫລາຍໂຮງຮຽນໃນທົ່ວເຂດ ເມໂທຣ ມານິລາ(Metro Manila), ຟີລິບປິນ ຕ້ອງປິດໂຮງຮຽນ ຍ້ອນເກີດຝົນຕົກໜັກ ຫລັງຈາກ ໄດ້ຮັບຜົນກະທົບຈາກພາຍຸ ບາວີ(Bavi)ພັດເຂົ້າຢ່າງຮຸນແຮງ.
ຂປລ.ວິທະຍຸກະຈາຍສຽງ ຫວຽດນາມ, ວັນທີ 08 ກໍລະກົດ, ມີຫລາຍໂຮງຮຽນໃນທົ່ວເຂດ ເມໂທຣ ມານິລາ(Metro Manila), ຟີລິບປິນ ຕ້ອງປິດໂຮງຮຽນ ຍ້ອນເກີດຝົນຕົກໜັກ ຫລັງຈາກ ໄດ້ຮັບຜົນກະທົບຈາກພາຍຸ ບາວີ(Bavi)ພັດເຂົ້າຢ່າງຮຸນແຮງ. ພາຍຸລູກໃຫຍ່ Bavi ໄດ້ເຂົ້າເຂດຕິດຕາມຂອງ ຟີລິບປິນ (PAR) ດ້ວຍກຳລັງແຮງລົມໃກ້ຈຸດສູນກາງຂອງພາຍຸຮັກສາຢູ່ລະດັບສູງສຸດ 185 ກິໂລແມັດຕໍ່ຊົ່ວໂມງ ໃກ້ເຂດໃຈກາງຂອງພາຍຸ, ກຳລັງແຮງລົມພັດ ກະໂຊກຂຶ້ນເຖິງ 230 ກິໂລແມັດຕໍ່ຊົ່ວໂມງ. ພາຍຸພວມເຄື່ອນຕົວໄປທາງທິດຕາເວັນຕົກ ດ້ວຍລະດັບຄວາມໄວ 25 ກິໂລແມັດຕໍ່ຊົ່ວໂມງ ໃນ 24 ຊົ່ວໂມງຈະມາເຖິງ, ຫຼັງຈາກນັ້ນຫັນໄປສູ່ທິດຕາເວັນຕົກສ່ຽງເໜືອ, ອາດຈະຫຍັບໃກ້ເຂົ້າເຂດຂົ້ວເໜືອ Luzon ໃນວັນທີ 10 ກໍລະກົດ, ກ່ອນທີ່ຈະມຸ່ງໄປສູ່ເກາະແຫ່ງຕ່າງໆ ຢູ່ພາກໃຕ້ຂອງ ຍີ່ປຸ່ນ ແລະ ເຂດທະເລທາງທິດເໜືອ ໄຕ້ຫວັນ (ຈີນ).ອົງການອຸຕິນິຍົມ, ພູມີສາດຟີຊິກສາດ ແລະ ດາລາສາດ ຟີລິບປິນ (Pagasa) ໄດ້ກ່າວເຕືອນຈະເກີດຝົນຕົກໜັກຢູ່ບາງເຂດຂຶ້ນກັບໝູ່ເກາະ Visayas ແລະ Mindanao. ການເດີນທາງໄປມາຢູ່ທະເລໄດ້ມີຄວາມສ່ຽງສຳລັບເຮືອກ່ຳປັ່ນຂະໜາດໃຫຍ່ທຸກຊະນິດ. ບັນດາລູກເຮືອ ຕ້ອງຊອກຫາບ່ອນຫລົບໄພ ທີ່ປອດໄພ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
