ຂປລ.ວິທະຍຸ ໂທລະພາບ ສູນກາງຈີນ, ປີ 1936, ທ່ານ ​ເອັດ​ກາ ສະ​ໂນ ນັກ​ຂ່າວ​ ສະຫະລັດ ອາ​ເມ​ລິ​ກາ​ ໄດ້​ສະ​ແດງ​ໃຫ້​ເຫັນພາບ​ພົດ ​ຂອງ​ພັກກອມ​ມູ​ນິດ​ຈີນ ​ຕໍ່​ທົ່ວ​ໂລກ ​ໂດຍ​ຜ່ານ​ຕົວ​ໜັງ​ສື ແລະ ​ພາບຖ່າຍ. ຫລັງ​​ຈາກນັ້ນ 90 ປີ​ຕໍ່​ມາ, ຜູ້​ຕອບ​ແບບ​ສອບ​ຖາມ​ 11.521 ຄົນ​ຈາກ 41 ປະ​ເທດ​ໃນທົ່ວ​ໂລກ​ໄດ້​ໃຫ້​ຄຳ​ຕອບ​ຂອງ​ເຂົາ​ເຈົ້າ​ ຜ່ານ​ການ​ສຳ​ຫລວດ​ຄວາມ​ຄິດ​ເຫັນ​ ທີ່​ດຳ​ເນີນ​ໂດຍ​ໂທ​ລະ​ພາບ​ສາ​ກົນ​ຈີນ ຫລື CGTN ຂອງວິ​ທະ​ຍຸ​ໂທ​ລະ​ພາບ​ສູນ​ກາງ​ຈີນ ​ຫລື CMG: “ຜູ້​ນຳ​ທີ່​ເຂັ້ມ​ແຂງ” ແມ່ນ​ຄວາມ​ປະ​ທັບ​ໃຈ​ທີ່​ເລິກ​ເຊິ່ງທີ່​ສຸດ ​ທີ່​​ພວກ​ເຂົາ​ມີ​ຕໍ່ພັກ​ກອມ​ມູ​ນິດ​ຈີນ. ຜົນ​ການ​ສຳ​ຫລວດ ​ສະ​ແດງ​ໃຫ້​ເຫັນ​ວ່າ: ໃນ​ການ​ຕີ​ລາ​ຄາ​ຕໍ່​ ພັກ​ກອມ​ມູ​ນິດ​ຈີນ, ພາບ​ພົດ “ຜູ້​ນຳ​ທີ່​ເຂັ້ມ​ແຂງ” ໄດ້​ຮັບ​ຄະ​ແນນເປັນ​ອັນ​ດັບ​ໜຶ່ງ, “ກຳ​ລັງ​ທີ່​ຕັ້ງ​ໜ້າ​ ໃນ​ການ​ຮັກ​ສາ​ ສະ​ຖຽນ​ລະ​ພາບ​ທົ່ວ​ໂລ​ກ” ແລະ “​ຕົວ​ແທນ​ຜົນ​ປະ​ໂຫຍດ​ຂອງ​ປະ​ເທດ​ພວມ​ພັດ​ທະ​ນາ” ​ໄດ້​ຮັບ​ຄະ​ແນນເປັນ​ອັນ​ດັບ​ສອງ ແລະ ອັນ​ດັບ​ສາມ​ຕາມ​ລຳ​ດັບ. ເມື່ອ​ພິ​ຈາ​ລະ​ນາ​ຕາມ​​ເກ​ນອາ​ຍຸ, ຜູ້​ຕອບ​ແບບ​ສອບ​ຖາມ​ອາ​ຍຸ 18 ຫາ 24 ປີ​ທີ່​ເລືອກ “ຜູ້​ປົກ​ປ້ອງ​ລະ​ບຽບ​ສາ​ກົນ​ທີ່​ເຊື່ອ​ຖື​ໄດ້” ແລະ “ຕົວ​ແທນ​ຜົນ​ປະ​ໂຫຍດ​ຂອງ​ປະ​ເທດ​ພວມ​ພັດ​ທະ​ນາ” ມີ​ອັດ​ຕາ​ສ່ວນ​ສູງ​​ທີ່ສຸດ​ ໃນ​ທຸກ​ກຸ່ມ​ອາ​ຍຸ, ​ສ່ວນ​ຜູ້​ຕອບ​ແບບ​ສອບ​ຖາມ​ອາ​ຍຸ 35 ປີ​ຂຶ້ນ​ໄປ​ທີ່​ເລືອກ “ຜູ້​ນຳ​ທີ່​ເຂັ້ມ​ແຂງ” ກວມ​ເອົາ​ອັດ​ຕາ​ສ່ວນ​ຫລາຍກວ່າ ​ລະ​ດັບ​ສະ​ເລ່ຍ​ຂອງ​ໂລກ. ໃນ​ການ​​ຕີ​ລາ​ຄາ​ລັກ​ສະ​ນະ​ພາບ​ພົດ​ຂອງ​ພັກ​ກອມ​ມູ​ນິດ​ຈີນ, ​ອິດ​ທິ​ພົນ, ​ວິ​ໄສ​ທັດ​ໄລ​ຍະ​ຍາວ ແລະ ​ປະ​ສິດ​ທິ​ພາບ​​ສູງແມ່ນ 3 ຄຳ​ອະ​ທິ​ບາຍ​ທີ່​ມີ​ອັດ​ຕາ​ການ​ເລືອກ​ສູງ​ສຸດ. ການ​ສຳ​ຫລວດ​ຄັ້ງ​ນີ້​ ດຳ​ເນີນ​ໂດຍ​ການ​ຮ່ວມ​ມື​ ລະ​ຫວ່າງ CGTN ກັບ​ມະ​ຫາ​ວິ​ທະ​ຍາ​ໄລ​ປະ​ຊາ​ຊົນ​ຈີນ ​ໂດຍ​ຜ່ານ​ສະ​ຖາ​ບັນ​ຄົ້ນ​ຄວ້າ​ການ​ສື່​ສານ​ສາ​ກົນ​ໃນ​ຍຸກ​ໃໝ່ ໂດຍ​​ມີ ​ຜູ້​ຕອບ​ແບບ​ສອບ​ຖາມ​ ຫລາຍກວ່າ 11.000 ຄົນ​ຈາກ 41 ປະ​ເທດ​​ໃນທົ່ວ​ໂລກ. ຜູ້​ຕອບ​ແບບ​ສອບ​ຖາມ​ ກວມ​ເອົາ​ປະ​ເທດ​ພັດ​ທະ​ນາ​ແລ້ວ ແລະ ປະ​ເທດ​ເຂດ​ໂລກ​ໃຕ້, ເຊິ່ງ​ເປັນ​ປະ​ຊາ​ຊົນ​ທົ່ວ​ໄປ​ ທີ່​ມີ​ອາ​ຍຸ​ເກີນ 18 ປີ, ກຸ່ມ​ຕົວ​ຢ່າງ​ ແມ່ນ​ສອດ​ຄ່ອງ​ກັບ​ ການ​ແບ່ງ​ກຸ່ມ​ຕາມ​ເກນ​ອາ​ຍຸ ແລະ ເພດ​ຂອງ​ປະ​ຊາ​ກອນ​ໃນ​ແຕ່​ລະ​ປະ​ເທດ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL