ຂປລ
ນະຄອນ ໂຮ່ຈີມິນ ຂອງ ສສ ຫວຽດນາມ ໄດ້ຈັດພິທີເລີ່ມລົງມືກໍ່ສ້າງ 8 ກິດຈະກຳ, ໂຄງການຈຸດສຸມ ແນໃສ່ສະເຫລີມສະຫລອງ 50 ປີ ແຫ່ງວັນນະຄອນ ໄຊງ່ອນ - ຢາດິ້ງ ໃສ່ຊື່ປະທານ ໂຮ່ຈີມິນ (2/7/1976 – 2/7/2026).
ຂປລ.ວິທະຍຸ ກະຈາຍສຽງ ຫວຽດນາມ, ວັນທີ 1 ກໍລະກົດ, ນະຄອນ ໂຮ່ຈີມິນ ຂອງ ສສ ຫວຽດນາມ ໄດ້ຈັດພິທີເລີ່ມລົງມືກໍ່ສ້າງ 8 ກິດຈະກຳ, ໂຄງການຈຸດສຸມ ແນໃສ່ສະເຫລີມສະຫລອງ 50 ປີ ແຫ່ງວັນນະຄອນ ໄຊງ່ອນ - ຢາດິ້ງ ໃສ່ຊື່ປະທານ ໂຮ່ຈີມິນ (2/7/1976 – 2/7/2026). ຫລັງຈາກ ພິທີເລີ່ມລົງມືກໍ່ສ້າງ ຖືກຈັດຂຶ້ນຢູ່ ທ່າກ່ຳປັ່ນ ຍ່າຣົ່ງ-ແຄັງໂຮ້ຍ, ບ່ອນທີ່ຕິດພັນກັບຂີດໝາຍ ປະຫວັດສາດ ວັນທີ 5 ມິຖຸນາ 1911, ປະທານ ໂຮ່ຈີມິນ ອອກເດີນທາງໄປຊອກຫາເສັ້ນທາງກູ້ຊາດ. 8 ກິດຈະກຳ, ໂຄງການ ທີ່ໄດ້ເລີ່ມລົງມືກໍ່ສ້າງໃນຄັ້ງນີ້ ລວມມູນຄ່າ ທັງໝົດກວ່າ 253.000 ຕື້ດົ່ງ (ປະມານ 9,6 ຕື້ໂດລາສະຫະລັດ), ໃນນັ້ນ ສ່ວນໃຫຍ່ແມ່ນໄດ້ລະດົມທຶນ ຕາມຮູບແບບ ຄູ່ຮ່ວມມືພາກລັດ ແລະ ພາກເອກະຊົນ (PPP) ແລະ ແຫລ່ງກຳລັງວິສາຫະກິດ ເອກະຊົນ. ເມື່ອກ່າວຄຳເຫັນທີ່ພິທີ, ທ່ານ ຮວ່າງງວຽນຢິງ, ຮອງປະທານ ຄະນະກຳມະການປະຊາຊົນ ນະຄອນ ໂຮ່ຈີມິນ, ເນັ້ນໜັກວ່າ: “ນະຄອນ ໂຮ່ຈີມິນ ສະເໜີ ໃຫ້ບັນດາອົງການ, ຫົວໜ່ວຍ ແລະ ທ້ອງຖິ່ນ ຍົກສູງຈິດໃຈ ຄວາມຮັບຜິດຊອບ ດ້ານການເມືອງສູງສຸດ, ບໍ່ປະໃຫ້ເກີດສະພາວະບ່າຍບ່ຽງ, ຫລີກລ້ຽງ, ຊັກຊ້າ ໃນການແກ້ໄຂລະບຽບ ການບໍລິຫານ ຢ່າງເດັດຂາດ. ເຈົ້າຂອງການລົງທຶນ, ບໍລິສັດໃຫ້ຄຳປຶກາສາ ແລະ ຜູ້ຮັບເໝົາກໍ່ສ້າງ ຕ້ອງສຸມທຸກແຫລ່ງກຳລັງ ແລະ ເຄື່ອງອຸປະກອນ ທີ່ທັນສະໄໝ, ຈັດຕັ້ງການກໍ່ສ້າງຢ່າງມີວິທະຍາສາດ, ຮັບປະກັນຄວາມຄືບໜ້າ, ຄຸນນະພາບ ແລະ ຄວາມປອດໄພ”./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
