ຂປລ
ລະຫວ່າງ ເດືອນມັງກອນ ຫາເດືອນພຶດສະພາປີນີ້, ຍອດມູນຄ່າ ການຈໍລະຈອນສິນຄ້າ ໃນສັງຄົມທົ່ວປະເທດຈີນ ມີເຖິງ 146.600 ຕື້ຢວນ, ເພີ່ມຂຶ້ນ 5,2% ເມື່ອທຽບໃສ່ປີກາຍ.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 28 ມິຖຸນານີ້, ສະຫະພັນ ການຈໍລະຈອນ ສິນຄ້າ ແລະ ການຈັດຊື້ຂອງ ສປ ຈີນ ໄດ້ເປີດເຜີຍໃຫ້ຮູ້ວ່າ: ລະຫວ່າງ ເດືອນມັງກອນ ຫາເດືອນພຶດສະພາປີນີ້, ຍອດມູນຄ່າ ການຈໍລະຈອນສິນຄ້າ ໃນສັງຄົມທົ່ວປະເທດຈີນ ມີເຖິງ 146.600 ຕື້ຢວນ, ເພີ່ມຂຶ້ນ 5,2% ເມື່ອທຽບໃສ່ປີກາຍ. ຄວາມຕ້ອງການດ້ານການຈໍລະຈອນສິນຄ້າ ຂອງຂົງເຂດອຸດສາຫະກຳ ການຜະລິດລະດັບສູງສືບຕໍ່ເພີ່ມຂຶ້ນ ຢ່າງວ່ອງໄວ. ໃນເດືອນພຶດສະພາແລ້ວນີ້, ຄວາມຕ້ອງການດ້ານການຈໍລະຈອນສິນຄ້າ ຂອງອຸດສາຫະກຳ ການຜະລິດເຕັກໂນໂລຊີສູງ ແລະ ອຸດສາຫະກຳການຜະລິດ ອຸປະກອນຕ່າງ ໄດ້ເພີ່ມຂຶ້ນ 15,1% ແລະ 9,5% ເມື່ອທຽບໃສ່ປີກາຍ. ນອກນີ້, ການຈໍລະຈອນສິນຄ້າ ອຸປະໂພກ-ບໍລິໂພກ ຂອງປະຊາຊົນ ສືບຕໍ່ມີຄວາມເຂັ້ມແຂງໂດຍລວມ, ຮູບແບບອຸດສາຫະກຳໃໝ່ ແລະ ຮູບແບບທຸລະກິດໃໝ່ ໄດ້ເພີ່ມພະລັງແຮງຂັບເຄື່ອນ ຢ່າງຕໍ່ເນື່ອງ ເຂົ້າໃນການເຕີບໂຕຂອງຄວາມຕ້ອງການດ້ານການຈໍລະຈອນສິນຄ້າ ທີ່ກ່ຽວກັບຊີວິດ ການເປັນຢູ່ຂອງປະຊາຊົນ. ລະຫວ່າງ ເດືອນມັງກອນຫາເດືອນພຶດສະພາປີນີ້, ຍອດມູນຄ່າການຂາຍຍ່ອຍ ດ້ານການຄ້າເອເລັກໂຕຣນິກ ແບບຖ່າຍທອດສົດ ຫລື ໄລ້ສົດ ໄດ້ເພີ່ມຂຶ້ນ 6,9%, ຈັງຫວະການເຕີບໂຕສູງກວ່າ ເດືອນມັງກອນ ຫາເດືອນເມສາ 0,2%./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
