ຂປລ.  ໃຫ້ກຽດເຂ້ົາຮ່ວມໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ສ່ິງແວດລ້ອມ, ມີຮອງລັດຖະມົນຕີບັນດາປະເທດອະນຸພາກພ້ືນແມ່ນ້ໍາຂອງ, ຮອງເລຂາທິການໃຫຍ່ອາຊຽນ, ຮອງລັດຖະມົນຕີຈາກກະຊວງທີ່ກ່ຽວຂ້ອງ, ທູຕານຸທູດ, ພ້ອມດ້ວຍບັນດາຜູ້ຕາງໜ້າຄູ່ຮ່ວມພັດທະນາ ແລະ ອົງການຈັດຕັ້ງສາກົນເຂົ້າຮ່ວມ.

     ກອງປະຊຸມຄ້ັງນ້ີ, ໄດ້ທົບທວນ ຄືນການຈັດຕ້ັງປະຕິບັດແຜນດໍາເນີນງານຊຽງຣາຍ ສະບັບປີ 2017,  ປຶກສາຫາລືຂອບການຮ່ວມມືກ່ຽວ ກັບການຄວບຄຸມໄຟໄໝ້ລາມປ່າ ແລະ ມົນລະພິດໝອກຄວັນຂ້າມຜ່ານຊາຍແດນລະຫວ່າງບັນດາປະເທດສະມາຊິກອະນຸພາກພື້ນ ແມ່ນໍ້າຂອງຮ່ວມກັບບັນດາຄູ່ຮ່ວມພັດທະນາຄົ້ນຄວ້າພິຈາລະນາ ແລະ ເປັນເອກະພາບຮ່ວມກັນຕໍ່ກັບບັນດາຫົວຂໍ້ ແລະ ເອກະສານຕ່າງໆທີ່ຈະນໍາໄປປຶກສາຫາລືໃນກອງປະຊຸມ ລັດພາຄີຕໍ່ສັນຍາອາຊຽນວ່າດ້ວຍມົນລະພິດໝອກຄວັນຂ້າມຜ່ານຊາຍແດນ ຄັ້ງທີ 21 ຈະຖືກຈັດຂຶ້ນທ່ີ ສສ ຫວຽດນາມ ໃນທ້າຍປີ 2026. ໃນພິທີ ທ່ານ ລິນຄຳ ດວງສະຫວັນ ໄດ້ໃຫ້ຮູ້ວ່າ: ຄະນະກໍາມະການຂ້ັນ ລັດຖະມົນຕີດ້ານມົນລະພິດໝອກຄວັນຂ້າມຜ່ານຊາຍແດນໃນຂົງເຂດອະນຸພາກພ້ືນແມ່ນ້ໍາຂອງ ໄດ້ສ້າງຕ້ັງຂ້ຶນພາຍໃຕ້ສັນຍາອາຊຽນ ວ່າດ້ວຍມົນລະພິດໝອກຄວັນຂ້າມຜ່ານຊາຍແດນ ໃນປີ 2002 ມີ 5 ປະເທດສະມາຊິກອາຊຽນຄືລາຊະອານາຈັກກໍາປູເຈຍ, ສປປ ລາວ, ສະຫະພາບມຽນມາ, ລາຊະອານາຈັກໄທ ແລະ ສສ ຫວຽດນາມ. ປັດຈຸບັນ, ກໍາລັງຈັດຕັ້ງປະຕິບັດໂຄງການ ເພື່ອແກ້ໄຂບັນຫາມົນລະພິດໝອກຄວັນຂ້າມຜ່ານຊາຍແດນຮ່ວມກັນ ໂດຍໄດ້ຮັບການສະໜັບສະໜູນຈາກບັນດາຄູ່ຮ່ວມພັດທະນາເປັນຕົ້ນໂຄງການກ່ຽວກັບການຄຸ້ມຄອງໄຟປ່າ ແລະ ດິນຖ່ານຕົມ, ໂຄງການສ່ົງເສີມການຈັດຕັ້ງປະຕິບັດການລົງທຶນໃນການຄຸ້ມຄອງທີ່ດິນທີ່ປາສະຈາກໝອກຄວັນ ແລະ ໂຄງການອື່ນໆ.

    ໂອກາດນ້ີ, ທ່ານ ສອນໄຊ ສີພັນດອນ ໄດ້ຍົກໃຫ້ເຫັນຄວາມສຳຄັນຂອງການຮ່ວມມືພາຍໃຕ້ສັນຍາອາຊຽນວ່າດ້ວຍມົນລະພິດໝອກຄວັນຂ້າມຜ່ານຊາຍແດນ  ປີ 2002 ຊຶ່ງເປັນກົນໄກຍຸດທະສາດສຳຄັນໃນການຊ່ວຍປົກປ້ອງຊັບພະຍາກອນທຳມະຊາດ, ສຸຂະ ພາບຂອງປະຊາຊົນ ແລະ ຊີວະນາໆພັນໃນເຂດອະນຸພາກພື້ນແມ່ນ້ຳຂອງທີ່ພວມຜະເຊີນກັບໄພຂົ່ມຂູ່ຈາກບັນຫາໄຟໄໝ້ລາມປ່າ,  ພ້ອມທັງເນັ້ນເຖິງຄວາມມຸ່ງໝັ້ນຂອງ ສປປ ລາວ ທີ່ຈະສືບຕໍ່ຜັນຂະຫຍາຍ ແລະ ປະຕິບັດຕາມແຜນດຳເນີນງານຊຽງຣາຍ 2017 ຢ່າງເຂັ້ມງວດ, ໄປຄຽງຄູ່ກັບການຈັດຕັ້ງປະຕິບັດກົດໝາຍວ່າດ້ວຍການປົກປັກຮັກສາສິ່ງແວດລ້ອມ ແລະ ກົດໝາຍວ່າດ້ວຍປ່າໄມ້ຢ່າງຮອບດ້ານ ເພື່ອຄວບຄຸມການຈູດໃນພື້ນທີ່ກະສິກຳ ແລະ ຫລຸດຜ່ອນຈຸດຄວາມຮ້ອນໃຫ້ໄດ້ຕາມຄາດໝາຍ, ພ້ອມນີ້ຍັງໄດ້ຮຽກຮ້ອງມາຍັງບັນດາປະເທດອານຸພາກພ້ືນແມ່ນ້ໍາຂອງ, ຄູ່ຮ່ວມພັດທະນາ ແລະ ອົງການຈັດຕັ້ງສາກົນ ສືບຕໍ່ໃຫ້ການສະໜັບສະໜູນທາງດ້ານເຕັກໂນໂລຊີທ່ີທັນສະໄໝ ແລະ ເຕັກນິກວິຊາການໃນການຜະລິດກະສິກຳແບບຍືນຍົງ, ລວມທັງລະບົບເຝົ້າລະວັງມົນລະພິດທາງອາກາດ ເພື່ອຮ່ວມກັນຫັນເອົານະໂຍບາຍໄປສູ່ການປະຕິບັດຕົວຈິງ ແລະ ບັນລຸວິໄສທັດ “ອາຊຽນປາສະຈາກມົນລະພິດໝອກຄວັນໃນປີ 2030” ຢ່າງໝັ້ນຄົງ.

KPL