ຂປລ
ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: ປີນີ້ແມ່ນປີເຊັນ “ສົນທິສັນຍາວ່າດ້ວຍການເປັນບ້ານໃກ້ ເຮືອນຄຽງທີ່ດີ ແລະ ການຮ່ວມມື ມິດຕະພາບຈີນ-ຣັດເຊຍ”.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 20 ພຶດສະພານີ້, ຢູ່ນະຄອນຫລວງປັກກິ່ງຂອງຈີນ, ທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ວະລາດິເມຍ ປູຕິນ ປະທານາທິບໍດີ ຣັດເຊຍ ໄດ້ຮ່ວມກັນ ເປັນປະທານ ຈັດກອງປະຊຸມຖະແຫຼງຂ່າວ ຫລັງຈາກ ສຳເລັດການພົບປະກັນ.ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: ປີນີ້ແມ່ນປີເຊັນ “ສົນທິສັນຍາວ່າດ້ວຍການເປັນບ້ານໃກ້ ເຮືອນຄຽງທີ່ດີ ແລະ ການຮ່ວມມື ມິດຕະພາບຈີນ-ຣັດເຊຍ”. ຫລາຍປີຜ່ານມາ, ສອງປະເທດໄດ້ປະຕິບັດຕາມຫລັກການ “ບໍ່ຮ່ວມກຸ່ມ, ບໍ່ເປັນປໍລະປັກ ແລະ ບໍ່ແນໃສ່ຝ່າຍທີ 3” ທີ່ລະບຸໄວ້ ໃນສົນທິສັນຍາດັ່ງກ່າວຢ່າງສະເໝີຕົ້ນສະເໝີປາຍ, ຍຶດໝັ້ນຄວາມສະເໝີພາບກັນ, ເຄົາລົບ ເຊິ່ງກັນ ແລະ ກັນ, ຍຶດໝັ້ນຄວາມໄວ້ເນື້ອ ເຊື່ອໃຈກັນ ແລະ ຮ່ວມມືກັນ ແບບຕ່າງຝ່າຍ ຕ່າງໄດ້ຮັບຜົນປະໂຫຍດ, ໄດ້ປະກອບສ່ວນ ອັນສຳຄັນ ເຂົ້າໃນການປົກປ້ອງ ຄວາມຍຸຕິທຳ ແລະ ຄວາມເປັນທຳສາກົນ ແລະ ຊຸກຍູ້ການສ້າງການພົວພັນ ສາກົນແບບໃໝ່ ເຊິ່ງກາຍເປັນປັດໄຈ ແນ່ນອນທີ່ສຳຄັນໃນສະພາບການປ່ຽນແປງຂອງໂລກ ໃນຮອບຮ້ອຍປີ. ທ່ານ ວະລາດິເມຍ ປູຕິນ ກ່າວວ່າ: “ປັດຈຸບັນ, ການພົວພັນລະຫວ່າງ ຣັດເຊຍ- ສປ ຈີນ ໄດ້ກ້າວຂຶ້ນສູ່ລະດັບສູງ ທີ່ບໍ່ເຄີຍມີມາກ່ອນ ແລະ ຂະຫຍາຍຕົວ ຢ່າງຕໍ່ເນື່ອງ, ການພົວພັນລະຫວ່າງສອງປະເທດ ແມ່ນອິດສະຫລະ ແລະ ເປັນເຈົ້າຕົນເອງ, ບໍ່ໄດ້ຮັບຜົນກະທົບ ຈາກສະຖານະການສາກົນ ໃນປັດຈຸບັນ. ສາມາດຖືເປັນແບບຢ່າງ ແຫ່ງການພົວພັນ ລະຫວ່າງ ປະເທດ ແລະ ລະຫວ່າງ ຊົນຊາດ. ຣັດເຊຍ ແລະ ສປ ຈີນ ຈະຮັກສາ ການປະສານງານ ທາງຍຸດທະສາດ ຢ່າງແໜ້ນແຟ້ນ ໃນເວທີສາກົນ, ຮ່ວມກັນປົກປ້ອງຫລັກໝັ້ນ ແລະ ຫລັກການຂອງກົດບັດສະຫະປະຊາຊາດ ພ້ອມທັງຮ່ວມກັນ ປົກປັກຮັກສາ ຄວາມໝັ້ນຄົງ ແລະ ສະຖຽນລະພາບ ຂອງທົ່ວໂລກ.”/.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
