ຂປລ
ຖານຂໍ້ມູນ ທຸລະກິດ ການຄ້າຈີນ-ອາຊຽນ ໄດ້ເປີດຕົວ ຢ່າງເປັນທາງການຢູ່ນະຄອນໜານໜິງ ເຂດກວາງຊີ ຂອງ ສປ ຈີນ.ຖານຂໍ້ມູນດັ່ງກ່າວ ແມ່ນເວທີສະໜອງ ຂໍ້ມູນສັງລວມ ກ່ຽວກັບການຮ່ວມມື ດ້ານເສດຖະກິດການຄ້າຈີນ-ອາຊຽນ ແລະ ເປັນເວທີເຜີຍແຜ່ ຂໍ້ມູນໄປສູ່ໂລກ
.png)
ຂປລ.ວິທະຍຸ ໂທລະພາບ ສູນກາງຈີນ, ເມື່ອບໍ່ດົນມານີ້, ຖານຂໍ້ມູນ ທຸລະກິດ ການຄ້າຈີນ-ອາຊຽນ ໄດ້ເປີດຕົວ ຢ່າງເປັນທາງການຢູ່ນະຄອນໜານໜິງ ເຂດກວາງຊີ ຂອງ ສປ ຈີນ.ຖານຂໍ້ມູນດັ່ງກ່າວ ແມ່ນເວທີສະໜອງ ຂໍ້ມູນສັງລວມ ກ່ຽວກັບການຮ່ວມມື ດ້ານເສດຖະກິດການຄ້າຈີນ-ອາຊຽນ ແລະ ເປັນເວທີເຜີຍແຜ່ ຂໍ້ມູນໄປສູ່ໂລກ, ສຸມໃສ່ໃຫ້ການບໍລິການຂໍ້ມູນຂ່າວສານ ດ້ານທຸລະກິດການຄ້າ ໃຫ້ແກ່ ພາກສ່ວນທຸລະກິດການຄ້າ, ສະມາຄົມ, ຊາວຈີນຕ່າງດ້າວ, ຊາວຕ່າງປະເທດເຊື້ອສາຍຈີນ ແລະ ວິສາຫະກິດຂ້າມຊາດຕ່າງໆ. ປັດຈຸບັນ, ຖານຂໍ້ມູນດັ່ງກ່າວ ໄດ້ສ້າງຊ່ອງທາງເຜີຍແຜ່ ຂໍ້ມູນດ້ານທຸລະກິດ ການຄ້າທີ່ກວມເອົາຫລາຍປະເທດ ເຊິ່ງລວມທັງ ການອະທິບາຍ ນະໂຍບາຍ, ສະພາບການຕະຫລາດ, ການດຶງດູດການລົງທຶນ, ການຈັບຄູ່ການຮ່ວມມື, ການວິເຄາະ ອຸດສາຫະກຳ ແລະ ອື່ນໆ. ເຈົ້າໜ້າທີ່ກົງສຸນ ຂອງປະເທດສະມາຊິກອາຊຽນ ປະຈຳນະຄອນໜານໜິງກ່າວວ່າ: ການເປີດຖານຂໍ້ມູນດັ່ງກ່າວ ຈະເປີດກວ້າງຂົງເຂດ ການຮ່ວມມື ລະຫວ່າງ ສປ ຈີນ-ອາຊຽນຕື່ມອີກ, ເພີ່ມທະວີ ການແລກປ່ຽນ ດ້ານເສດຖະກິດການຄ້າ ລະຫວ່າງ ສອງຝ່າຍ, ຍົກລະດັບອຸດສາຫະກຳ ແລະ ໄດ້ສ້າງຂົວແຫ່ງຂໍ້ມູນຂ່າວສານ ທີ່ສຳຄັນ ເພື່ອເຮັດໃຫ້ສອງຝ່າຍ ສາມາດບັນລຸການຮ່ວມມື ແບບຕ່າງຝ່າຍຕ່າງໄດ້ຮັບຜົນປະໂຫຍດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
