ຂປລ
ຂປລ. ເມືອງວັງວຽງ ແຂວງວຽງຈັນ ເປັນເມືອງທ່ອງທ່ຽວທີ່ມີຊື່ສຽງ ໂດດເດັ່ນດ້ວຍພູມສັນຖານພູຫີນປູນ, ແມ່ນ້ຳ ແລະ ຖ້ຳທຳມະຊາດທີ່ສວຍງາມຈົນໄດ້ຮັບສາຍານາມວ່າ: “ກຸ້ຍຫລິນເມືອງລາວ”. ເມືອງວັງວຽງມີມູນເຊື້ອປະຫວັດສາດ ວັດທະນະທຳອັນເກົ່າແກ່ທີ່ໜ້າສົນໃຈ, ພູມີປະເທດສ່ວນໃຫຍ່ເຕັມໄປດ້ວຍປ່າໄມ້ ແລະ ພູຂຽວອຸ່ນທຸ່ມ
ຂປລ. ເມືອງວັງວຽງ ແຂວງວຽງຈັນ ເປັນເມືອງທ່ອງທ່ຽວທີ່ມີຊື່ສຽງ ໂດດເດັ່ນດ້ວຍພູມສັນຖານພູຫີນປູນ, ແມ່ນ້ຳ ແລະ ຖ້ຳທຳມະຊາດທີ່ສວຍງາມຈົນໄດ້ຮັບສາຍານາມວ່າ: “ກຸ້ຍຫລິນເມືອງລາວ”. ເມືອງວັງວຽງມີມູນເຊື້ອປະຫວັດສາດ ວັດທະນະທຳອັນເກົ່າແກ່ທີ່ໜ້າສົນໃຈ, ພູມີປະເທດສ່ວນໃຫຍ່ເຕັມໄປດ້ວຍປ່າໄມ້ ແລະ ພູຂຽວອຸ່ນທຸ່ມ, ມີແຫລ່ງນ້ຳທຳມະຊາດຫລາຍສາຍ, ມີນ້ຳຕົກຕາດຫລາຍແຫ່ງ, ພິເສດແມ່ນນ້ຳຊອງໄຫລຜ່ານຕະຫລອດປີ ແລະ ຫລໍ່ລ້ຽງຊີວິດຊາວເມືອງວັງວຽງມາແຕ່ດຶກດຳບັນ, ການດຳລົງຊີວິດຂອງປະຊາຊົນ ຍັງຮັກສາໄດ້ວິຖີຊີວິດ ແລະ ຮີດຄອງປະເພນີ, ວັດທະນະທຳອັນດີງາມ ແລະ ໄດ້ກາຍເປັນສິ່ງທີ່ສ້າງຄວາມສົນໃຈແກ່ນັກທ່ອງທ່ຽວ ທັງພາຍໃນ ແລະ ຕ່າງ ປະເທດ ຢາກໄປສຳຜັດ ແລະ ສຶກສາປະຫວັດສາດອັນຂຶ້ນຊືື່ລືນາມດັ່ງກ່າວ.
ຖ້ຳຈັງ ເປັນໜຶ່ງໃນສະຖານທີ່ທ່ອງທ່ຽວທາງທຳມະຊາດ ແລະ ປະຫວັດສາດທີ່ໂດດເດັ່ນທີ່ສຸດຂອງເມືອງວັງວຽງ ຕັ້ງຢູ່ຝັ່ງຕາເວັນຕົກຂອງແມ່ນຳ້ຊອງ . ຖ້ຳແຫ່ງນີ້ໄດ້ຮັບການພັດທະນາໃຫ້ເປັນແຫລ່ງທ່ອງທ່ຽວແບບອະນຸລັກ ແລະ ຍັງເປັນຈຸດໝາຍປາຍທາງຍອດນິຍົມຂອງນັກທ່ອງທ່ຽວ, ດ້ວຍຄວາມໂດດເດັ່ນ ແລະ ລັກສະນະພິເສດຂອງຖ້ຳເຮັດໃຫ້ນັກທ່ອງທ່ຽວຢາກຂຶ້ນໄປສຳຜັດບັນຍາກາດອັນສວຍສົດງົດງາມ, ມີຈຸດຊົມທິວທັດມູນສູງ 360 ອົງສາ ເມື່ອເຮົາຍ່າງຂຶ້ນຂັ້ນໄດຄອນກຣີດ150 ກວ່າຂັ້ນໄປຮອດປາກຖ້ຳຈະມີຈຸດຊົມທິວທັດທີ່ສາມາດ ແນນເຫັນທັດສະນີຍະພາບຕົວເມືອງວັງວຽງ, ທົ່ງນາ, ພູຜາປ່າໄມ້ ແລະ ແມ່ນ້ຳຊອງໄດ້ຢ່າງກວ້າງຂວາງ. ນອກນັ້ນພາຍໃນຖ້ຳ ມີແກສລົມເຢັນພັດຜ່ານຕະຫລອດເວລາ ເຮັດໃຫ້ມີອາກາດເຢັນສະບາຍຄືກັບຫ້ອງແອທຳມະຊາດ ເຖິງວ່າສະພາບອາກາດພາຍນອກຈະຮ້ອນອົບເອົ້າກໍຕາມ,ພ້ອມນັ້ນພາຍໃນຖ້ຳ ຍັງມີສິ່ງອຳນວຍຄວາມສະດວກຫລາຍດ້ານເປັນຕົ້ນ, ມີການຈັດສັນເສັ້ນທາງຍ່າງຄອນກຣີດ ແລະ ຕິດໄຟແສງສີຢ່າງເປັນລະບຽບຕາມແຕ່ລະຈຸດ ເຮັດໃຫ້ສາມາດຍ່າງຊົມຄວາມງົດງາມໄດ້ຢ່າງປອດໄພ ແລະ ເຫັນລາຍລະອຽດຂອງຫີນໄດ້ຊັດເຈນ ອັນໄດ້ສ້າງຄວາມປະທັບໃຈໃຫ້ກັບແຂກຄົນທີ່ເຂົ້າໄປຢ້ຽມຊົມໂດຍສະເພາະແມ່ນເວລາແນບເຫັນແສງໄຟກະທົບໃສ່ກັບຫີນງອກຫີນຍ້ອມທີ່ເຫລື້ອລະຫຍິບລະຫຍັບເໝືອນເພັດພອຍທີ່ໜ້າອັດສະຈັນ. ສຳລັບຢູ່ບໍລິເວນຕີນພູທາງເຂົ້າຖ້ຳ ມີບໍ່ນ້ຳທຳມະຊາດທີ່ໄຫລອອກມາຈາກພາຍໃນຖ້ຳ ກາຍເປັນສະນ້ຳຂະໜາດນ້ອຍທີ່ມີນ້ຳໃສສະອາດສີຟ້າອົມຂຽວ ເຊິ່ງນັກທ່ອງທ່ຽວສາມາດລົງຫລິ້ນໄດ້.
ເຖິງແນວໃດກໍຕາມ, ຖ້ຳຈັງຍັງມີປະຫວັດຄວາມເປັນມາດັ່ງນີ້: ຄຳວ່າ “ຈັງ” ໝາຍເຖິງຄວາມເຢັນຈົນແຂງ ຫລື ຂາແຂງຍ່າງບໍ່ອອກ. ໃນອະດີດ ຊາວບ້ານທີ່ໄດ້ລົງໄປອາບນ້ຳຢູ່ປາກຖ້ຳ ຈະຮູ້ສຶກເຢັນຫລາຍຈົນຂາຊາ ແລະ ແຂງ. ນອກຈາກນັ້ນ. ຖ້ຳແຫ່ງນີ້ ໃນຕົ້ນສະຕະວັດທີ 19 ຍັງໃຊ້ເປັນບ່ອນຫລົບຊ້ອນຫລີ້ໄພຂອງຊາວບ້ານຈາກການຮຸກຮານຂອງພວກຫໍ້. ຕໍ່ມາໃນປາງສົງຄາມ ຊາວບ້ານກໍໄດ້ຍົກຍ້າຍມາຕັ້ງຖິ່ນຖານ ແລະ ຫລົບໄພຢູ່ທີ່ນີ້ ເພາະເປັນຈຸດສູງທີ່ສາມາດເບິ່ງເຫັນການເຄື່ອນໄຫວໄດ້ທົ່ວເມືອງວັງວຽງ.
KPL
