ຂປລ
ກອງປະຊຸມ ຄັ້ງປະຖົມມະເລິກ, ສະພາແຫ່ງຊາດ ຫວຽດນາມ ຊຸດທີ 16 ໄດ້ໄຂຂຶ້ນຢ່າງສົມກຽດ ໃນຕອນເຊົ້າວັນທີ 06 ເມສາ, ຢູ່ຫໍສະພາແຫ່ງຊາດ, ທີ່ນະຄອນຫລວງ ຮ່າໂນ້ຍ.
ຂປລ. ວິທະຍຸກະຈາຍສຽງ ຫວຽດນາມ: ກອງປະຊຸມ ຄັ້ງປະຖົມມະເລິກ, ສະພາແຫ່ງຊາດ ຫວຽດນາມ ຊຸດທີ 16 ໄດ້ໄຂຂຶ້ນຢ່າງສົມກຽດ ໃນຕອນເຊົ້າວັນທີ 06 ເມສາ, ຢູ່ຫໍສະພາແຫ່ງຊາດ, ທີ່ນະຄອນຫລວງ ຮ່າໂນ້ຍ. ໂດຍເຂົ້າຮ່ວມ ວາລະໄຂ ລວມມີ ທ່ານ ໂຕເລິມ, ເລຂາທິການໃຫຍ່ ຄະນະບໍລິຫານງານ ສູນກາງພັກ ກອມມູນິດ ຫວຽດນາມ; ທ່ານ ເລືອງເກື່ອງ ປະທານ ປະເທດ; ທ່ານ ຟ້າມມິນຈິງ ນາຍົກ ລັດຖະມົນຕີ; ທ່ານ ເຈິ່ນເກິມຕູ ຜູ້ປະຈຳການ ຄະນະເລຂາ ສູນກາງພັກ; ຜູ້ຕາງໜ້າບັນດາ ຄະນະທູດ ຕານຸທູດ, ບັນດາ ອົງການ ຈັດຕັ້ງສາກົນ ພ້ອມກັບ ສະມາຊິກ ສະພາແຫ່ງຊາດ ຊຸດທີ 16 ຈໍານວນ 500 ທ່ານ.
ທ່ານປະທານ ສະພາແຫ່ງຊາດ ເຈິ່ນແທັງເໝີ້ນ ກ່າວຄຳເຫັນ ໄຂກອງປະຊຸມ, ໂດຍຊີ້ແຈງວ່າ ການເລືອກຕັ້ງ ສະມາຊິກ ສະພາແຫ່ງຊາດ ຊຸດທີ 16 ແລະ ສະມາຊິກສະພາ ປະຊາຊົນທຸກຂັ້ນ ທີ່ມີ ອາຍຸການ ໃນໄລຍະ 2026-2031 ຜ່ານມາ ໄດ້ບັນລຸຜົນສຳເລັດ ຢ່າງຈົບງາມ. ໝາກຜົນ ການເລືອກຕັ້ງ ໄດ້ສືບຕໍ່ຢືນຢັນ ຄວາມໄວ້ເນື້ອເຊື່ອໃຈ ຂອງ ປະຊາຊົນ ທີ່ມີຕໍ່ພັກ-ລັດ.
ບັນດາ ເນື້ອໃນຕົ້ນຕໍ ຂອງ ກອງປະຊຸມ ໃນຄັ້ງນີ້, ທ່ານ ເຈິ່ນແທັງເໝີ້ນ ໃຫ້ຮູ້ວ່າ: “ສະພາແຫ່ງຊາດ ໄດ້ພິຈາລະນາ, ຕົກລົງສ້າງ ໂຄງປະກອບ ການຈັດຕັ້ງ ແລະ ໃຫ້ສັດຕະຍາບັນ ບຸກຄະລາກອນ ຂັ້ນສູງ ຂອງ ກົງຈັກລັດ. ນີ້ແມ່ນເນື້ອໃນ ຈຸດສຸມ ຂອງ ກອງປະຊຸມ, ທີ່ມີຄວາມໝາຍສຳຄັນ, ຕັດສິນໂດຍກົງເຖິງ ຄຸນນະພາບ, ປະສິດທິຜົນ ການເຄື່ອນໄຫວ ຂອງ ກົງຈັກລັດ ໃນທັງອາຍຸການ.
ສະພາ ແຫ່ງຊາດ ໄດ້ພິຈາລະນາ, ຮັບຮອງເອົາ ກົດໝາຍ 8 ສະບັບແລະມະຕິ ກຳນົດກົດໝາຍ 1 ສະບັບ, ສະຕິກ່ຽວກັບ ໂຄງການ ຕິດຕາມ ກວດກາ ຂອງ ສະພາແຫ່ງຊາດ ປີ 2027, ມະຕິກ່ຽວກັບ ການຕິດຕາມ ຫົວເລື່ອງ ສະເພາະ ຂອງ ສະພາແຫ່ງຊາດ ແລະ ມະຕິລວມ ຂອງ ກອງປະຊຸມ ຄັ້ງປະຖົມມະເລິກ, ສະພາແຫ່ງຊາດ ຫວຽດນາມ ຊຸດທີ 16”.
ຈາກນັ້ນ, ທ່ານເລຂາທິການໃຫຍ່ ໂຕເລິມ ມີບົດກ່າວປາໄສ ສຳຄັນ ຕໍ່ໜ້າສະພາ ແຫ່ງຊາດ, ປະຊາຊົນ, ຜູ້ມີສິດເລືອກຕັ້ງ ໃນທົ່ວປະເທດ. ຄຽງຄູກັນນັ້ນ, ທ່ານ ຍັງໄດ້ເນັ້ນໜັກວ່າ ນີ້ແມ່ນກອງປະຊຸມ ບູລະນະ ການຈັດຕັ້ງ ກົງຈັກລັດ ຕາມລັດຖະທຳມະນູນ; ພ້ອມກັນນັ້ນ ກອງປະຊຸມກໍສຸມໃສ່ ຫັນມະຕິ ກອງປະຊຸມໃຫຍ່ ຜູ້ແທນ ທົ່ວປະເທດ ຄັ້ງທີ 14 ຂອງ ພັກກອມມູນິດ ຫວຽດນາມ ເປັນລະບອບ ລະບຽບການ; ສ້າງພື້ນຖານ ນິຕິກຳ, ລະບອບ ແລະ ກຳລັງໜູນ ນະໂຍບາຍ ເພື່ອໃຫ້ປະເທດຊາດ ກ້າວເຂົ້າສູ່ ໄລຍະພັດທະນາໃໝ່. ນອກຈາກນັ້ນ, ກອງປະຊຸມ ໃນຄັ້ງນີ້ ຍັງຄາດວ່າ, ຈະໃຊ້ເວລາເຮັດວຽກ ປະມານ 11 ວັນ./
KPL
