ຂປລ.ສະຖານທູດລາວ ປະຈໍາປັກກິ່ງ ຈັດກິດຈະກໍາແຂ່ງຂັນກິລາມິດຕະພາບຕີດອກປີກໄກ່  ແລະ ກິລາປິ່ນອ້ອມອື່ນໆຂຶ້ນໃນວັນທີ 22 ມີນາ 2026 ເນື່ອງໃນໂອກາດສະຫລອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 71 ປີ (22 ມີນາ 1955-22 ມີນາ 2026), ວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ ທີ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນໂດຍໃຫ້ກຽດເຂົ້າຮ່ວມຂອງ ທ່ານ ສົມພອນ ສີຈະເລີນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ ພ້ອມດ້ວຍບັນດາຄະນະນໍາ, ຊ່ຽວຊານສື່ມວນຊົນ ຈີນ-ລາວ ປະຈໍາປັກກິ່ງ, ພະນັກງານ ແລະ ນັກຮຽນ-ນັກສຶກ ສາທີ່ຮໍ່າຮຽນຢູ່ປັກກິ່ງເຂົ້າຮ່ວມຢ່າງຟົດຟື້ນ. 

ການແຂ່ງຂັນກິລາຕີດອກປີກໄກ່ຄັ້ງນີ້ປະກອບມີ 3 ທີມເຂົ້າຮ່ວມຄື: ສະຖານທູດ, ສື່ມວນຊົນວິທະຍຸໂທລະພາບສູນກາງຈີນ (CMG) ແລະ ນັກຮຽນ-ນັກສຶກສາພາຍໃນປັກກິ່ງ, ຜົນປະກົດວ່າ, ທາງຝ່າຍຊ່ຽວຊານສື່ມວນຊົນວິທະຍຸໂທລະ ພາບສູນກາງຈີນ ສາມາດຄວ້າລາງວັນທີ 1 ຕີດອກປີກໄກ່ມາຄອງ.  ໃນໂອກາດດັ່ງກ່າວນີ້, ທ່ານ ສົມພອນ ສີຈະເລີນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ ກໍໃຫ້ກຽດຂຶ້ນມອບລາງວັນ ແລະ ກ່າວຄໍາເຫັນບາງເນື້ອໃນ ສໍາຄັນເຖິງຄວາມໝາຍ, ຄວາມສຳຄັນ ແລະ ມູນເຊື້ອແຫ່ງການເຕີບໃຫຍ່ຂະຫຍາຍຕົວ, ບັນດາຜົນສຳເລັດທີ່ຍາດມາໄດ້ຕະຫລອດໄລຍະ 71 ປີຜ່ານມາ ພາຍໃຕ້ການນຳພາ-ຊີ້ນໍາ ຂອງພັກປະຊາຊົນປະຕິວັດລາວ,ໂດຍສະເພາະໄຊຊະນະອັນຍິ່ງໃຫຍ່ຂອງພາລະກິດ ແຫ່ງການຕໍ່ສູ້ປົດປ່ອຍຊາດ ໃນເມື່ອກ່ອນ ແລະ ຜົນສຳເລັດໃນພາລະກິດປົກປັກຮັກສາ, ສ້າງສາພັດທະນາປະເທດຊາດ, ນໍາພາປະເທດຊາດ ແລະ ປວງຊົນລາວບັນດາເຜົ່າສູ່ຄວາມຈະເລີນຮຸ່ງເຮືອງ ມີຄວາມສະຫງົບສຸກ ແລະ ອື່ນໆ.
ທ່ານ ເອກອັກຄະລັດຖະທູດຍັງກ່າວສະແດງຄວາມຍ້ອງຍໍຊົມເຊີຍຕໍ່ຄະນະນໍາ, ພະນັກງານກ່ຽວຂ້ອງປະຈໍາປັກກິ່ງ ໄດ້ຮ່ວມກັນຈັດກິດຈະກໍາແຂ່ງຂັນກິລາມິດຕະພາບ ຄັ້ງນີ້ ເພື່ອຮັດແໜ້ນມິດຕະພາບ, ຄວາມຮັກແພງສາມັກຄີ ແລະ ຄວາມໃກ້ຊິດຕິດແທດລະຫວ່າງສະຖານທູດ, ວິທະຍຸໂທລະພາບສູນກາງຈີນ, ພະນັກງານ, ບັນດານັກຮຽນ-ນັກສຶກສາໃຫ້ແໜ້ນແຟ້ນຍິ່ງໆຂຶ້ນ.