ຂປລ
ຂປລ. ປາກເຊ ເຊັນເຕີພາກ ເປັນຕະຫລາດກາງຄືນອີກແຫ່ງໜຶ່ງ ໃນນະຄອນປາກເຊ ແຂວງຈໍາປາສັກ ຕັ້ງຢູ່ບ້ານປາກເຊ (ແຄມຂອງ) ເປັນຈຸດນັດພົບທີ່ໜ້າສົນໃນ ເນື່ອງຈາກວ່າສະຖານທີ່ແຫ່ງນີ້ ມີຈຸດຂາຍອາຫານ, ເຄື່ອງດື່ມ, ເຄື່ອງທີ່ລະນຶກ ແລະ ເສື້ອຜ້າ
ຂປລ. ປາກເຊ ເຊັນເຕີພາກ ເປັນຕະຫລາດກາງຄືນອີກແຫ່ງໜຶ່ງ ໃນນະຄອນປາກເຊ ແຂວງຈໍາປາສັກ ຕັ້ງຢູ່ບ້ານປາກເຊ (ແຄມຂອງ) ເປັນຈຸດນັດພົບທີ່ໜ້າສົນໃນ ເນື່ອງຈາກວ່າສະຖານທີ່ແຫ່ງນີ້ ມີຈຸດຂາຍອາຫານ, ເຄື່ອງດື່ມ, ເຄື່ອງທີ່ລະນຶກ ແລະ ເສື້ອຜ້າ .ສະນັ້ນ, ຈຶ່ງເໝາະສົມແກ່ການນັ່ງພັກຜ່ອນຢ່ອນໃຈກິນອາຫານແຊບໆ,ຟັງເພງມ່ວນໆ.
ທ່ານ ສຸກປະສິດ ບຸດດາວົງ ຜູ້ບໍລິຫານ ປາກເຊ ເຊັນເຕີພາກ ໃຫ້ຮູ້ວ່າ: ເພື່ອປະຕິບັດຕາມແຜນພັດທະນາເສດຖະກິດ - ສັງຄົມຂອງພັກ ແລະ ລັດຖະບານ ເວົ້າລວມ, ເວົ້າສະເພາະແມ່ນແຜນພັດທະນາເສດຖະກິດ-ສັງຄົມ ຂອງແຂວງຈໍາປາສັກ ກ່ຽວກັບການສ້າງນະຄອນປາກເຊ ເປັນຈຸດໃຈກາງດ້ານເສດຖະກິດ, ການຄ້າ, ການບໍລິການ ແລະ ການທ່ອງທ່ຽວ ທັງເປັນການປະກອບສ່ວນເຮັດໃຫ້ນະຄອນປາກເຊ ມີບ່ອນບໍລິການດ້ານການຂາຍເຄື່ອງນຸ່ງ, ເຄື່ອງທີ່ລະນຶກ, ອາຫານ ແລະ ເຄື່ອງດື່ມ ໃນເວລາກາງຄືນ ນັບມື້ນັບຫລາຍຂຶ້ນ ເພື່ອຕອບສະໜອງຄວາມຕ້ອງການຂອງສັງຄົມ ໃຫ້ມີຫລາຍທາງເລືອກ ໃນການທ່ຽວຊື້ທ່ຽວຊົມ ແລະ ຜ່ານມາກໍໄດ້ມີໂອກາດ ໄປທັດສະນະສຶກສາ ແລະ ແລກປ່ຽນບົດຮຽນຢູ່ຕາມສະຖານທີ່ບໍລິການ ແລະ ສະຖານທີ່ທ່ອງທ່ຽວຫລາຍບ່ອນ ຊຶ່ງເຮັດໃຫ້ເກີດມີແນວຄວາມຄີດຢາກນຳເອົາບົດຮຽນດັ່ງກ່າວມາພັດທະນາແຂວງຈຳປາສັກ ກໍຄືນະຄອນປາກເຊ ໃຫ້ມີຈຸດນັດພົບທີ່ສາມາດຮອງຮັບ ແລະ ດຶງດູດນັກທ່ອງທ່ຽວ ກໍຄືລູກຄ້າ ພາຍໃນແຂວງ, ຕ່າງແຂວງ ແລະ ຕ່າງປະເທດ ໃຫ້ເຂົ້າມາທ່ອງທ່ຽວແຂວງຈໍາປາສັກ ແລະ ນະຄອນປາກເຊນັບມື້ຫລາຍຂຶ້ນ ຈຶ່ງການເປັນແຮງບັນດານໃຈໃຫ້ຂ້າພະເຈົ້າເລີ່ມຕົ້ນໃນການສ້າງເປັນໂຄງການຕະ ຫລາດກາງຄືນ.
ທ່ານ ສຸກປະສິດ ໃຫ້ຮູ້ຕື່ມວ່າ: ການກໍ່ສ້າງ ປາກເຊ ເຊັນເຕີພາກ ເລີ່ມແຕ່ວັນທີ 15 ມິຖຸນາ 2025, ຮອດວັນທີ 15 ກັນຍາ 2025 ຈຶ່ງສໍາເລັດ ໂດຍມູນຄ່າການລົງທຶນທັງໝົດ 18 ຕື້ 880 ລ້ານກີບ ແລະ ໄດ້ທົດລອງເປີດບໍລິການໃນຄືນວັນທີ 16 ກັນຍາ 2025 ຜ່ານມາ ເຫັນວ່າ ມີຜູ້ຄົນມາທ່ຽວຊື້ທ່ຽວຊົມ ເປັນຈໍານວນຫລວງຫລາຍ ເຮັດໃຫ້ຕະຫລາດພວກເຮົາມີບັນຍາກາດຟົດຟື້ນດີ. ພ້ອມນີ້ ປາກເຊ ເຊັນເຕີພາກ ຍັງສາມາດສົ່ງເສີມໃຫ້ຊາວໜຸ່ມໄວໜຸ່ມ ແລະ ພໍ່ແມ່ປະຊາຊົນໃນທ້ອງຖິ່ນມີວຽກເຮັດງານທໍາ, ມີລາຍຮັບເພີ່ມຂຶ້ນ ຍ້ອນວ່າ ປາກເຊ ເຊັນເຕີພາກ ມີຮ້ານທັງໝົດ 68 ຮ້ານ,ເຮັດໃຫ້ມີການຈ້າງງານຢ່າງຫລວງຫລາຍອັນເປັນການສ້າງວຽກເຮັດງານທຳໃຫ້ປະຊາຊົນເຂດດັ່ງກ່າວມີລາຍຮັບເພິ່ນຂຶ້ນ. ປາກເຊ ເຊັນເຕີພາກ ເປີດບໍລິການທຸກວັນ ເລີ່ມແຕ່ເວລາ 16 ໂມງ-23 ໂມງ. ສະນັ້ນ, ຈຶ່ງເຊີນຊວນທຸກໆທ່ານທີ່ໄດ້ມານະຄອນປາກເຊ ກໍສາມາດແວ່ເຂົ້າມາທ່ຽວຊົມ ຮັບຮອງວ່າທ່ານຈະປະທັບໃຈແນ່ນອນ ເນື່ອງຈາກວ່າ ມີອາຫານຫລາກຫລາຍໃຫ້ເລືອກ, ມີຫ້ອງນໍ້າທີ່ສະອາດ ແລະ ມີສະຖານທີ່ຈອດລົດກວ້າງຂວາງໄວ້ບໍລິການລູກຄ້າ.
ໂອກາດນີ້, ທ່ານ ນາງ ຕຸກຕາ ສີວິໄລ ຮ້ານອາຫານຟູມູນ ທີ່ນໍາເອົາອາຫານປະເພດທອດເອັນໄກ່, ຢໍ້ຂາໝູ, ໃສ່ກອກ, ເຂົ້າໜົມ ແລະ ອາຫານປະເພດອື່ນໆ ມາຮ່ວມຈໍາໜ່າຍຢູ່ຕະຫລາດດັ່ງກ່າວ ໃຫ້ສໍາພາດວ່າ: ແຕ່ມື້ເປີດບໍລິການ ມາເຖິງ ປັດຈຸບັນ ເຫັນວ່າໄດ້ຂາຍດີ, ມີລູກຄ້າມາອຸດໜູນຕະຫລອດ.
ພ້ອມນີ້, ທ່ານ ບຸນລົ້ນ ພວງມະນີ ໜຶ່ງໃນລູກຄ້າທີ່ມາໃຊ້ບໍລິການ ໃນ ປາກເຊ ເຊັນເຕີພາກ ກໍໃຫ້ສໍາພາດວ່າ: ເປັນຄັ້ງທໍາອິດທີ່ຂ້າພະເຈົ້າເຂົ້າມາໃຊ້ບໍລິການ ເຫັນວ່າບັນຍາກາດດີ, ມີສີສັນ, ການບໍລິການກໍດີ, ອາຫານກໍແຊບ ມີຄົບຈົບທຸກຢ່າງ, ຂ້າພະເຈົ້າຮູ້ສຶກດີໃຈທີ່ໄດ້ມາສໍາພັດກັບບັນຍາກາດດີໆແບບນີ້.
ໂດຍ: ທູນທອງໃຈ
KPL
