ຂປລ. ສາຍການບິນຫວຽດເຈັດ (Vietjet) ໄດ້ຖືກຮັບຮອງໃຫ້ເປັນໜຶ່ງໃນບັນດາຍີ່ຫໍ້ທີ່ມີຄຸນຄ່າທີ່ສຸດຂອງເອເຊຍຕາເວັນອອກສ່ຽງໃຕ້, ເປັນຍີ່ຫໍ້ສາຍການບິນຊັ້ນນໍາຂອງໂລກ ແລະ ເປັນຍີ່ຫໍ້ທີ່ມີມູນຄ່າທີ່ສຸດຂອງຫວຽດນາມ ສໍາລັບປີ 2025, ໂດຍການໃຫ້ຄຳປຶກສາດ້ານການປະເມີນມູນຄ່າຍີ່ຫໍ້ຊັ້ນນໍາຂອງໂລກ ຄື: Brand Finance. ການຮັບຮອງຫລ້າສຸດນີ້ເນັ້ນໃຫ້ເຫັນເຖິງຕໍາແໜ່ງຂອງ Vietjetໃນຖານະສາຍການບິນຊັ້ນນໍາທີ່ເຊື່ອມຕໍ່ນັກທ່ອງທ່ຽວຈາກລາວໄປຫວຽດນາມ ແລະ ບັນດາປະເທດໃນເອເຊຍ-ປາຊີຟິກ. ສາຍການບິນ Vietjet ຖືກຈັດເຂົ້າໃນບັນດາ 6 ຍີ່ຫໍ້ທີ່ມີມູນຄ່າທີ່ສຸດໃນການບິນຂອງອາຊຽນໃນປີນີ້, ຢືນຢູ່ຄຽງຄູ່ກັບສາຍການບິນໃຫຍ່ໃນພາກພື້ນ ເຊັ່ນ: ສາຍການບິນສິງກະໂປ (Singapore Airlines), ການບິນໄທ (Thai Airways), ແລະ ການບິນມາເລເຊຍ (Malaysia Airlines). ສາຍການບິນດັ່ງກ່າວໄດ້ຮັບການຍອມຮັບຢ່າງໂດດເດັ່ນຂອງຍີ່ຫໍ້ ແລະ ການເຕີບໂຕຂອງຊື່ສຽງໃນລະດັບສາກົນໃນແຜນທີ່ການບິນທົ່ວໂລກ ດ້ວຍເຄືອຂ່າຍສາກົນທີ່ຂະຫຍາຍຕົວຢ່າງວ່ອງໄວ ແລະ ຂໍ້ສະເໜີທີ່ດຶງດູດຕະຫຼອດປີ, ສາຍການບິນ Vietjet ໄດ້ສືບຕໍ່ເຊື່ອມຕໍ່ນັກທ່ອງທ່ຽວຊາວລາວໄປຫວຽດນາມ ແລະ ນອກເໜືອຈາກການບໍລິການບິນກົງໄປຮ່າໂນ້ຍ ແລະ ໂຮ່ຈີມິນ. ໃນຫລາຍປີທີ່ຜ່ານມາ, ສາຍການບິນ Vietjet ໄດ້ກາຍເປັນຜູ້ຫລິ້ນທີ່ສໍາຄັນໃນການສົ່ງເສີມການທ່ອງທ່ຽວ, ທຸລະກິດ ແລະ ການແລກປ່ຽນວັດທະນະທໍາລະຫວ່າງລາວ ແລະ ຫວຽດນາມ, ແລະ ໃນທົ່ວເອເຊຍ.

ສາຍການບິນດັ່ງກ່າວໄດ້ຂະຫຍາຍເຄືອຂ່າຍການບິນຢ່າງຕໍ່ເນື່ອງ, ລົງທຶນໃນເຮືອບິນທີ່ທັນສະໄໝ, ມີຄວາມຍືດຍຸ່ນ ແລະ ມີການບໍລິການທີ່ຫຼາກຫຼາຍ ເພື່ອສະໜອງປະສົບການການເດີນທາງທີ່ສະດວກສະບາຍ, ເປັນມິດ ແລະ ຍືດຍຸ່ນໃຫ້ແກ່ຜູ້ໂດຍສານ. ສໍາລັບ 9 ເດືອນທໍາອິດຂອງປີ 2025, Vietjetໄດ້ລາຍງານລາຍຮັບ VND52.329 ພັນຕື້ດົງ (ປະມານ 42.97 ພັນຕື້ກີບລາວ), ກໍາໄລລວມ VND6.724 ພັນຕື້ດົງ (ປະມານ 5.52 ພັນຕື້ກີບລາວ), ແລະ ກໍາໄລກ່ອນຫັກພາສີ VND1.987 ພັນຕື້ດົງ (ປະມານ 1.63 ພັນຕື້ກີບລາວ), ເພີ່ມຂຶ້ນ 28% ເມື່ອທຽບໃສ່ປີຜ່ານມາ. ມູນຄ່າຕະຫລາດຂອງບໍລິສັດໄດ້ສືບຕໍ່ເຕີບໂຕຢ່າງໝັ້ນຄົງ. ນັບແຕ່ວັນທີ 7 ພະຈິກ 2025, ມູນຄ່າຕະຫລາດຂອງສາຍການບິນໄດ້ບັນລຸ VND105.3 ພັນຕື້ດົງ (ປະມານ 86.47 ພັນຕື້ກີບລາວ). ດ້ວຍການດໍາເນີນງານເຮືອບິນ 130 ລໍາ ໃນຫລາຍກວ່າ 170 ເສັ້ນທາງ, Vietjetໄດ້ໃຫ້ບໍລິການຜູ້ໂດຍສານຫລາຍກວ່າ 250 ລ້ານຄົນໃນທົ່ວພາກພື້ນເອເຊຍ-ປາຊີຟິກມາເຖິງປັດຈຸບັນ. ໂດຍອີງໃສ່ຍຸດທະສາດທີ່ເຂັ້ມແຂງ, ສາຍການບິນ ດັ່ງກ່າວໄດ້ພັດທະນາໄປສູ່ກຸ່ມການບິນທົ່ວໂລກ ດ້ວຍການສັ່ງຊື້ເຮືອບິນໃໝ່ຫລາຍຮ້ອຍລໍາ, ການຂະຫຍາຍເຄືອຂ່າຍລະຫວ່າງທະວີບແລະ ໂຄງການຍືນຍົງທີ່ເສີມສ້າງຄໍາໝັ້ນສັນຍາຂອງຕົນຕໍ່ຮູບແບບການບິນໃນອະນາຄົດທີ່ເປັນມິດກັບສິ່ງແວດລ້ອມ.

ທ່ານ ນາງ Ho Ngoc Yen Phuong, ຮອງປະທານບໍລິຫານ ແລະ ຫົວໜ້າຝ່າຍການເງິນ (CFO) ຂອງ ສາຍການບິນ Vietjetແລະ ສະມາຊິກຄະນະກໍາມະການບໍລິຫານ ກ່າວວ່າ:  "ພວກເຮົາຈະສືບຕໍ່ສະໜອງປະສົບການການເດີນທາງທີ່ຫລາກຫລາຍ, ສະດວກສະບາຍແລະ ລາຄາບໍ່ແພງໃຫ້ແກ່ຜູ້ໂດຍສານຂອງພວກເຮົາ ໃນຂະນະທີ່ເພີ່ມມູນຄ່າ ແລະ ຕໍາແໜ່ງຂອງຫວຽດນາມ ໃນພູມສັນຖານການບິນທົ່ວໂລກ." ກ່ອນໜ້ານີ້, ສາຍການບິນ Vietjet ໄດ້ຮັບລາງວັນໃຫຍ່ (Grand Winner) ໃນໝວດການທ່ອງທ່ຽວ (Tourism Category) ໃນງານລາງວັນທຸລະກິດອາຊຽນ 2025 (ASEAN Business Awards 2025) ແລະ ໄດ້ຮັບກຽດຕິຍົດສາກົນອັນຊົງກຽດຫຼາຍຢ່າງຈາກ Skytrax, AirlineRatings, ແລະ World Travel Awards.Brand Finance, ທີ່ປຶກສາດ້ານການປະເມີນມູນຄ່າຍີ່ຫໍ້ ແລະ ການເງິນຊັ້ນນໍາຂອງໂລກ, ສ້າງຕັ້ງຂຶ້ນໃນປີ 1996 ແລະ ມີສໍານັກງານໃຫຍ່ຢູ່ລອນດອນ, ສະຫະລາຊະອານາຈັກ, ດໍາເນີນການຢູ່ໃນຫລາຍກວ່າ 25 ປະເທດທົ່ວໂລກ. ໃນແຕ່ລະປີ, Brand Finance ດໍາເນີນການປະເມີນມູນຄ່າຍີ່ຫໍ້ຫລາຍກວ່າ 6,000 ຍີ່ຫໍ້. ການຈັດອັນດັບຂອງພວກເຂົາແມ່ນອີງໃສ່ມາດຕະຖານ ແລະ ວິທີການທີ່ໄດ້ຮັບການຍອມຮັບໃນລະດັບສາກົນ, ປະເມີນຍີ່ຫໍ້ໂດຍອີງໃສ່ຜົນງານທາງດ້ານທຸລະກິດ, ອິດທິພົນ, ການລົງທຶນດ້ານການຕະຫລາດແລະ ຕົວຊີ້ວັດຫລັກອື່ນໆ ເພື່ອສະທ້ອນໃຫ້ເຫັນເຖິງຂະໜາດ, ຄວາມສາມາດໃນການແຂ່ງຂັນແລະ ມູນຄ່າທີ່ແທ້ຈິງໃນຕະຫລາດໂລກ.

KPL