ຂປລ
ຂປລ. ຊົນເຜົ່າກຶມມຸ ເປັນເຜົ່າໜຶ່ງທີ່ນອນຢູ່ໃນວົງຄະນາຍາດແຫ່ງຊາດລາວ ແລະ ກໍຄ້າຍຄືກັນກັບບັນດາຊົນເຜົ່າມີເຊື້ອສາຍພົວພັນກັບຊົນຊາດຂອມ ໄດ້ຍົກຍ້າຍມາຕັ້ງຖິ່ນຖານຢູ່ເຂດໃຈກາງສຸວັນນະພູມ. ຊົນເຜົ່າກຶມມຸໄດ້ດໍາລົງຊີວິດຢູ່ບັນດາແຂວງພາກເໜືອລົງຮອດແຂວງຄໍາມວນ, ເຜົ່າກຶມມຸມີພາສາປາກເວົ້າເປັນຂອງຕົນເອງ ແລະ ຢຶດຖືຮີດຄອງປະເພນີຂອງເຜົ່າ ໂດຍໄດ້ຖືເອົາບຸນເກີຣ ຫລື ບຸນເຕ້ຍນືມເປັນບຸນປົດປີ
ຂປລ. ຊົນເຜົ່າກຶມມຸ ເປັນເຜົ່າໜຶ່ງທີ່ນອນຢູ່ໃນວົງຄະນາຍາດແຫ່ງຊາດລາວ ແລະ ກໍຄ້າຍຄືກັນກັບບັນດາຊົນເຜົ່າມີເຊື້ອສາຍພົວພັນກັບຊົນຊາດຂອມ ໄດ້ຍົກຍ້າຍມາຕັ້ງຖິ່ນຖານຢູ່ເຂດໃຈກາງສຸວັນນະພູມ. ຊົນເຜົ່າກຶມມຸໄດ້ດໍາລົງຊີວິດຢູ່ບັນດາແຂວງພາກເໜືອລົງຮອດແຂວງຄໍາມວນ, ເຜົ່າກຶມມຸມີພາສາປາກເວົ້າເປັນຂອງຕົນເອງ ແລະ ຢຶດຖືຮີດຄອງປະເພນີຂອງເຜົ່າ ໂດຍໄດ້ຖືເອົາບຸນເກີຣ ຫລື ບຸນເຕ້ຍນືມເປັນບຸນປົດປີ ໝາຍຄວາມວ່າ ເປັນບຸນສົ່ງທ້າຍປີເກົ່າຕ້ອນຮັບປີໃໝ່ຂອງຊົນເຜົ່າ.
ເມື່ອມໍ່ໆມານີ້, ຢູ່ບ້ານວຽງຄໍາ ເມືອງ ແລະ ແຂວງຫລວງນ້ຳທາ ໄດ້ພິທີສະເຫລີມສະຫລອງບຸນເກີຣ ຂອງຊົນເຜົ່າກຶມມຸ ເພື່ອເປັນການປົກປັກຮັກສາຮີດຄອງປະເພນີອັນດີງາມຂອງເຜົ່າ ທັງເປັນການສະຫລຸບ ການຈັດຕັ້ງປະຕິບັດວຽກງານຂອງບ້ານວຽງຄໍາ. ບ້ານວຽງຄໍາ ມີປະຊາກອນທັງໝົດ 1.456 ຄົນ; ຍິງ 703 ຄົນ, ມີ 260 ຫລັງຄາເຮືອນ, ມີຫລາຍຊົນເຜົ່າດໍາລົງຊີວິດຮ່ວມກັນ. ສໍາລັບເຜົ່າກຶມມຸ ກວມເອົາ 38%, ພໍ່ແມ່ປະຊາຊົນພາຍໃນບ້ານໄດ້ຖືເອົາການພັດທະນາເສດຖະກິດ-ສັງຄົມຂອງບ້ານ, ຂອງຄອບຄົວເປັນຕົ້ນແມ່ການປູກຝັງ-ລ້ຽງສັດ ແລະ ຄ້າຂາຍ, ປະຊາຊົນພາຍໃນບ້ານມີເນື້ອທີ່ນາ 50 ເຮັກຕາ, ເນື້ອທີ່ປູກຢາງພາລາ 450 ເຮັກຕາ, ເນື້ອທີ່ປູກໝາກໄມ້ ແລະ ພືິດກະສິກຳຕ່າງໆ 27 ເຮັກຕາ, ລ້ຽງສັດໃຫຍ່ ແລະ ສັດນ້ອຍ, ຄ້າຂາຍຕື່ມອີກ. ການຈັດງານບຸນເກີຣໃນແຕ່ລະປີ ເພື່ອສົ່ງເສີມວັດທະນະທໍາຊົນເຜົ່າກຶມມຸ ຕິດພັນກັບການທ່ອງທ່ຽວ ແລະ ຊຸກຍູ້ສົ່ງເສີມຮີດຄອງປະເພນີ, ວັດທະນະທໍາອັນດີງານທີ່ເຄີຍປະຕິບັດສືບທອດກັນມາແຕ່ດົນນາມ ແລະ ເປັນການເຕົ້າໂຮມຄວາມສາມັກຄີຂອງບັນດາເຜົ່າ ມາໄດ້ຫລາຍຮ້ອຍປີ. ບຸນເກີຣ ໄດ້ກາຍເປັນປາງບຸນໃຫຍ່ຂອງເຜົ່າ ຫລື ເອີ້ນວ່າ: ງານບຸນປີໃໝ່ຂອງເຜົ່າກຶມມຸ ທີ່ເຄີຍສືບທອດກັນມາແຕ່ບູຮານນະການຈົນເຖິງປັດຈຸບັນ. ພ້ອມກັນນັ້ນ, ພາຍໃນງານຍັງໄດ້ມີກິດຈະກໍາຫລາຍຢ່າງ ໂດຍສະເພາະແມ່ນການສູ່ຂວັນມັດແຂນໃຫ້ເຖົ້າແກ່ອາວຸໂສ, ດື່ມເຫລົ້າໄຫຕາມຮີດຄອງ, ຊົມສີລະປະວັນນະຄະດີຂອງບ້ານ ແລະ ມ່ວນຊື່ນຕາມຮີດຄອງປະເພນີ.
ເປັນກຽດເຂົ້າຮ່ວມຂອງທ່ານ ນາງ ຈັນສະໄໝ ແກ້ວມະນີວົງ ຮອງເລຂາພັກເມືອງ ຜູ້ຊີ້ນໍາການເມືອງແນວຄິດພັກ-ພະນັກງານ, ທ່ານ ສົມເພັດ ວັນນະວົງ ຄະນະຮັບຜິດຊອບຊົນເຜົ່າກຶມມຸ, ທ່ານ ຈອຍເພັດ ແສນທໍາມະຂັນ ນາຍບ້ານໆນາຫ້ອມ, ມີຄະນະນໍາຂັ້ນແຂວງ, ຂັ້ນເມືອງ, ນາຍບ້ານ, ແຂກ ຖືກເຊີນຕະຫລອດຮອດປະຊາຊົນພາຍໃນບ້ານເຂົ້າຮ່ວມ.
KPL
