ຂປລ. ຈີນປະກາດ​ຂໍ້​ສະ​ເໜີ​ວ່າ​ດ້ວຍແຜ​ນ​ພັດ​ທະ​ນາ​ເສດ​ຖະ​ກິດ​-ສັງ​ຄົ​ມ ​ແຫ່ງ​ຊາດ 5 ປີ ​ຄັ້ງ​ທີ 15 (2026-2030) (ຕໍ່​ໄປ​ເອີ້ນ​ຫຍໍ້​ວ່າ “ຂໍ້​ສະ​ເໜີ”) ມຸ່ງໜ້າເລັ່ງ​ລັດ​ສ້າງ​​ ເສດ​ຖະ​ກິດ​ສັງ​ຄົມ​ນິ​ຍົມ​ລະດັບສູງ, ເພີ່ມ​ທະ​ວີ​ພະລັງຂັບ​ເຄື່ອນ ​ການ​ພັດ​ທະ​ນາ​ດ້ວຍ​ຄຸນ​ນະ​ພາບ​ສູງ, ເພິ່ງ​ຕົນ​ເອງສ້າງ​ຄວາມ​ເຂັ້ມ​ແຂງ ​ດ້ວຍ​ຕົນ​ເອງ​ດ້ານ​ວິ​ທະ​ຍາ​ສາດ ເຕັກ​ໂນ​ໂລ​ຊີ​ໃນ​ລ​ະ​ດັບ​ສູງ, ເປີດ​ປະ​ຕູ​ກວ້າງສູ່​ພາຍນອກ ໃນ​ລະ​ດັບ​ສູງ ຊຶ່ງໄດ້ສະ​ທ້ອນໃຫ້ເຫັນ​ເຖິງ ຄວາມມຸ່ງມາດປາຖະໜາ ອັນແຮງກ້າຂອງຈີນ ຄື: ຂະ​ບວນ​ການ​ອອກ​ເດີນ​ທາງ​ຄັ້ງ​ໃໝ່​ ເພື່ອ​ບັນ​ລຸ​ເປົ້າ​ໝາຍ​ສູ້​ຊົນ​ຄົ​ບ​ຮອບ 100 ປີ​, ບັນ​ລຸ​ສັງ​ຄົມ​ນິ​ຍົມ​ທັນ​ສະ​ໄໝ ໂດຍ​ພື້ນ​ຖານ​ເມື່ອຮອດ​ປີ 2035 ກັບລວມຍອດ​ຜະ​ລິດ​ຕະ​ພັນ​ພາຍ​ໃນ​ ສະ​ເລ່ຍ​ຕໍ່​ຫົວ​ຄົນ​ໄດ້​ບັນ​ລຸ​ລະ​ດັບ​ຂອງ​ປະ​ເທດ ​​ທີ່ພັດ​ທະ​ນາ​ແລ້ວ​ໃນ​ລະ​ດັບ​ປານ​ກາງ, ຊຸກ​ຍູ້​ການ​ຟື້ນ​ຟູ ​ຄວາມ​ຈະ​ເລີນ​ຮຸ່ງ​ເຮືອງ​​ທີ່​ຍິ່ງ​ໃຫຍ່​ຂອງ​​​ຊົນຊາດ​ຈີນ ຢ່າ​ງ​ຮອບ​ດ້ານ​ດ້ວຍ​ຄວາມ​ທັນ​ສະ​ໄໝ​ແບບ​ຈີນ ແລະ ອື່ນໆ.

ພາຍຫລັງ ຈີນໄດ້ເຜີຍແຜ່​ຂໍ້​ສະ​ເໜີ​ ອອກສູ່ສາຍຕາຊາວໂລກຜ່ານສື່ຕ່າງໆ ເມື່ອມໍ່ໆມານີ້ໄດ້ເຮັດໃຫ້ບັນດາ ນັກວິເຄາະເສດຖະກິດທົ່ວໂລກ ມີທັດສະນະຕໍ່ການຈັດຕັ້ງ ແຜນ​ພັດ​ທະ​ນາ​ເສດ​ຖະ​ກິດ​-ສັງຄົ​ມ​ ແຫ່ງ​ຊາດ 5 ປີ​ຄັ້ງ​ທີ 14 ຂອງຈີນ ທີ່ໄດ້ຮັບຜົນສໍາເລັດພົ້ນ ເດັ່ນເປັນປະຈັກຕາ ແລະ ສືບຕໍ່ວາງທິດ ແຜນ​ພັດ​ທະ​ນາ​ເສດ​ຖະ​ກິດ​-ສັງຄົ​ມ ​ແຫ່ງ​ຊາດ 5 ປີ​ຄັ້ງ​ທີ 15 ຂອງຈີນ ພວມຈະດໍາເນີນການຈັດຕັ້ງປະຕິບັດ ໃນຕໍ່ໜ້ານີ້ວ່າການເຜີຍແຜ່ ແຜນພັດທະນາເສດຖະກິດສະບັບໃໝ່ຂອງຈີນ ມີຄວາມສໍາຄັນທີ່ສຸດຕໍ່ການຕີລາຄາ ທ່າອ່ຽງ ການເຕີບໂຕເສດຖະກິດໂລກ, ການພັດທະນາແບບຍືນຍົງຂອງທົ່ວໂລກ ແລະ ທິດທາງສ້າງຄວາມສົມ​ດຸນອໍານາດໃໝ່ ຂອງໂລກເພີ່ມຂຶ້ນເລື້ອຍໆ. ສະນັ້ນ, ຖ້າພວກເຮົາຢາກຮູ້ກ່ຽວກັບຈີນ ໄດ້ຢ່າງເລິກເຊິ່ງນັ້ນກໍບໍ່ຄວນເບິ່ງຂ້າມ ປະຫວັດສາດຂອງຈີນ ນັບຫລາຍພັນປີ ປະ ກົດຂຶ້ນໃນໂລກໜ່ວຍນີ້ ຢ່າງມະຫັດສະຈັນທີ່ຈີນຍາດມາໄດ້ ບໍ່ແມ່ນເລື່ອງງ່າຍເຊັ່ນວ່າ: ເສັ້ນທາງສາຍໄໝບູຮານ ນັບສາມພັນກວ່າປີ ຊຶ່ງມັນແມ່ນສ່ວນໜຶ່ງຂອງ ເສັ້ນທາງຄົມມະນາຄົມຂົນສົ່ງສິນຄ້າ ແລະ ໄປມາຫາສູ່ກັນ, ເຊື່ອມໂຍງລະຫວ່າງທະວີບອາຊີ ແລະ ເອີຣົບ ໄດ້ ຟື້ນຊີບຄືນໃໝ່ໃນປີ 2013 ພາຍໃຕ້ ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ປັດຈຸບັນນີ້, ມີຫລາຍກວ່າ 150 ປະເທດທົ່ວໂລກ ເຂົ້າຮ່ວມໂຄງການເສັ້ນທາງ ສາຍໄໝແຫ່ງສະຕະວັດທີ 21 ນີ້ ຈົນກາຍເປັນເສັ້ນເລືອດໃຫຍ່ ຂອງມວນນະນຸດ ປະກອບສ່ວນເຂົ້າຊຸກຍູ້ ການພັດ ທະ ນາເສດຖະກິດ-ສັງຄົມ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກ ຢ່າງກວ້າງ​ຂວາງ​ໃນທົ່ວໂລກ; ຈາກການທີ່ຈີນ ລວມທັງພວກເຮົາເຈົ້າຂ້ອຍເພິ່ງພາອາໄສສິນຄ້າ ແລະ ເຕັກໂນໂລຊີທັນສະໄໝ ດ້ວຍລາຄາແພງ ແລະ ລາຄາບັງຄັບບີບຮັດຈາກຊາດຕາເວັນຕົກ ສາ ມາດປົດແອ​ກການຄວບງໍາຜູກຂາດ ຂອງຊາດຕາເວັນຕົກໄດ້ຢ່າງໜ້າສົນໃຈ; ຈາກອຸດສາຫະກໍາຜະລິດເປັນສິນຄ້າ ດ້ວຍປະລິມານຫລາຍ ກ້າວສູ່ການຜະລິດຄຸນນະພາບໃໝ່ ແລະ ມີສີສັນຫລາກຫລາຍ; ຈາກປະເທດຖືກຈັກກະພັດລ່າ ເມືອງຂຶ້ນກົດຂີ່ຂູດຮີດ ແລະ ຟາຊິດ ຮຸກຮານຂົ່ມເຫັງ ກາຍເປັນປະເທດ ມີອາວຸດຍຸດໂທປະກອນ ທີ່ກ້າວໜ້າທັນສະໄໝອັນດັບຕົ້ນໆຂອງໂລກ;  ຈາກລາຍຮັບຕໍ່ຫົວຄົນ 49.7 ຢວນ ໃນປີ 1949 ກ້າວເປັນປະມານ 40.000 ຢວນໃນປີ 2025 ອາດເພີ່ມສູງຂຶ້ນເຖິງ 80 ເທົ່າ ຊຶ່ງໝາກຜົນຄວາມສໍາເລັດ ທັງ ໝົດທີ່ວ່ານັ້ນ ບໍ່​ພຽງ​ແຕ່ໄດ້ສະ​ທ້ອນ ສັນຍາບວກຕໍ່ຈີນເທົ່ານັ້ນ ຫາກຍັງສ້າງສະພາບແວດລ້ອມທີ່ດີສຸດ ເພື່ອເອື້ອອໍານວຍຄວາມສະດວກ ໃຫ້ແກ່ອາຊຽນ ແລະ ວົງຄະນາ​ຍາດສາກົນ ໃນໂລກຈະໄດ້ຊົມໃຊ້ ແລະ ຮ່ວມມືກັນ ຂັບເຄື່ອນຄວາມຈະເລີນຮຸ່ງເຮືອງ, ຄວາມທັນສະ ໄໝ, ສັນຕິພາບ-ຄວາມສະຫງົບ, ການຢູ່ຮ່ວມກັນໂດຍສັນຕິ, ການແບ່ງປັນຜົນປະໂຫຍດກັນຢ່າງທົ່ວເຖິງໃນຍຸກໂລກາພິວັດ.

ນັກວິເຄາະຍັງຍົກເອົາບາງຄໍາສຸພາສິດ ແລະ ວາລີບູຮານປຽບທຽບ ການດໍາລົງຊີວິດຂອງມະນຸດ ລວມທັງການປ່ຽນແປງທ່າອ່ຽງຂອງໂລກວ່າ “ຊ້າງຊົນຊ້າງ ແພ້ຫຍ້າແພກ” ໝາຍວ່າ ເມື່ອປະເທດມະຫາອໍານາດຂັດແຍ່ງກັນ ຊຶ່ງປະເທດທີ່ຈະໄດ້ຮັບຜົນກະທົບບໍ່ ພຽງ​ແຕ່ປະເທດມະຫາອໍານາດໃຫຍ່ເທົ່ານັ້ນ, ແຕ່ຫາກເຮັດໃຫ້ສົ່ງຜົນກະທົບຮຸນແຮງ ຕໍ່ປະເທດກໍາລັງພັດທະນາ ແລະ ດ້ອຍພັດທະນາ ທີ່ມີລະບົບເສດຖະກິດອ່ອນແອ ເພາະສິນ ຄ້າບໍລິໂພກ-ອຸປະໂພກ, ເຕັກໂນໂລຊີທັນສະໄໝ, ເຄື່ອງມືການຜະລິດ, ນໍ້າມັນ​ເຊື້ອໄຟສ່ວນ ໃຫຍ່ ລ້ວນແຕ່ເພິ່ງພາອາໄສ ຈາກປະເທດເຫລົ່ານັ້ນ. ສະນັ້ນ, ການທີ່ຈີນເຜີຍແຜ່ ຂໍ້​ສະ​ເໜີວ່າ​ດ້ວຍແຜນ​ພັດ​ທະ​ນາ​ ເສດ​ຖະ​ກິດ​-ສັງຄົ​ມ​ແຫ່ງ​ຊາດ 5 ປີ​ຄັ້ງ​ທີ 15, ເສດຖະກິດຂອງຈີນ ຍັງສືບຕໍ່ຂະຫຍາຍຕົວຢ່າງໝັ້ນທ່ຽງ, ສົງຄາມການຄ້າຜ່ອນ​ຄາຍ ແລະ ກ້າວເຂົ້າສູ່ໂຕະ ເຈລະຈາ, ກຸ່ມປະເທດຕາເວັນຕົກຫລຸດຜ່ອນ ການແຊກແຊງພາຍໃນປະເທດອື່ນ ແລະ ຫລຸດຜ່ອນມາດຕະການ​ຂວ້ຳບາດ ຕໍ່ຕ່າງປະເທດ ຊຶ່ງຕໍ່ກັບສັນຍານບວກເຫລົ່ານັ້ນ ບໍ່ພຽງຊ່ວຍສ້າງສິ່ງແວດລ້ອມ ທີ່ດີຕໍ່ສັນຕິພາບໂລກ, ແຕ່ຫາກຍັງຈະເອື້ອອໍານວຍ ເຮັດໃຫ້ເສດຖະ ກິດໂລກຟື້ນໂຕວ່ອງໄວຂຶ້ນ ແລະ ເຮັດໃຫ້ຊີວິດການເປັນຢູ່ຂອງມວນມະນຸດດີຂຶ້ນເປັນກ້າວໆ.

ເຖິງແນວໃດກໍດີ, ກອງ​ປະ​ຊຸມ​ຄົບ​ຄະ​ນະ​ ຄັ້ງ​ທີ 4 ຂອງຄະ​ນະ​ກຳ​ມະ​ການ​ ສູນ​ກາງ​ພັກ​ກອມ​ມູ​ນິດ​ຈີນ ​ສະ​ໄໝ​ທີ XX ໄດ້​ໄຂ​ຂຶ້ນ​ຢູ່​ນະ​ຄອນຫລວງ​ປັກ​ກິ່ງ ລະ​ຫວ່າງວັນ​ທີ 20- 23 ຕຸ​ລາ 2025. ກອງປະຊຸມດັ່ງກ່າວ ກໍໄດ້​ວິ​ເຄາະ​​ສະ​ພາບ​ການ​ທັງ​ພາຍ​ໃນ-ຕ່າງປະ​ເທດຢ່າງ​ເລິກ​ເຊິ່ງ ແລະ ແນະນໍາຂໍ້​ສະ​ເໜີ​ ກ່ຽວ​ກັບ​ການ​ວາງແຜ​ນ​ພັດ​ທະ​ນາ​ ເສດ​ຖະ​ກິດ​-ສັງ​ຄົ​ມ ​ແຫ່ງ​ຊາດ 5 ປີ ​ຄັ້ງ​ທີ XV ຢ່າງສັດຈະວິພາກ ແລະ ມີເນື້ອໃນອຸດົມສົມບູນກວ້າງຂວາງ ອັນໄດ້ສ້າງຄວາມສົນໃຈເປັນພິເສດ ຕໍ່ຊາວໂລກທີ່ພວມຄອງຄອຍ ຕິດຕາມສຶກ ສາ ຄົ້ນຄວ້າ, ຮຽນຮູ້ ແລະ ຕີລາຄາສະພາບລວມ ທ່າອ່ຽງຂອງໂລກຜ່ານແຜ​ນ​ພັດ​ທະ​ນາ​ ເສດ​ຖະ​ກິດ​-ສັງ​ຄົ​ມສະບັບໃໝ່ ຂອງຈີນ (ຕໍ່​ໄປ​ຈະ​ເອີ້ນ​ຫຍໍ້​ວ່າ “ຂໍ້​ສະ​ເໜີ”) ໃນນັ້ນມີຫລາຍພາກ ແລະ ຫລາຍຂໍ້ສໍາຄັນທີ່ສຸດ ແຕ່ຜູ້ຂຽນຈະຍົກຂຶ້ນມານໍາສະເໝີຕໍ່ ທ່ານຜູ້ອ່ານສໍາ ລັບບາງ ພາກບາງ ຂໍ້ພໍຄ້າວໆໂດຍສະເພາະ 15 ຂໍ້ສໍາຄັນທີ່ນອນໃນແຜນພັດທະນາ ເສດຖະກິດ-ສັງຄົມສະບັບໃໝ່ດັ່ງ​ນີ້: ​ໜຶ່ງ: ໄລ​ຍະ​ຈັດ​ຕັ້ງ​ປະ​ຕິ​ບັດ​ແຜນພັດ​ທະ​ນາ​ 5 ປີ ​ຄັ້ງ​ທີ XV ເປັນ​ໄລ​ຍະ​ຂໍ​ກຸ​ນ​ແຈ​​ ໃນ​ກ​ານ​ບັນ​ລຸ​ສັງ​ຄົມ​ນິ​ຍົມ​ທັນ​ສະ​ໄໝ ​ໂດຍ​ພື້ນ​ຖານ; ສອງ: ທິດ​ທາງ​ຊີ້​ນຳ ແລະ ເປົ້າໝາຍ​ຕົ້ນ​ຕໍ ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ ໃນໄລ​ຍະ​ຈັດ​ຕັ້ງ​ປະ​ຕິ​ບັດ ​ແຜນພັດ​ທະ​ນາ​ 5 ປີ ​ຄັ້ງ​ທີ XV; ສາມ: ສ້າງ​ລະ​ບົບ​ອຸດ​ສາ​ຫະ​ກຳ ​ທີ່​ທັນ​ສະ​ໄໝ ແລະ ຮັດ​ແໜ້​ນ​ພື້ນ​ຖານ ​ຂອງ​ເສດ​ຖະ​ກິດ​ຮູບ​ປະ​ທຳ; ສີ່: ເລັ່ງ​ລັດ​ການ​ເພິ່ງ​ຕົນ​ເອງ ແລະ ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ ດ້ານ​ວິ​ທະ​ຍາ​ສາດ​ເຕັກ​ໂນ​ໂລ​ຊີ​ໃນ​ລ​ະ​ດັບ​ສູງ ແລະ  ນຳ​ພາ​ການ​ພັດ​ທະ​ນາ​ ກຳ​ລັງ​ການ​ຜະ​ລິດໃນ​ຄຸນ​ນະ​ພາບ​ໃໝ່; ຫ້າ: ສ້າງ​ສາ​ຕະຫລາດ​ພາຍ​ໃນ ​ທີ່​ເຂັ້ມ​ແຂງ ແລະ ເລັ່ງ​ລັດ​ສ້າງ​ສະ​ພາ​ບ ​ການ​ພັດ​ທະ​ນາ​ໃໝ່;  ຫົກ: ເລັ່ງ​ລັດ​ສ້າງ​ໂຄງ​ປະ​ກອບ ​ເສດ​ຖະ​ກິດ​ສັງ​ຄົມ​ນິ​ຍົມ​ທີ່​ມີ​ລະ​ດັບ​ສູງ, ເພີ່ມ​ທະ​ວີ​ພະ​ລັງ​ຂັບ​ເຄື່ອນ​ ຂອງ​ການ​ພັດ​ທະ​ນາ ​ດ້ວຍ​ຄຸນ​ນະ​ພາບ​ສູງ; ເຈັດ: ເປີດກວ້າງ​ການ​ເປີດ​ປະ​ຕູ​ ສູ່​ພາຍນອກ​ທີ່​ມີ​ລະ​ດັບ​ສູງ, ສ້າງ​ສະ​ພາບ​ການ​ໃໝ່​ ແຫ່ງ​ການ​ຮ່ວມ​ມື​ແບບ​ຕ່າງ​ຝ່າຍ​ຕ່າງ​ ໄດ້​ຮັບ​ຜົນ​ປະ​ໂຫຍດ;   ແປດ: ເລັ່ງ​ລັດ​ສ້າງ​ຄວາມ​ທັນ​ສະ​ໄໝ​ດ້ານ​ກະ​ສິ​ກຳ ແລະ ຊົນ​ນະ​ບົດ, ຊຸກ​ຍູ້​ການພັດ​ທະ​ນ​າ​ຊົນ​ນະ​ບົດ​ ໃຫ້​ຈະ​ເລີນ​ຢ່າງ​ຮອບ​ດ້ານ; ເກົ້າ: ປັບ​ປຸງ​ກາ​ນ​ຈັດ​ວາງ​ເສດ​ຖະ​ກິດ​ ໃນ​ເຂດ​ແຄວ້ນ​ໃຫ້​ດີ​ຂຶ້ນ, ຊຸກ​ຍູ້​ກາ​ນ​ພັດ​ທະ​ນາ​ເຂດ​ແຄວ້ນ​ຕ່າງໆ ​ຢ່າງ​ກົມ​ກຽວ​ກັນ​; ສິບ: ກະ​ຕຸ​ກ​ຊຸ​ກ​ຍູ້​ພະ​ລັງ​ຊີ​ວິດ​ການ​ປະ​ດິດ​ສ້າງ​ໃໝ່ ແລະ ການ​ປະ​ດິດ​ຄິດ​ສ້າງ ດ້ານ​ວັດ​ທະ​ນະ​ທຳ​ຂອງ​ທົ່ວ​ຊົນ​ຊາດ​ຈີນ, ພັດ​ທະ​ນາ​ວັດ​ທະ​ນະ​ທຳ​ສັງ​ຄົມ​ນິ​ຍົມ​ ໃຫ້​ມີ​ຄວາມ​ຈະ​ເລີ​ນ​ຮຸ່ງ​ເຮືອງ; ສິບເອັດ: ເພີ່ມ​ທະ​ວີ​ການ​ຮັບປະ​ກັນ ແລະ ປັບ​ປຸງ​ຊີ​ວິດ​ການ​ເປັນ​ຢູ່​ ຂອງ​ປະ​ຊາ​ຊົນ​ໃຫ້​ດີ​ຂຶ້ນ, ຊຸກ​ຍູ້​ຄວາມ​ຮັ່ງ​ມີ​ຮ່ວມ​ກັນ ຂອງ​ທົ່ວ​ປວ​ງ​ຊົນ​ຢ່າງ​ໜັກ​ແໜ້ນ; ສິບ​ສອງ: ເລັ່ງ​ລັດ​ການ​ພັດ​ທະ​ນາ​ເສດ​ຖ​ະ​ກິດ-ສັງ​ຄົມ ​ໃຫ້​ຫັນເປັນ​ສີ​ຂຽວ​ຢ່າງ​ຮອບ​ດ້ານ, ​ສ້າງ​ສາ​ປະ​ເທດ​ຈີນ​ທີ່​ສວຍ​ງາມ, ການ​ພັດ​ທະ​ນາ​ແບບ​ສີ​ຂຽວ​ ແມ່ນ​ສີພື້ນ​ຖານ​ທີ່​ສົດ​ໃສ ​ແຫ່ງ​ຄວາມ​ທັນ​ສະ​ໄໝ​ແບບ​ຈີນ; ສິບ​ສາມ: ​​ຊຸກ​ຍູ້ຄວາມ​ທັນ​ສະ​ໄໝ​ຂອງ​ລະ​ບົບ ແລະ ຄວາມ​ສາ​ມາດ​ດ້ານ​ຄວາມ​ໝັ້ນ​ຄົງ​ແຫ່ງ​ຊາດ, ສ້າງ​ສາ​ຈີ​ນ​ທີ່​ມີ​ຄວາມ​ສະ​ຫງົບ​ປອດ​ໄພ ທີ່​ມີ​ລະ​ດັບ​ສູງກວ່າ​ເກົ່າ; ສິບ​ສີ່:  ​ບັນ​ລຸ​ເປົ້າ​ໝາຍ​ສູ້​ຊົນ ໃນ​ໂອ​ກາດ​ສ້າງ​ຕັ້ງ​ກອງ​ທັບ ​ປົດ​ປ່ອຍ​ປະ​ຊາ​ຊົນ​ຈີນ​​ ຄົບ​ຮອບ 100 ປີ ຕາມ​ເວ​ລາ​ກຳ​ນົດ, ​ຊຸກ​ຍູ້​ຄວາມ​ທັນ​ສະ​ໄໝ​ດ້ານ​ການ​ປ້ອງ​ກັນປະ​ເທດ ແລະ ກອງ​ທັ​ບ​ດ້ວຍ​ຄຸນ​ນະ​ພາບ​ສູງ ແລະ ສິບ​ຫ້າ: ທົ່ວພັກ ແລະ ປະ​ຊາ​ຊົນ​ບັນ​ດາ​ເຜົ່າ​​ໃນທົ່ວ​ປະ​ເທດ ສາ​ມັກ​ຄີ​ກັນ​ສູ້​ຊົນ​ເພື່ອ​ບັນ​ລຸແຜນພັດ​ທະ​ນາ​ 5 ປີ ​ຄັ້ງ​ທີ XV.    

ບັນດານັກວິເຄາະໃຫ້ຄໍາເຫັນເພີ່ມວ່າໃນຈໍານວນ 15 ຂໍ້ນັ້ນ ລ້ວນແຕ່ຈະສົ່ງຜົນ​ສະ​ທ້ອນທາງກົງ ແລະ ທາງອ້ອມຕໍ່ພາຍໃນປະເທດຈີນ, ອາຊຽນ ແລະ ປະເທດອື່ນໆ ທົ່ວໂລກຢ່າງຫລີກລ່ຽງບໍ່ໄດ້ ເພາະວ່າຖ້າແຜນພັດທະນາ ເສດຖະກິດ-ສັງຄົມສະບັບ ໃໝ່ໄດ້ ຮັບການປັບປຸງສໍາເລັດ ແລະ ນໍາໃຊ້ຕົວຈິງ ໃນປີ 2026 ຈະເຮັດໃຫ້ມວນມະນຸດ ໄດ້ຊົມໃຊ້ສິນຄ້າຂອງຈີນ ທີ່ມີຄຸນນະພາບສູງຂຶ້ນກວ່າເກົ່າ; ຈາກການລົງທຶນພາຍໃນປະເທດຈີນເອງ ຂ້ອນຂ້າງຕົວເລກສູງຢູ່ແລ້ວ ຈະກະຈາຍການລົງທຶນ ດ້ວຍຄຸນນະພາບໄປສູ່ອາຊຽນ, ປະ ເທດກໍາລັງພັດທະນາ ແລະ ປະເທດດ້ອຍພັດທະນາ ຫລາຍຂຶ້ນພາຍໃຕ້ການຮ່ວມມື ກັບປະເທດນັ້ນໆຢ່າງ​ໃກ້ຊິດ   ຊຶ່ງຈະຊ່ວຍສ້າງຄວາມຈະເລີ່ນຮັ່ງມີ, ສ້າງວຽກເຮັດງານທໍາ, ສ້າງທັກສະ ແລະ ຫລຸດຜ່ອນຄວາມທຸກຍາກ ແຕກໂຕນໃນສັງຄົມໂລກໄປຄຽງຄູ່ກັນ; ຈາກປະ ເທດກໍາລັງພັດທະນາ ແລະ ດ້ອຍພັດທະນາ ເພິ່ງພາອາໄສເຕັກໂນໂລຊີ, ປັນຍາປະດິດ(ເອໄອ) ແລະ ເຄື່ອງມືການຜະລິດຂອງຊາດຕາເວັນຕົກ ຜູກຂາດຝ່າຍດຽວຈະເຮັດໃຫ້ ບັນດາປະເທດເຫລົ່ານັ້ນ ໄດ້ຊົມໃຊ້ເຕັກໂນໂລຊີ ແລະ ຜົນຜະລິດຂອງຈີນດ້ວຍລາຄາຖືກກວ່າ, ມີ ຄຸນນະພາບສູງຂຶ້ນກວ່າເກົ່າ ແລະ ອື່ນໆ.

ດັ່ງທີ່ຮູ້ນໍາກັນ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ 15 ນີ້ ຈະບໍ່ພຽງຫັນປ່ຽນການພັດທະນາພາຍໃນປະເທດຈີນ ຮອບດ້ານເທົ່ານັ້ນ, ແຕ່ຫາກຍັງຈະສົ່ງຜົນທາງບວກຕໍ່ການພັດທະນາ ເປັນຄັ້ງປະຫວັດສາດ ຂອງມະນຸດທົ່ວໂລກກໍວ່າໄດ້. ນັບຈາກນີ້ໄປ ຈະໄດ້ເຫັນສິນຄ້າມີຄຸນນະພາບສູງຂຶ້ນ ແລະ ເຕັກໂນໂລຊີທັນສະໄໝທີ່ສຸດ ໂດຍສະເພາະລົດໄຟຟ້າຂອງຈີນ ຈາກຄວາມບັນຈຸຂອງໝໍ້ໄຟ (ແບດເຕີລີ) ແລ່ນໄດ້ 300-500 ກິໂລແມັດຕໍ່ການສາກໜຶ່ງຄັ້ງ ຈະເພີ່ມຂຶ້ນເຖິງ 600-700 ກິໂລແມັດຕໍ່ການສາກໜຶ່ງຄັ້ງ ພ້ອມອາ ຍຸການໃຊ້ງານ ຂອງລົດໄຟຟ້າຍາວນານຂຶ້ນ; ໂຮງງານອຸດສາຫະກໍາແຫ່ງຕ່າງໆ ດ້ວຍການລົງທຶນຂອງຊາວຈີນບໍ່ວ່າຈະຢູ່ພາຍໃນຈີນ ແລະ ຕ່າງປະເທດຈະຢຶດ ຖືມາດຕະຖານການພັດທະນາຄຸນນະພາບສູງ ຕິດພັນການຫັນເປັນທິດສີຂຽວ ເປັນມິດຕໍ່ສິ່ງແວດລ້ອມ, ໂດຍຄົນ ທ້ອງຖິ່ນມີສ່ວນຮ່ວມຢ່າງໃກ້ຊິດ ແລະ ເອໄອຂອງຈີນ ຈະນໍາໃຊ້ມັດຕິດເຂົ້າກັບວັດຖຸສິ່ງຂອງຕ່າງໆ ໃນຊີວິດປະຈໍາວັນຢ່າງກວ້າງຂວາງ ເຊັ່ນ: ເມືອງ​ອັດສະລິຍະ, ລົດ​ອັດສະລິຍະ, ເຄື່ອງໃຊ້ໃນເຮືອນ​ອັດສະລິຍະ, ໂຮງໝໍ​ອັດສະລິຍະ, ທ່າເຮືອ​ອັດສະລິຍະ, ໂຮງງານອຸດ ສາຫະກໍາ​ອັດສະລິຍະ, ການສຶກສາ​ອັດສະລິຍະ, ໂຮງແຮມ​ອັດສະລິຍະ, ການຄົມມະນາຄົມ​ອັດສະລິຍະ ແລະ ອື່ນໆ ຊຶ່ງເວລານັ້ນສະ​ພາບ​ການ​ຂອງໂລກ ຈະຫັນປ່ຽນຈາກອໍານາດຕາເວັນຕົກຄວບງໍາ ມາດົນນານກ້າວສູ່ເຂດອາຊີ ແລະ ຢູຣາເຊຍເພີ່ມຂຶ້ນຢ່າງຈະແຈ້ງ.

ໂດຍ: ເກີດຂວັນໃຈ ມາລີຈັນສີ

KPL