ຂປລ
ສານລັດຖະທຳມະນູນໄທ ໄດ້ອອກຖະແຫລງການ ປົດຕຳແໜ່ງ ນາຍົກລັດຖະມົນຕີ ສຳລັບ ທ່ານ ນາງ ແພທອງທານ ຊິນນະວັດ ດ້ວຍເຫດຜົນ ລະເມີດມາດຖານ ຈັນຍາບັນ ທາງວິຊາຊີບ.
ຂປລ.ວິທະຍຸ ກະຈາຍສຽງ ຫວຽດນາມ, ວັນທີ 29 ສິງຫາ, ສານລັດຖະທຳມະນູນໄທ ໄດ້ອອກຖະແຫລງການ ປົດຕຳແໜ່ງ ນາຍົກລັດຖະມົນຕີ ສຳລັບ ທ່ານ ນາງ ແພທອງທານ ຊິນນະວັດ ດ້ວຍເຫດຜົນ ລະເມີດມາດຖານ ຈັນຍາບັນ ທາງວິຊາຊີບ.ຂໍ້ຕົກລົງ ດັ່ງກ່າວ ໄດ້ຍົກອອກມາ ພາຍຫລັງ ການໂອ້ລົມ ທາງໂທລະສັບ ຖືກຮົ່ວໄຫລ ເມື່ອເດືອນ ມິຖຸນາ 2025 ໂດຍສະແດງ ໃຫ້ເຫັນວ່າ ທ່ານ ນາງ ແພທອງທານ ມີການກ່າວປາໄສ ທີ່ກໍ່ໃຫ້ເກີດ ການໂຕ້ຖຽງກັນ ໃນຈຸດເວລາ ສະພາບຄວາມເຄັ່ງຕຶງ ຢູ່ຊາຍແດນ ລະຫວ່າງ ໄທ ແລະ ກຳປູເຈຍ ພວມເພີ່ມຂຶ້ນ. ຫລັງຈາກນັ້ນ, ທ່ານ ນາງ ແພທອງທານ ກໍໄດ້ຢັ້ງຢືນ ຄວາມຖືກຕ້ອງ ຂອງເທບບັນທຶກສຽງ ດັ່ງກ່າວແລ້ວ, ພ້ອມທັງ ຢັ້ງຢືນວ່າ ນີ້ແມ່ນສ່ວນໜຶ່ງ “ໃນຍຸດທະສາດ ເຈລະຈາ” ໃນບັນດາ ຊາຍແດນ ກັບ ກຳປູເຈຍ ເພື່ອແນໃສ່ ປົກປັກຮັກສາ ສັນຕິພາບ, ອະທິປະໄຕ ແຫ່ງຊາດ ແລະ ຮັບປະກັນ ຜົນປະໂຫຍດ ໃຫ້ແກ່ ປະຊາຊົນໄທ. ດ້ວຍຄຳຕັດສິນຄັ້ງນີ້, ທ່ານ ນາງ ແພທອງທານ ຈະແມ່ນ ນາຍົກລັດຖະມົນຕີ ຄົນທີ 5 ໃນຮອບ ເວລາ 17 ປີຜ່ານມາ ຖືກປົດຕຳແໜ່ງ ຕາມບັນດາຄຳຕັດສິນ ຂອງສານລັດຖະທຳມະນູນ. ທ່ານ ນາງ ແພທອງທານ ກໍຈະຖືກປົດ ອອກຈາກຕຳແໜ່ງ ນາຍົກລັດຖະມົນຕີ, ຄະນະລັດຖະບານ ຂອງທ່ານ ນາງ ແພທອງທານ ກໍຖືກຍົກເລີກ ເພື່ອເປີດການເລືອກຕັ້ງ ນາຍົກລັດຖະມົນຕີ ຄັ້ງໃໝ່ ແລະ ສ້າງຕັ້ງ ຄະນະລັດຖະບານຊຸດໃໝ່ ໃນໄລຍະ ຈະມາເຖິງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
