ຂປລ. ກອງປະຊຸມໃຫຍ່ແນວລາວສ້າງຊາດ ເມືອງນາຊາຍທອງ ຄັ້ງທີ VIII ໄດ້ໄຂຂຶ້ນຢ່າງເປັນທາງການ ໃນວັນທີ 22 ພຶດສະພາ 2025 ຢູ່ເມືອງນາຊາຍທອງ ນະຄອນຫລວງວຽງຈັນ ພາຍໃຕ້ຄໍາຂວັນ “ເພິ່ມທະວີຄວາມສາມັກຄີປອງດອງບັນດາເຜົ່າ, ຕັ້ງໜ້າປຸກລະດົມຂະບວນການແຂ່ງຂັນຮັກຊາດ ແລະ ພັດທະນາ, ປັບປຸງອົງການແນວລາວສ້າງຊາດ ຕິດພັນກັບວຽກງານ 3 ສ້າງ” ໂດຍການເປັນປະ ທານຂອງ ທ່ານ ສາຄອນ ໃສສະອາດ ປະທານແນວລາວສ້າງຊາດ ເມືອງນາຊາຍທອງ ​ໂດຍ​ມີ ທ່ານ ຖະໜອມ ທຳທອງ ກຳມະການປະຈຳພັກ, ປະທານແນວລາວສ້າງຊາດ ນະຄອນຫລວງວຽງຈັນ, ທ່ານ ສຸລິວັນ ພົມມະຫາໄຊ ເຈົ້າເມືອງນາຊາຍທອງ, ມີຜູ້ຕາງໜ້າຈາກບັນດາຫ້ອງການອ້ອມຂ້າງເມືອງ, ຄະ ນະກຳມະການແນວລາວສ້າງຊາດ ເມືອງນາຊາຍທອງ, ພ້ອມດ້ວຍແຂກຖືກເຊີນ ເຂົ້າຮ່ວມ.

ໃນກອງປະຊຸມ, ໄດ້ຮັບຟັງການຜ່ານຮ່າງບົດລາຍງານ ການເມືອງທັງສອງພາກ ເຊິ່ງຕີລາຄາຄືນຜົນງານ ໃນການຈັດຕັ້ງປະຕິບັດວຽກງານຂອງ ຄະນະກຳມະການແນວລາວສ້າງຊາດເມືອງ ແຕ່ປີ 2021-2025 ເຊັ່ນ: ວຽກງານເຕົ້າໂຮມຄວາມສາມັກຄີປອງດອງ, ວຽກງານການປຸກລະດົມປະຊາຊົນ ເຂົ້າຮ່ວມຂະບວນການຕ່າງໆ ຂອງພັກ-ລັດ, ເສີມຂະຫຍາຍສິດເປັນເຈົ້າຂອງປະຊາຊົນ, ເກັບກຳຫາງສຽງຂອງສັງຄົມ, ວຽກງານການທູດປະຊາຊົນ ເຊິ່ງໄດ້ສະແດງໃຫ້ເຫັນວ່າໃນໄລຍະຜ່ານມາ ຄະນະກຳມະ ການແນວລາວສ້າງຊາດເມືອງ ໄດ້ເອົາໃຈໃສ່ ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ VII ຂອງແນວລາວສ້າງຊາດເມືອງ ເປັນຕົ້ນແມ່ນ 4 ແຜນງານ 6 ໂຄງການ 10 ກິດຈະກໍາ ເຊິ່ງໄດ້ຈັດຕັ້ງປະຕິ ບັດສໍາເລັດ 6 ໂຄງການ ແລະ ກອງປະຊຸມຍັງໄດ້ຍົກໃຫ້ເຫັນດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ຮັບຮອງເອົາແຜນພັດທະນາ ຂອງແນວລາວສ້າງຊາດເມືອງ ປີ 2025-2029 ມີ 3 ແຜນງານ ແລະ 14 ໂຄງການ. ກອງປະຊຸມໃຫຍ່, ໄດ້ແຕ່ງຕັ້ງຄະນະກໍາມະການແນວລາວສ້າງຊາດ ເມືອງຊຸດໃໝ່ ເຊິ່ງປະກອບມີ 45 ທ່ານ, ແຕ່ງຕັ້ງ ທ່ານ  ສາຄອນ ໃສສະອາດ ເປັນປະທານ, ແຕ່ງຕັ້ງຮອງປະທານ 2 ທ່ານ, ຄະນະປະຈຳ 3 ທ່ານ ແລະ ຮອງປະທານທີ່ບໍ່ປະຈຳການ 2 ທ່ານ. ພ້ອມນັ້ນ, ຜູ້ແທນກອງປະຊຸມ ກໍໄດ້ພ້ອມກັນປະກອບຄຳຄິດຄຳເຫັນ ຕໍ່ບັນດາຜົນງານ ແລະ ທິດທາງແຜນການໃນຕໍ່ໜ້າ ຢ່າງກົງໄປກົງມາ ຕື່ມອີກ.

ໂອກາດທີ່ມີຄວາມໝາຍຄວາມສຳຄັນນີ້, ທ່ານປະທານແນວລາວສ້າງຊາດ ນະຄອນຫລວງວຽງຈັນ ແລະ ທ່ານເຈົ້າເມືອງນາຊາຍທອງ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງຄະນະກຳມະ ການແນວລາວສ້າງຊາດເມືອງ ຊຸດເກົ່າ ແລະ ໄດ້ເນັ້ນຕໍ່ກອງປະຊຸມ ໃຫ້ຄະນະກຳມະການ ແນວລາວສ້າງຊາດເມືອງຊຸດໃໝ່ ຈົ່ງສືບຕໍ່ເອົາໃຈໃສ່ສຶກສາຄົ້ນຄວ້າບັນດານິຕິກຳ ທີ່ກ່ຽວຂ້ອງກັບວຽກງານແນວໂຮມ ເປັນຕົ້ນແມ່ນມະຕິ 108/ກມສພ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່, ດຳລັດ 315/ລບ ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ ສປປ ລາວ ເພື່ອສາມາດກຳແໜ້ນ ແລະ ເປັນບ່ອນອີງໃນການເຄື່ອນໄຫວວຽກງານ; ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ປະຊາຊົນໃນທົ່ວເມືອງ ມີຄວາມຮັບຮູ້ເຂົ້າໃຈ ຕໍ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ, ສືບຕໍ່ຈັດຕັ້ງປະຕິບັດ ຂະບວນການສ້າງຄອບຄົວ ແລະ ບ້ານສາມັກຄີປອງດອງ, ຍົກສູງວຽກງານຕິດຕາມກວດກາ, ເກັບກຳຫາງສຽງສັງຄົມ ແລະ ເສິມຂະຫຍາຍສິດເປັນເຈົ້າຂອງປະຊາຊົນ; ປັບປຸງກົນໄກປະສານງານ ແລະ ແບບແຜນວິທີເຮັດວຽກໃຫ້ມີລັກ ສະນະວິທະຍາສາດ ເພື່ອຮ່ວມກັນຈັດຕັ້ງປະຕິບັດວຽກງານ ຂອງແນວລາວສ້າງຊາດ ໃຫ້ມີຄວາມເຂັ້ມແຂງ, ມີຜົນສຳເລັດ ແລະ ຊ່ວຍກັນແກ້ໄຂປະກົດການຫຍໍ້ທໍ້ ທີ່ເກີດຂຶ້ນໃນສັງຄົມ ໃຫ້ຫລຸດໜ້ອຍຖອຍລົງເປັນກ້າວໆ.

KPL