ຂປລ. ໃນວັນທີ 20 ພຶດສະພາ 2025, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມ ລັດຖະມົນຕີເສດຖະກິດອາຊຽນ ກັບປະເທດຄູ່ຮ່ວມເຈລະຈາ ສະໄໝພິເສດ (ແບບທາງໄກ) ຢູ່ກະຊວງອຸດສາຫະກຳ ແລະ ການຄ້າ, ນະຄອນຫລວງວຽງຈັນ.

ກອງປະຊຸມໃນຄັ້ງນີ້, ບັນດາລັດຖະມົນຕີເສດຖະກິດອາຊຽນ ໄດ້ມີການພົບປະກັບ 3 ກອງປະ ຊຸມຄູ່ຮ່ວມເຈລະຈາ ຄື: ກອງປະຊຸມລັດຖະມົນຕີເສດຖະກິດອາຊຽນ ກັບກະຊວງການຄ້າ ສປ ຈີນ;  ກອງປະຊຸມລັດຖະມົນຕີ ເສດຖະກິດອາຊຽນກັບ ກະຊວງເສດຖະກິດ, ການຄ້າ ແລະ ອຸດສາຫະກຳ ຍີ່ປຸ່ນ; ກອງປະຊຸມລັດຖະມົນຕີເສດຖະກິດອາຊຽນ ກັບ ອົດສະຕຣາລີ ແລະ ນິວຊີແລນ. ພາຍໃຕ້ການເປັນປະທານກອງປະຊຸມ ຂອງ ທ່ານ ເຊນາເຕີ ເຕັງກູ ດາຕຸກ ສິຣິ ອຸຕາມາ ຊາຟູນ ລັດຖະມົນຕີກະຊວງລົງທຶນ, ການຄ້າ ແລະ ອຸດສາຫະກຳ ແຫ່ງ ມາເລເຊຍ ໃນຖານະເປັນປະເທດເຈົ້າພາບ ແລະ ປະທານອາຊຽນ ປີ 2025 ແລະ ປະທານຮ່ວມກັບ 3 ຄູ່ຮ່ວມເຈລະຈາ. ກອງປະຊຸມໃນຄັ້ງນີ້, ມີບັນດາລັດຖະ ມົນຕີເສດຖະກິດອາຊຽນ, ລັດຖະມົນຕີກະຊວງການຄ້າ ຕີມໍ ​ແລັດສະເຕ ໃນນາມເປັນປະເທດສັງເກດການ ແລະ ເລຂາທິການໃຫຍ່ອາຊຽນ ເຂົ້າຮ່ວມຢ່າງພ້ອມພຽງ.

ຈຸດປະສົງ ຂອງກອງປະຊຸມໃນຄັ້ງນີ້, ແມ່ນເພື່ອປຶກສາຫາລື ແລະ ແລກປ່ຽນຄໍາຄິດເຫັນຮ່ວມກັນ ກ່ຽວກັບສະພາບຜັນແປ ຂອງເສດຖະກິດ ໃນພາກພື້ນ ແລະ ສາກົນ ໂດຍສະເພາະ ບັນຫາການຂື້ນອັດຕາພາສີ ຂອງລັດຖະບານ ສ ອາເມລິກາ ທີ່ປະກາດ ໃນວັນທີ 2 ເມສາ 2025 ທີ່ຜ່ານມາ. ຜົນຂອງກອງປະຊຸມໃນຄັ້ງນີ້, ບັນດາລັດຖະມົນຕີເສດຖະກິດອາຊຽນ ແລະ ບັນດາລັດຖະມົນຕີປະເທດຄູ່ຮ່ວມເຈລະຈາ ໄດ້ສະແດງເຖິງ ຄວາມເປັນຫ່ວງຕໍ່ກັບສະພາບຜັນແປ ທາງດ້ານເສດຖະກິດໃນພາກພື້ນ ແລະ ສາກົນ ໂດຍສະເພາະການຂຶ້ນອັດຕາພາສີນໍາເຂົ້າຂອງ ສ ອາເມລິກາ. ພ້ອມນັ້ນ, ກອງປະຊຸມຍັງໄດ້ສະແດງເຖິງຈຸດຢືນ ທີ່ສະໜັບສະໜູນລະບົບ ການຄ້າຫລາຍຝ່າຍ ພາຍໃຕ້ອົງການການຄ້າໂລກ ແລະ ກອງປະຊຸມຍັງໄດ້ເນັ້ນເຖິງ ການເພີ່ມທະວີການຮ່ວມມື ກັບບັນດາປະເທດຄູ່ຮ່ວມພັດທະນາ ເພື່ອສ້າງຄວາມເຂັ້ມແຂງ ແລະ ຍືດຍຸນໃຫ້ ແກ່ເສດຖະກິດພາຍໃນອາຊຽນ.

ພາຍຫລັງການປຶກສາຫາລື, ກອງປະຊຸມໄດ້ເຫັນດີຮັບຮອງເອົາ ຮ່າງຖະແຫລງການຮ່ວມທັງ ສາມກອງປະຊຸມ ໂດຍເນື້ອໃນຂອງຖະແຫລງການ ແມ່ນຮຽກຮ້ອງໃຫ້ທຸກປະເທດສະມາຊິກ ເຄົາລົບ ແລະ ຮັກສາລະບຽບຫລັກການ ພື້ນຖານຂອງອົງການການຄ້າໂລກ ແລະ ເພີ່ມທະວີການຮ່ວມມື ໃນຂອບການຄ້າເສລີທີ່ມີຢູ່ແລ້ວ ແລະ ໃໝ່ ເຊັ່ນ: ສັນຍາການເປັນຄູ່ຮ່ວມມື ທາງດ້ານເສດຖະກິດຮອບດ້ານ ລະດັບພາກພື້ນ ຫລື ອາເຊັບ ແລະ ສັນຍາການຄ້າເສລີອາຊຽນບວກ.

ຂ່າວ: ໄພວັນ

ພາບ: ສູນທອງ

KPL