ຂປລ
ການສົນທະນາ ດ້ານເສດຖະກິດ ການເງິນ ລະດັບສູງ ລະຫວ່າງ ສປ ຈີນ-ຝຣັ່ງ ຄັ້ງທີ 10 ໄດ້ຈັດຂຶ້ນ ຢູ່ນະຄອນຫລວງປາຣີ ຂອງຝຣັ່ງ.
ຂປລ.ວິທະຍຸສາກົນແຫ່ງ ສປ ຈີນ, ວັນທີ 15 ພຶດສະພານີ້, ການສົນທະນາ ດ້ານເສດຖະກິດ ການເງິນ ລະດັບສູງ ລະຫວ່າງ ສປ ຈີນ-ຝຣັ່ງ ຄັ້ງທີ 10 ໄດ້ຈັດຂຶ້ນ ຢູ່ນະຄອນຫລວງປາຣີ ຂອງຝຣັ່ງ. ຈາກນັ້ນ ທ່ານ ເຫີ ລີ້ເຟີ່ງ, ຮອງນາຍົກລັດຖະມົນຕີຈີນ, ຜູ້ຮັບຜິດຊອບຝ່າຍ ສປ ຈີນ ໃນການສົນທະນາ ແລະ ທ່ານ ເອຣິກ ລອມບາດ ລັດຖະມົນຕີກະຊວງເສດຖະກິດ, ການເງິນ, ອຸດສາຫະກຳ ແລະ ອະທິປະໄຕ ດ້ານດີຈີຕອນຝຣັ່ງ ໄດ້ຮ່ວມກັນ ເປັນປະທານການສົນທະນາຄັ້ງນີ້. ໂດຍສອງຝ່າຍ ໄດ້ເນັ້ນໜັກວ່າ: ຕ້ອງຮ່ວມກັນປົກປັກຮັກສາສະພາບແວດລ້ອມ ດ້ານເສດຖະກິດ ການຄ້າ ສາກົນ ທີ່ເປີດກວ້າງ ແລະ ຮ່ວມມືກັນ, ສຸມກຳລັງ ເຂົ້າໃນການສ້າງ ສະພາບແວດລ້ອມ ການຄ້າ ແລະ ການລົງທຶນທີ່ດີ, ຊຸກຍູ້ການຮ່ວມມື ທີ່ຕິດແທດຕົວຈິງ ໃນຂົງເຂດເສດຖະກິດ ການເງິນ ລະຫວ່າງ ສອງປະເທດ ໃຫ້ໄດ້ຮັບຜົນສຳເລັດທີ່ຕັ້ງໜ້າຫຼາຍກວ່າເກົ່າ. ໃນໄລຍະການສົນທະນາຄັ້ງນີ້, ສອງຝ່າຍໄດ້ລົງເລິກ ການແລກປ່ຽນ ຄວາມເຫັນ ທີ່ປິ່ນອ້ອມຫລາຍຫົວຂໍ້ ແລະ ໄດ້ລົງນາມເອກະສານການຮ່ວມມື ລະຫວ່າງ ສປ ຈີນ-ຝຣັ່ງ ກ່ຽວກັບ ຊີ້ນສັດປີກ, ພໍ່ພັນແມ່ພັນສັດປີກ ແລະ ສຳລັບ ເພາະພັນສັດປີກ. ຫລັງຈາກ ກອງປະຊຸມ, ທ່ານ ເຫີລີ້ເຟີ່ງ ແລະ ທ່ານ ເອຣິກ ລອມບາດ ໄດ້ຮ່ວມກັນເຂົ້າຮ່ວມງານສຳມະນານັກທຸລະກິດຈີນ-ຝຣັ່ງ ແລະ ຕ່າງໄດ້ກ່າວຄຳປາໄສ ຕໍ່ງານຄັ້ງນີ້ ຕາມລຳດັບ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
