*“ເອກະລັກວັດພູ ກຸຫລາບປາກເຊ ກາເຟປາຊ່ອງ ນ້ຳຂອງໂຕນຄອນ ສີພັນດອນລືນາມ” ເປັນຄຳຂວັນຂອງຈຳປາສັກ, ດິນແດນທ່ີອຸດົມສົມບູນໄປດ້ວຍຊັບພະຍາກອນທຳມະຊາດ ແລະ ສະຖານທີ່ທ່ອງທ່ຽວທີ່ມີຊື່ສຽງໂດ່ງດັງຫລາຍແຫ່ງ ບໍ່ວ່າຈະເປັນຜາສາດຫີນວັດພູຈຳປາສັກ, ມະຫານະທີສີພັນດອນ, ກາເຟປາກຊ່ອງ, ພູສ່າເຫລົ້າ, ນ້ຳຕົກຕາດຂະມຶດ (ບ້ານດົງຫລວງ), ນ້ຳຕົກຕາດສົມພະນິດ (ຫລີ່ຜີ), ຕາດຜາສ້ວມ, ຕາດເຍືອງ ແລະ ສະຖານທີ່ອື່ນໆອີກຫລາຍແຫ່ງ. ເມື່ອເວົ້າ ເຖິງສະຖານທີ່ທ່ອງທ່ຽວຢູ່ແຂວງ ຈຳປາສັກແລ້ວ ມື້ນ້ີຜູ້ຂຽນຂໍເລົ່າເຖິງນ້ຳຕົກຕາດຂະມຶດ ອີກໜຶ່ງສະຖານທ່ີທ່ອງທ່ຽວທຳມະຊາດທີ່ໂດ່ງດັງຂອງເມືອງປາກຊ່ອງ.

    ຕາດຂະມຶດ ຕັ້ງຢູ່ບ້ານໜອງຫລວງ ເມືອງປາກຊ່ອງ ແຂວງຈຳປາສັກ ຫ່າງຈາກເທສະບານເມືອງປາກຊ່ອງ ປະມານ 10 ກິໂລ ແມັດ, ເສັ້ນທາງເຂົ້າໄປຫາຕາດແມ່ນສະດວກສະບາຍເປັນນ້ຳຕັກຕາດທີ່ສູງຊັນ ແລະ ມີຫລາຍຊັ້ນ, ຊ່ອນຕົວຢູ່ໃນກາງປ່າສະຫງວນ ແຫ່ງຊາດດົງຫົວສາວ. ຕາດຂະມຶດນັບວ່າເປັນອີກໜຶ່ງສະຖານທ່ີ່ທ່ອງທ່ຽວທີ່ສ້າງຄວາມຕື່ນຕາຕ່ືນໃຈໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດໂດຍແຕ່ລະມ້ືມີນັກທ່ອງທ່ຽວໄປທ່ຽວເປັນຈຳນວນຫລາຍ ແລະ ນັກທ່ອງທ່ຽວນິຍົມໄປຫລາຍສຸດໄລຍະລະດູຝົນ ເພາະນ້ຳຈະຫລາຍຍິ່ງເຮັດໃຫ້ຕາດດ່ັງກ່າວງົດງາມຫາອັນປຽບບໍ່ໄດ້ ແລະ ອີກຢ່າງໜຶ່ງຄວາມພິເສດຂອງສະຖານທີ່ດັ່ງກ່າວ ທີ່ນັກທ່ອງທ່ຽວໄປຮອດແລ້ວພາດບໍ່ໄດ້ນັ້ນຄືຈະຕ້ອງໄດ້ຂີ່ສະລິງເພື່ອຊົມນ້ຳຕົກຕາດດ່ັງກ່າວ ໂດຍຜ່ານນ້ຳຕົກຕ້ັງແຕ່ຊ້ັນເທິງລົງຫາຊ້ັນລຸ່ມສຸດລວມທັງໝົດ 8 ເສັ້ນ, ສ່ວນດ້ານລຸ່ມຂອງນ້ຳຕົກຕາດ ຍັງມີເຮືອນຕົ້ນໄມ້ໄວ້ບໍລິການນັກທ່ອງທ່ຽວໄດ້ພັກຜ່ອນຢ່ອນອາລົມ ຊົມທຳມະຊາດທີ່ຫາອັນປຽບບໍ່ໄດ້, ໃນນັ້ນຍັງມີກາເຟໄວ້ຄອຍບໍລິການລູກຄ້າ, ຜ່ອນຄາຍຄວາມອິດເມື່ອຍກັບບັນຍາກາດທີ່ອ້ອມຮອບໄປດ້ວຍປ່າໄມ້ອັນຂຽວງາມອຸ່ນທຸ່ມ ແລະ ຍັງເປັນຈຸດພົບກັນລະຫວ່າງແມ່ນ້ຳສອງສາຍທີ່ໄຫລມາຈາກຕາດຂະມຶດ ແລະ ຕາດເສືອ. 

    ສຳລັບນັກທ່ອງທ່ຽວທີ່ມາຮອດ ສະຖານທີ່ດັ່ງກ່າວແລ້ວ ແມ່ນສາມາດເຂົ້າຮ່ວມກິດຈະກຳຍ່າງປ່າຈາກສະຖານທີ່ພັກ ໄປຍັງນ້ຳຕົດຕາດເສືອນ້ຳຕົກທີ່ສວຍງາມອີກແຫ່ງອີກແຫ່ງມີລວງສູງປະມານ 40 ແມັດ ແລະ ສາມາດຍ່າງລອດຜ່ານນ້ຳຕົກຕາດໄດ້ອີກດ້ວຍ, ສຳລັບທ່ານໃດມັກສາຍລຸຍບອກເລີຍວ່າບໍ່ຄວນພາດ ກັບຕາດຂະມຶດແຫ່ງນີ້.

ໂດຍ:ແສງສະຫວັນ

KPL