ຂປລ. ບໍລິສັດ ອາໄລອານສ໌ ລອນດຣີ (Alliance Laundry Systems) ສົ່ງເສີມຮູບແບບ "Seed Store" ມຸ່ງໜ້າຂະຫຍາຍ 300 ສາຂາທົ່ວອາຊຽນ, ພ້ອມເປົ້າໝາຍຖືສ່ວນແບ່ງຕະຫລາດ 70% ແລະ ຕັ້ງປະເທດໄທ ໃຫ້ເປັນສູນກາງນະວັດຕະກຳຜະລິດຕະພັນໃນພາກພື້ນ.




ບໍລິສັດ ອາໄລອານສ໌ ລອນດຣີ ໄດ້ເປີດເຜີຍວ່າ: ທິດທາງຂອງທຸລະກິດຮ້ານຊັກເຄື່ອງ(ຊັກຜ້າ) ໃນປີ 2025 ຄາດວ່າຈະເຕີບໂຕ ເນື່ອງຈາກການຟື້ນຕົວທີ່ດີຂອງການທ່ອງທ່ຽວ, ບໍລິສັດໄດ້ປະກາດຍຸດທະສາດ ໃນການຂະຫຍາຍທຸລະກິດໂດຍໃຊ້ຮູບແບບ "Seed Store" ມຸ່ງເປົ້າເຂົ້າສູ່ຕະຫລາດ 4 ປະເທດ(VIP+)ໃນພາກພື້ນຄື: ຫວຽດນາມ, ອິນໂດເນເຊຍ, ຟິລິບປິນ ແລະ ກຳປູເຈຍ ຊຶ່ງເປັນຕະ ຫລາດທີ່ມີທ່າແຮງສູງໃນອາຊີຕາເວັນອອກສ່ຽງໃຕ້ ທີ່ກຳລັງພັດທະນາອຸດສາຫະກຳຮ້ານຊັກເຄື່ອງ ດ້ວຍເຄື່ອງອຸດສາຫະກຳ. ບໍລິສັດມີແຜນເປີດ 300 ສາຂາໃໝ່ ໂດຍມີເປົ້າໝາຍທີ່ຈະຄອບຄອງ ສ່ວນແບ່ງຕະຫລາດປະມານ 70% ແລະ ຂະຫຍາຍ StarLab ໃນຈັງຫວັດຊົນບຸລີ (ປະເທດໄທ) ໃຫ້ເປັນສູນວິໄຈ ແລະ ການພັດທະນາຜະລິດຕະພັນຊັກເຄື່ອງ ໃນອາຊີ ເພື່ອຮອງຮັບການເຕີບໂຕຂອງຕະຫລາດໃນພາກພື້ນ.





ທ່ານ Eddie Tay ຜູ້ອຳນວຍການສູງສຸດຂອງພາກພື້ນອາຊີ-ປາຊິຟິກ ບໍລິສັດ Alliance Laundry Systems LLC, ຜູ້ຜະລິດ ແລະ ຈຳໜ່າຍເຄື່ອງຊັກຜ້າອຸດສາຫະກຳ ທີ່ໃຫຍ່ທີ່ສຸດໃນໂລກໄດ້ກ່າວວ່າ: ຕະຫລາດຮ້ານຊັກຜ້າສາກົນ ຄາດວ່າຈະເຕີບໂຕໃນປີ 2025 ເນື່ອງຈາກການຟື້ນຕົວຂອງພາກການທ່ອງທ່ຽວ ແລະ ການເຕີບໂຕຢ່າງຕໍ່ເນື່ອງໃນຕະຫລາດຕ່າງໆເຊັ່ນ: ອາເມລິກາ, ຢູໂຣບ, ຕາເວັນອອກກາງ ແລະ ອາຊີ-ປາຊິຟິກ (APAC) ໃນປີ 2024. ໃນປີນີ້, ບໍລິສັດໄດ້ກຽມພ້ອມເດີນໜ້າດ້ວຍແຜນການ Seed Store ເພື່ອເຂົ້າສູ່ຕະຫລາດໃນອາຊຽນ ໂດຍໃນເບື້ອງຕົ້ນຈະເນັ້ນໃສ່ 4 ປະເທດ VIP+ ເຊັ່ນ: ຫວຽດນາມ, ອິນໂດເນເຊຍ, ຟິລິບປິນ ແລະ ກໍາປູເຈຍ ເລັງເປົ້າໝາຍຄືການເປີດ 300 ສາຂາໃໝ່ ແລະ ຄອງສ່ວນແບ່ງຕະຫລາດໃຫ້ໄດ້ປະມານ 70%. ນີ້ເປັນຄວາມທ້າທາຍທີ່ສໍາຄັນ, ໂດຍສະເພາະໃນຕະຫລາດຫວຽດນາມ ແລະ ຟີລິບປິນ ເຊິ່ງຖືວ່າເປັນຕະຫລາດໃໝ່ ເນື່ອງຈາກເປັນບ່ອນທີ່ນັກລົງທຶນ ສ່ວນໃຫຍ່ຄຸ້ນເຄີຍກັບ ການໃຊ້ເຄື່ອງຈັກຂະໜາດນ້ອຍ ຫລື ເຄື່ອງຈັກສຳລັບທຸລະກິດທົ່ວໄປ ຫລາຍກວ່າເຄື່ອງຈັກອຸດສາຫະກໍາທີ່ບໍລິສັດຈະຂາຍ. ບໍລິສັດ ອາໄລອານສ໌ ລອນດຣີ ໄດ້ລົງ ທຶນ 150 ລ້ານບາດ ເພື່ອຂະຫຍາຍຫ້ອງທົດລອງ StarLab ໃນຈັງຫວັດຊົນບູລີ ເພື່ອຍົກລະດັບໃຫ້ເປັນສູນກາງການຄົ້ນຄວ້ານະວັດຕະກໍາ ແລະ ການພັດທະນາຜະລິດຕະພັນສໍາລັບເຄື່ອງຈັກຊັກຜ້າອາຊີ, ຄາດວ່າຈະສໍາເລັດປະມານເດືອນເມສາປີນີ້. ນີ້ຖືເປັນກ້າວສໍາຄັນໃນການພັດທະນາຜະລິດຕະພັນ ແລະ ນໍາສະເໜີວິທີແກ້ໄຂທີ່ກ້າວໜ້າກວ່າເກົ່າເຂົ້າສູ່ຕະຫລາດ ໂດຍມີເປົ້າໝາຍການເຕີບໂຕຂອງຍອດຂາຍ 10% ໃນຕະຫລາດ APAC ໃນປີນີ້.




ທ່ານ Sukri Kirai, ຜູ້ອໍານວຍການຝ່າຍຂາຍ ປະຈຳອາຊີຕາເວັນອອກສ່ຽງໃຕ້ ຂອງ Alliance Laundry Systems LLC, ໄດ້ກ່າວວ່າ: ຕະຫລາດໄທ ຍັງເປັນຕະຫລາດທີ່ໜ້າດຶງດູດທີ່ສຸດ ສໍາລັບການລົງທຶນໃນບັນດາປະເທດ ອາຊີຕາເວັນອອກສ່ຽງໃຕ້ ເນື່ອງຈາກຜູ້ບໍລິໂພກໃນໄທເປີດໃຈ ແລະ ເຂົ້າ ໃຈຮູບແບບທຸລະກິດ ຮ້ານຊັກຜ້າອັດຕະໂນມັດເປັນຢ່າງດີ. ບໍລິສັດຈຶ່ງຈະສືບຕໍ່ສົ່ງເສີມການຂະຫຍາຍຕະຫລາດໄປສູ່ຫລາຍໆຈັງຫວັດ ຜ່ານໂຄງການ "ໜຶ່ງເມືອງໜຶ່ງຮ້ານຊັກຜ້າ" ຫລື “One District One Laundromat” ປະສົບຜົນສໍາເລັດຫລາຍໃນສອງປີທີ່ຜ່ານມາ, ຈາກການເປີດຮ້ານຊັກຜ້າໃໝ່ ໄດ້ເກືອບທຸກເມືອງນອກເຂດຕົວເມືອງໃຫຍ່. ງົບປະມານທາງການຕະຫລາດ ໄດ້ເພີ່ມຂຶ້ນເພື່ອເນັ້ນໃສ່ກຸ່ມຜູ້ໃຊ້ ຫລື ກຸ່ມລູກຄ້າເປົ້າໝາຍເພື່ອສ້າງຖານລູກຄ້າ, ເຂົ້າໃຈຜົນປະໂຫຍດຂອງຮ້ານຊັກເຄື່ອງເມື່ອທຽບກັບການຊັກເຄື່ອງຢູ່ບ້ານ, ລວມທັງຄວາມສະອາດ, ການປະຢັດຕົ້ນທຶນ ແລະ ການປະຢັດເວລາ. ປັດຈຸບັນ, ມີຮ້ານຊັກຜ້າປະມານ 3.708 ແຫ່ງໃນປະເທດໄທ ທີ່ນຳໃຊ້ເຄື່ອງຈັກຂອງ ALS ແລະ ຄາດວ່າຈໍານວນນີ້ຈະເພີ່ມຂຶ້ນເຖິງ 4.400 ແຫ່ງພາຍໃນປີ 2025 ເຊິ່ງມີອັດຕາການເຕີບໂຕປະມານ 19% ຈາກປີ 2024. ໃນຫ້າປີຂ້າງໜ້າ, ຕະຫລາດຮ້ານສະດວກຊັກໃນອາຊີຕາເວັນອອກສ່ຽງໃຕ້ ຄາດວ່າຈະເຕີບໂຕຢ່າງຫລວງຫລາຍເນື່ອງຈາກ 2 ປັດໄຈຫລັກຄື: ບັນດາປະເທດ VIP+ ທີ່ມີປະຊາກອນລວມປະມານ 489 ລ້ານຄົນ ຈະກາຍເປັນຕະຫລາດໃຫຍ່ທີ່ສຸດໃນພາກພື້ນ; ຕະຫລາດໃນສິງກະໂປ ແລະ ມາເລເຊຍ ຈະປ່ຽນໄປສູ່ການຊື້ເຄື່ອງຈັກທົດແທນຕ່າງໆຫລາຍຂຶ້ນ.




ທ່ານ Benjamin Leo Dobbs ຜູ້ອໍານວຍການຝ່າຍບໍລິຫານປະຈຳພາກພື້ນອາຊີ-ປາຊີຟິກ ຂອງ ບໍລິສັດ ອາໄລອານສ໌ ລອນດຣີ ໄດ້ກ່າວວ່າ: ຫລັງຈາກ 117 ປີແຫ່ງຄວາມສໍາເລັດ, ພວກເຮົາໄດ້ຈັດງານ 'ALS Distributor Awards 2024-Southeast Asia' ເພື່ອຂອບໃຈຕົວແທນຈໍາໜ່າຍຂອງພວກເຮົາໃນອາຊີຕາເວັນອອກສ່ຽງໃຕ້ ແລະ ໄດ້ເປີດໂຕເຄື່ອງຊັກ 'Stax-X' ຮຸ່ນໃໝ່, ເປັນເຄື່ອງຊັກຜ້າແບບຝາດ້ານເທິງທີ່ໃຊ້ງານງ່າຍ ພ້ອມລະບົບປຸ່ມກົດສີຂາວ ອອກແບບມາເພື່ອປະຢັດພື້ນທີ່ໃນການໃຊ້ງານ ໂດຍມີ 2 ຂະໜາດຄື: Stax-X 30lb ແລະ Stax-X 50lb. ນອກຈາກນີ້, ບໍລິສັດຍັງເປີດໂຕ ເຄື່ອງຈັກຊັກ-ອົບແຫ້ງຮຸ່ນໃໝ່ ທີ່ຊ່ວຍໃຫ້ລູກຄ້າຊັກ ແລະ ອົບແຫ້ງເຄື່ອງນຸ່ງ ໃນເຄື່ອງດຽວພາຍໃນເວລາໜຶ່ງຊົ່ວໂມງ ໂດຍບໍ່ຕ້ອງຍ້າຍເຄື່ອງນຸ່ງໄປມາລະຫວ່າງເຄື່ອງຈັກ.




ນອກຈາກການຂະຫຍາຍຕະຫລາດແລ້ວ, ALS ໃຫ້ຄວາມສໍາຄັນກັບຄວາມຍືນຍົງໂດຍການ ຈັດຕັ້ງມາດຕະການຕ່າງໆ ເພື່ອຫລຸດຜົນກະທົບຕໍ່ສິ່ງແວດລ້ອມເຊັ່ນ: ການຣີໄຊເຄີນເຈ້ຍ ແລະ ຂີ້ເຫຍື້ອປລາສຕິກ, ການນຳນໍ້າກັບມາໃຊ້ໃໝ່ໃນຫ້ອງທົດລອງ, ການຕິດຕັ້ງແຜງພະລັງງານແສງຕາເວັນເທິງຫລັງຄາໂຮງງານ(ໂຊລ່າເຊວ) ແລະ ການຊື້ສິນຄ້າຈາກຜູ້ສະໜອງພາຍໃນທ້ອງຖິ່ນ ແລະ ພາກພື້ນ ເຖິງ 72%  ເພື່ອຫລຸດຜ່ອນການປ່ອຍກາສກາກບອນ ຫລື ອາຍພິດຈາກພາວະເຮືອນແກ້ວ ທີ່ເກີດຈາກຂະບວນການຂົນສົ່ງສິນຄ້າ.
ສໍາລັບຂໍ້ມູນເພີ່ມຕື່ມ, ກະລຸນາຕື່ມຂໍ້ມູນ ແລະ ຄໍາຖາມຂອງທ່ານຜ່ານ contact form ແລະ ຕົວແທນຂອງ ALS ຈະຕິດຕໍ່ກັບໂດຍໄວທີ່ສຸດ.