ຂປລ. ໃນລະຫວ່າງເດືອນກຸມພາ ຫາ ເດືອນມີນາ 2025 ນີ້,  ກະຊວງສຶກສາທິການ ແລະ ກິລາ (ສສກ) ໂດຍໄດ້ຮັບການສະໜັບສະໜູນ ຈາກລັດຖະບານອົດສະຕຣາລີ ຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດ ການເຂົ້າເຖິງການສຶກສາຂັ້ນພື້ນຖານໃນ ສປປ ລາວ (ແຜນງານບີຄວາ) ຮ່ວມມືກັບຜູ້ຊ່ຽວຊານດ້ານຄວາມພິ ການທາງດ້ານສາຍຕາ ຈັດຝຶກອົບຮົມປະຖົມນິເທດ ແລະ ສະໜັບສະໜູນທີມງານ ພັດທະນາຊັບພະຍາກອນ ຢູ່ທີ່ວິທະຍາໄລຄູສະຫວັນນະເຂດ. 

ທ່ານ ນາງ ວົງເດືອນ ໂອໃສ  ຫົວໜ້າກົມສ້າງຄູ ກະຊວງສຶກສາທິການ ແລະ ກິລາ ໄດ້​ໃຫ້​ຮູ້ວ່າ: ການພັດທະນາວິຊາຊີບຄູແບບຕໍ່ເນື່ອງ  ແມ່ນມີຄວາມສຳຄັນຕໍ່ການເສີມສ້າງທັກສະ ແລະ ຄວາມຮູ້ຂອງຄູ ຕະຫລອດຊີວິດ ການສອນຂອງເຂົາເຈົ້າ. ໃນຕົ້ນປີ 2024, ກົມສ້າງຄູ ໄດ້ສ້າງຕັ້ງທີມງານ ພັດທະນາຊັບພະຍາກອນ ໃນ 3 ວິທະຍາໄລຄູ ເປົ້າໝາຍຄື: ວິທະຍາໄລຄູຫລວງນ້ຳທາ, ວິທະຍາໄລຄູຄັງໄຂ ແລະ ວິທະຍາໄລຄູ ສະຫວັນນະເຂດ. ພາລະບົດບາດຂອງເຂົາເຈົ້າ ແມ່ນພັດທະນາຊັບພະຍາກອນ ສຳລັບການພັດທະນາວິຊາຊີບຄູ ທີ່ສາມາດນຳໃຊ້ໄດ້ ແລະ ນຳໃຊ້ໄດ້ງ່າຍ ສໍາລັບຄູສອນຊັ້ນປະຖົມ ແລະ ຜູ້ເຮັດວຽກ ສຶກສານິເທດ. ສຳລັບປີ 2025 ຄູສອນ 6 ທ່ານ ຈາກທີມງານພັດທະນາ ຊັບພະຍາກອນ ແຂວງສະຫວັນນະເຂດ ຈະສ້າງຊຸດອຸປະກອນຊ່ວຍເຫລືອຄູໂມດູນ ສຳລັບການຊ່ວຍເຫລືອນັກຮຽນ ພິການໃນຫ້ອງຮຽນ, ຊຸດອຸປະກອນຊ່ວຍເຫລືອຄູ  ແມ່ນຊັບພະຍາກອນ ສຳລັບການພັດທະນາວິຊາຊີບຄູ ແບບຕໍ່ເນື່ອງທໍາອິດທີ່ທີມງານ ພັດທະນາຊັບພະຍາກອນ ໄດ້ຖືກມອບໝາຍໃຫ້ສ້າງ, ຊຸດອຸປະກອນຊ່ວຍເຫລືອຄູ ປະກອບດ້ວຍໂມດູນແບບດ່ຽວ, ແຕ່ລະໂມດຸນ ເນັ້ນໃສ່ທັກສະການສອນແບບສະເພາະ ເຊິ່ງບັນດາໂມດູນ ໄດ້ໃຫ້ຄໍາແນະນໍາທີ່ເປັນປະໂຫຍດ ແລະ ວິທີການປະຕິບັດ ເພື່ອຕອບສະໜອງສິ່ງທ້າທາຍ ໃນການສອນ ທົ່ວໄປ ແລະ ສົ່ງເສີມທັກສະການສິດສອນ. ສະນັ້ນ, ຄູສອນ ແລະ ຜູ້ເຮັດວຽກສຶກສານິເທດ ສາມາດເລືອກໂມດູນ ຈາກຊຸດອຸປະກອນຊ່ວຍເຫລືອຄູ ທີ່ສອດຄ່ອງກັບຄວາມຕ້ອງການ ການຮຽນຮູ້ຂອງ ເຂົາເຈົ້າຫລາຍທີ່ສຸດ. ຫົວຂໍ້ຂອງໂມດູນ ໄດ້ຖືກກໍານົດໂດຍອີງໃສ່ຂໍ້ມູນ ແລະ ຄໍາຄິດເຫັນທີ່ເກັບກໍາໂດຍຜ່ານ ການຕິດຕາມດ້ວຍລະບົບ ການພັດທະນາວິຊາຊີບຄູແບບຕໍ່ເນື່ອງ, ປະສົມປະສານ ຄວາມເຂົ້າໃຈຈາກຄູ ແລະ ທີມງານຝຶກອົບຮົມຄູ ໃນຂັ້ນສູນກາງ ແລະ ຂັ້ນທ້ອງຖິ່ນ. ຫົວຂໍ້ດັ່ງກ່າວ ຍັງສອດຄ່ອງກັບບູລິມະສິດ ທີ່ຕ້ອງການພັດທະນາຂອງກະ ຊວງສຶກສາທິການ ແລະ ກິລາ ໃນແຜນພັດທະນາຂະແໜງການສຶກສາ ແລະ ກິລາ ປີ 2026-2030. ຂໍ້ມູນການຕິດຕາມໃນລະບົບ ການພັດທະນາວິຊາຊີບຄູ ສະແດງໃຫ້ເຫັນວ່າ ຄູພົບຄວາມຫຍຸ້ງຍາກໃນການສອນນັກຮຽນ ທີ່ມີຄວາມຕ້ອງການໃຫ້ຊ່ວຍເຫລືອທີ່ແຕກຕ່າງກັນ.

ທ່ານ ນາງ ວາເນັດຊ້າ ເຮັກກາທີ້ ເລຂາເອກ ສະຖານທູດອົດສະຕຣາລີ ປະຈຳລາວ ໄດ້ກ່າວວ່າ: ເດັກນ້ອຍພິການຜະເຊີນກັບອຸປະສັກ ໃນການເຂົ້າເຖິງການສຶກສາ ທີ່ມີຄຸນນະພາບໃນ ສປປ ລາວ, ລວມທັງ ຄວາມເຊື່ອ ແລະ ທັດສະນະຄະຕິທີ່ໃນທາງລົບກ່ຽວກັບ ສາເຫດຂອງຄວາມພິການ ແລະ ຄວາມສາມາດຂອງເຂົາເຈົ້າ. ຄູສອນຫລາຍທ່ານໄດ້ສະແດງຄວາມປາຖະໜາ ທີ່ຈະຮຽນຮູ້ວິທີການສິດສອນ ທີ່ມີປະສິດທິພາບ ເພື່ອເອົາຊະນະອຸປະສັກເຫລົ່ານີ້. ການຮັບປະກັນວ່າ ເດັກນ້ອຍທຸກຄົນ ດຍສະເພາະແມ່ນຜູ້ທີ່ດ້ອຍໂອກາດ ໄດ້ມີສ່ວນຮ່ວມ ແລະ ເຕີບໃຫຍ່ໃນໂຮງຮຽນ ແມ່ນຄໍາມຸ່ງຫວັງຮ່ວມກັນຂອງ ສສກ ແລະ ລັດຖະບານ ອົດສະຕຣາລີ.

KPL