ຂປລ
ພາຍໃຕ້ການນໍາພາ-ຊີ້ນຳອັນສະຫລາດສ່ອງໃສຂອງພັກ ກໍຄືອົງການຈັດຕັ້ງຕ່າງໆ ໄດ້ມີແຜນພັດທະນາເສດຖະກິດ-ສັງຄົມ ເຫັນໄດ້ວຽກງານພັດທະນາແກ້ໄຂ້ຄວາມທຸກຍາກຂອງປະຊາຊົນເປັນວຽກງານສຳຄັນ ໂດຍໄດ້ສົ່ງເສີມການຜະລິດກະສິກຳການປູກ-ການລ້ຽງ ເພື່ອຂາຍກາຍເປັນສິນຄ້າ ເຮັດໃຫ້ຊີວິດການເປັນຢູ່ຂອງປະຊາຊົນ ນັບມື້ດີຂຶ້ນເປັນກ້າວໆ.
*ພາຍໃຕ້ການນໍາພາ-ຊີ້ນຳອັນສະຫລາດສ່ອງໃສຂອງພັກ ກໍຄືອົງການຈັດຕັ້ງຕ່າງໆ ໄດ້ມີແຜນພັດທະນາເສດຖະກິດ-ສັງຄົມ ເຫັນໄດ້ວຽກງານພັດທະນາແກ້ໄຂ້ຄວາມທຸກຍາກຂອງປະຊາຊົນເປັນວຽກງານສຳຄັນ ໂດຍໄດ້ສົ່ງເສີມການຜະລິດກະສິກຳການປູກ-ການລ້ຽງ ເພື່ອຂາຍກາຍເປັນສິນຄ້າ ເຮັດໃຫ້ຊີວິດການເປັນຢູ່ຂອງປະຊາຊົນ ນັບມື້ດີຂຶ້ນເປັນກ້າວໆ. ເໝືອນດັ່ງຄອບຄົວທ່ານ ພັນທະບູນ ວົງໄຊ ທີ່ເປັນຄອບຄົວຕົວແບບດ້ານການລ້ຽງງົວ ຢູ່ບ້ານໂພນຫໍ ເມືອງໂພນໂຮງ ແຂວງວຽງຈັນ ມີລາຍຮັບຈາກການລ້ຽງງົວຂາຍ 200 ລ້ານກວ່າກີບຕໍ່ປີ.
ທ່ານ ພັນທະບູນ ວົງໄຊ ໄດ້ປະກອບຄຳເຫັນຕ່ໍກອງປະຊຸມໃຫຍ່ ຜູ້ແທນອົງຄະນະພັກເມືອງໂພນໂຮງ ຄັ້ງທີ VIII ເມື່ອບໍ່ດົນມານ້ີວ່າ: ຟາມຂອງຕົນຕັ້ງຢູ່ບ້ານໂພນຫໍ ເມືອງໂພນໂຮງ ເຊິ່ງໄດ້ເລີ່ມຕົ້ນລ້ຽງງົວມາແຕ່ປີ 2018 ໂດຍໄດ້ຊື້ພ່ໍ ແລະ ແມ່ພັນນຳເຂົ້າມາຈາກປະເທດ ເພື່ອນບ້ານໄທ ເປັນງົວລູກປະສົມບາມັນ 40 ໂຕ ໃນນີ້, ເປັນແມ່ພັນ 20 ໂຕ ລູກງົວຕິດມາ 19 ໂຕ ແລະ ພໍ່ພັນ 1 ໂຕ. ໃນປີ 2020 ໄດ້ນໍາເຂົ້າຕື່ມອີກ 5 ໂຕ ລວມເປັນ 45 ໂຕ. ເນື້ອທີ່ຟາມໃນການລ້ຽງງົວມີ 35 ເຮັກຕາ ໃນນັ້ນ, ໄດ້ແບ່ງອອກເປັນ 3 ສ່ວນຄື: ເນື້ອທີ່ຕັ້ງໂຮງເຮືອນ ແລະ ບ່ອນປ່ອຍງົວ 17 ເຮັກຕາ, ເນື້ອທີ່ປູກຫຍ້າເພື່ອຮອງຮັບໃນ ຟາມ 10 ເຮັກຕາ ແລະ ເນື້ອທີ່ປູກສະບຽງອາຫານ ແລະ ໄມ້ໃຫ້ໝາກ 8 ເຮັກຕາ.
ສຳລັບຫຍ້າ ແລະ ສະບຽງອາຫານທີ່ໃຊ້ໃນຟາມໃນໄລຍະຜ່ານມາໄດ້ປູກຫຍ້າຢູ່ 3 ຊະນິດ ຄື: ຫຍ້າລູຊີ, ຫຍ້າເນເປຍ, ຫຍ້າແພງໂກລາ, ສ່ວນລະດູແລ້ງ ແມ່ນໄດ້ໃຊ້ເຟືອງເປັນອາຫານສ່ວນໃຫຍ່. ນອກນີ້, ຍັງໄດ້ນຳໃຊ້ອາຫານເສີມຊ່ວຍເປັນຕ້ົນກາກນ້ໍາຕານປະສົມກັບວິຕາມິນປະສົມນໍ້າຫົດເຟືອງ, ຂີ້ເບຍ ແລະ ຫົວອາຫານ, ແຕ່ລະປີມີງົວນ້ອຍເກີດໃໝ່ປະມານ 15-20 ໂຕ ຊຶ່ງປັດຈຸບັນໃນຟາມມີງົວທັງໝົດ 113 ໂຕ ເປັນງົວລູກປະສົມບາມັນທັງໝົດ. ສຳລັບການຈໍາໜ່າຍງົວຂອງຟາມແມ່ນໄດ້ເຂົ້າກຸ່ມສະມາຄົມງົວບາມັນແຫ່ງປະເທດລາວ ເພື່ອຈໍາໜ່າຍແນວພັນໃຫ້ປະຊາຊົນ ແລະ ສະມາຊິກໃນກຸ່ມທີ່ຕ້ອງການລ້ຽງງົວ ສະເລ່ຍມີລາຍຮັບຈາກການຂາຍງົວ 150 ລ້ານກວ່າກີບ ແລະ ຂາຍຂີ້ງົວປະມານ 50 ລ້ານ ກວ່າກີບ ລວມລາຍຮັບໝົດປີສະເລ່ຍ 200 ລ້ານກວ່າກີບ.
ທ່ານ ພັນທະບູນ ວົງໄຊ ກ່າວຕື່ມວ່າ: ກ່ອນທີ່ຕົນເອງຈະມີໂອກາດ ແລະ ເວລາສ້າງເສດຖະກິດ ຄອບຄົວໃຫ້ເຂ້ັມແຂງແບບນ້ີ ກໍເນື່ອງຈາກການນໍາພາ-ຊີ້ນຳອັນ ສະຫລາດສ່ອງໃສຂອງພັກ ກໍຄືອົງການຈັດຕັ້ງຕ່າງໆ ໄດ້ມີແຜນພັດທະນາເສດຖະກິດ-ສັງຄົມ ເຫັໄດ້ວຽກງານພັດທະນາແກ້ໄຂ ຄວາມທຸກຍາກຂອງປະຊາຊົນເປັນວຽກງານສຳຄັນຕົນເອງຕາງໜ້າ ໃຫ້ພໍ່ແມ່ປະຊາຊົນເມືອງໂພນໂຮງຂໍສະແດງຄວາມຮູ້ບຸນຄຸນອັນສູງສົ່ງຕໍ່ການນຳພັກ-ລັດ ທຸກຂັ້ນໃນທົ່ວເມືອງ, ທົ່ວແຂວງ ທີ່ໄດ້ຊຸກຍູ້ວຽກງານດັ່ງກ່າວໃຫ້ພໍ່ແມ່ປະຊາຊົນ, ກະສິກອນທີ່ໄດ້ມີຊີວິດການເປັນຢູ່ທີ່ດີຂຶ້ນເລື້ອຍໆ.
ໂດຍ: ແກ້ວອຸດົມ
KPL
