ຂປລ
ແຂວງຄໍາມ່ວນ ເປັນອີກໜຶ່ງຈຸດໝາຍປາຍທາງການທ່ອງທ່ຽວ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງຈາກວ່າມີສະຖານທີ່ທ່ອງທ່ຽວທາງປະຫວັດສາດ, ທໍາມະຊາດຢ່າງຫລວງຫລາຍ ບໍ່ຈະເປັນຖໍ້ານາງແອ່ນ,ຖໍ້າໜອງປາຝາ, ພູຜາມ່ານ ,ຖໍ້າກອງລໍ ແລະ ອື່ນໆອີກຫລາຍສະຖານທີ່.
*ແຂວງຄໍາມ່ວນ ເປັນອີກໜຶ່ງຈຸດໝາຍປາຍທາງການທ່ອງທ່ຽວ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງຈາກວ່າມີສະຖານທີ່ທ່ອງທ່ຽວທາງປະຫວັດສາດ, ທໍາມະຊາດຢ່າງຫລວງຫລາຍ ບໍ່ຈະເປັນຖໍ້ານາງແອ່ນ,ຖໍ້າໜອງປາຝາ, ພູຜາມ່ານ ,ຖໍ້າກອງລໍ ແລະ ອື່ນໆອີກຫລາຍສະຖານທີ່ ເຊິ່ງແຕ່ລະສະຖານທີ່ທ່ອງທ່ຽວມີຄວາມສວຍງາມ ແລະ ປະຫວັດຄວາມເປັນມາທີ່ຍາວນານທີ່ຄອຍຖ້າທ່ານໄປສໍາຜັດ ເປັນຕົ້ນຖໍ້າກອງລໍ ກໍ່ເປັນອີກໜຶ່ງແຫລ່ງທ່ອງທ່ຽວທາງທໍາມະຊາດ ທີ່ມີຊື່ສຽງຍ້ອນຖໍ້າທີ່ມີສາຍນໍ້າຫີນບູນ ໄຫລຜ່ານອຸໂມງຂອງພູຫີນບູນ ແລ້ວໄຫລລົງສູ່ສາຍນໍ້າຂອງ. ຖໍ້າກອງລໍຕັ້ງຢູ່ລະຫວ່າງບ້ານນາຕານ ແລະ ບ້ານກອງລໍ, ເມືອງຄູນຄຳ ແຂວງຄຳມ່ວນ ເຊິ່ງຫ່າງຈາກເມືອງ 46 ກິໂລແມັດ ສາມາດເດີນທາງຈາກເສັ້ນທາງເລກທີ 13 ເຂົ້າໄປຕາມເສັ້ນທາງເລກ 8 ເຊ່ິງຫ່າງຈາກຖ້ຳກອງລໍ 40 ກິໂລແມັດ. ສຳລັບທາງເລືອກອື່ນທີ່ເໝາະສົມກັບຜູ້ມັກຜະຈົນໄພ ແມ່ນຂີ່ເຮືອຈັກຫາງຍາວລ່ອງໄປຕາມສາຍນ້ຳຫີນບູນຈາກບ້ານນາ.
ຖໍ້າກອງລໍມີຄວາມຍາວປະມານ 7.500 ແມັດ, ກ້ວາງປະມານ 30 ແມັດ ແລະ ສູງ 20 ແມັດຫາ 100 ແມັດ ເປັນຖໍ້າທີ່ສວຍງາມ ແລະ ມີສະເໜ່ດຶງດູດສາຍຕາເວລາພົບເຫັນ ພາຍໃນຖໍ້າມີແກ້ງ, ຫີນຍ້ອຍ, ຫາດຊາຍກວ່າ 20 ຈຸດ ເພື່ອໃຫ້ນັກທ່ອງທ່ຽວໄດ້ຊົມ ໂດຍສະເພາະໃນລະດູແລ້ງ ເນື່ອງຈາກວ່າ ສະດວກສະບາຍໃນການເດີນທາງໂດຍການຂີ່ເຮືອເຂົ້າໄປພາຍໃນຖ້ຳ ແລ້ວລົງຈາກເຮືອແວ່ທ່ຽວຊົມທິວທັດ ແລະ ຍ່າງເລາະຫລີ້ນຕາມຫາດຊາຍຂາວ ສໍາພັດກັບອາກາດທີ່ເຢັນສະບາຍ ແລະ ຄວາມສວຍງາມຂອງຫີນງອກຫີນຍ່ອຍເປັນຮູບຊົງຕ່າງໆ . ສໍາລັບຖໍ້າກອງລໍ-ນາຕານຖືກຄົ້ນພົບແຕ່ສະຕະວັດທີ XVI, ໃນຊຸມປີ 1960 ເລີ່ມນຳໃຊ້ເຮືອຫາງຍາວ ເປັນພາຫະນະເດີນທາງໄປ-ຜ່ານ ຖ້ຳແຫ່ງນີ້ຂອງຄົນທ້ອງຖິ່ນ.
ແຕ່ເລີ່ມສໍາຫລວດຢ່າງຈິງຈັງ ເປັນຄັ້ງທໍາອິດໃນເດືອນກຸມພາ 1995 ແລະ ພົບວ່ານັກທ່ອງທ່ຽວສາມາດຂີ່ເຮືອຈັກຫາງາວແລ່ນລອດເຂ້ົາຖໍ້າ ແລະ ຜ່ານອອກອີກດ້ານອື່ນ ເຊິ່ງຫລຸດຜ່ອນເວລາໃນການສັນຈອນຈາກ 2 ຊ່ົວໂມງມາເປັນປະມານ 1 ຊົ່ວໂມງ. ດ້ວຍເຫດນີ້, ອຸໂມງຂອງຖ້ຳນີ້ຈຶ່ງເປັນເສັ້ນທາງການທ່ອງທ່ຽວທາງເຮືອ ໂດຍເກີດຂຶ້ນ ແລະ ຖືກນໍາໃຊ້ທົ່ວໄປ ນັບແຕ່ວັນທີ 12 ມັງກອນ 2002 ເປັນຕົ້ນມາ. ປັດຈຸບັນນີ້ອຸໂມງລອດຖ້ຳສາຍນີ້ ຈຶ່ງເປັນເສັ້ນທາງຄົມມະນະຄົມເຊື່ອມຕໍ່ລະຫວ່າງ ບ້ານກອງລໍ ຫາ ບ້ານນາຕານ. ຖໍ້າກອງລໍມີຄວາມໝາຍມາຈາກ “ກອງທັບລໍ” ບໍ່ແມ່ນ “ກອງຫລໍ່” ຍ້ອນເຫດຜົນວ່າຄຳວ່າ “ກອງ” ມາຈາກ “ກອງທັບ” ສ່ວນ “ລໍ” ມາຈາກ “ລໍຖ້າ” ເມື່ອລວມເຂົ້າກັນຈຶ່ງເອີ້ນຖ້ຳກອງລໍຈົນເທົ່າທຸກວັນນີ້. ໃນຂະນະນັ້ນ, ອານາຈັກລາວລ້ານຊ້າງ ໄດ້ທຳການຕໍ່ສູ້ກັບກອງທັບສັກດີນາສະຫຍາມ ທີ່ ເຂົ້າມາຮຸກຮານ ດ້ວຍເຫດນີ້ມັນຈຶ່ງເປັນທີ່ມາຂອງຖ້ຳກອງລໍແຕ່ນັ້ນມາ ແລະ ມີຄວາມໝາຍເປັນ “ກອງທັບລໍຖ້າ” ນັ້ນເອງ.
ທີ່ເວົ້າມານີ້ຢ່າຟ້າວເຊື້ອເດີ ຕ້ອງໄດ້ລອງສໍາຜັດດ້ວຍໂຕເອງ ສະນັ້ນ, ຖ້າໃຜໄດ້ກາຍໄປ, ກາຍມາທາງແຂວງຄໍາມ່ວນ ກໍຢ່າລືມແວ່ສໍາຜັດຄວາມສວຍງາມຂອງຖໍ້າກອງລໍ ເມືອງຄູນຄໍາແຂວງຄໍາມ່ວນ.
ໂດຍ: ມາລີດາ
KPL
