ຂປລ. ໃນປີ 2024 ຜ່ານມາ ກໍຄື ການຈັດຕັ້ງປະຕິບັດກິດຈະກຳປີທ່ອງທ່ຽວລາວ ຢູ່ແຂວງຫົວພັນ ແມ່ນມີຜົນສຳເລັດຕາມຄາດໝາຍ ທີ່ວາງໄວ້, ສາມາດດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຢູ່ແຂວງຫົວພັນ ໄດ້ທັງໝົດ 53 ພັນກວ່າຄົນ, ສ້າງລາຍຮັບໃຫ້ແກ່ສັງຄົມ ໄດ້ທັງໝົດ 58 ຕື້ກວ່າກີບ.

ທ່ານ ແສງສຸວັນ ວົງຄຳ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫົວພັນ ​ໄດ້​ໃຫ້​ສໍາພາດ​ໃນ​ທ້າຍ​ອາທິດ​ຜ່ານ​ມານີ້ວ່າ: ໃນໄລຍະ 1 ປີຜ່ານມາ ແຂວງຫົວ ພັນ ກໍຄື ພະແນກ ຖວທ ໄດ້ເອົາໃຈໃສ່ຊຸກຍູ້ບັນດາຫົວໜ່ວຍທຸລະກິດ, ຜູ້ປະກອບການທຸລະກິດບໍລິ ການທ່ອງທ່ຽວ ຢ່າງເປັນປົກກະຕິຕໍ່ເນື່ອງ, ລົງກວດກາແນະນໍາບັນດາຫົວໜ່ວຍ ຜູ້ປະກອບການໄດ້ 8 ຫົວໜ່ວຍ, ລົງສໍາຫລວດ ແລະ ຂຽນແຜນພັດທະນາແຫລ່ງທ່ອງທ່ຽວໄດ້ 2 ແຫ່ງ, ທຽບໃສ່ແຜນການ ປະຕິບັດໄດ້ 100%, ອອກໃບອະນຸຍາດສືບຕໍ່ດໍາເນີນ ທຸລະກິດບໍລິການທ່ອງທ່ຽວໄດ້ 16 ຫົວໜ່ວຍ, ໃບອະນຸຍາດດໍາເນີນທຸລະກິດ 9 ຫົວໜ່ວຍ, ເກັບກໍາສະຖິຕິໂຮງແຮມ, ເຮືອນພັກ ແລະ ຮ້ານອາຫານໄດ້ 80 ຫົວໜ່ວຍ, ໂຄສະນາແຫລ່ງທ່ອງທ່ຽວ, ເທສະການງານບຸນປະເພນີຕ່າງໆ ລົງສື່ອອນລາຍໄດ້ 20 ຄັ້ງ, ມີຜູ້ເຂົ້າເຖິງ 9 ແສນກວ່າຄົນ. ພ້ອມນີ້, ຍັງໄດ້ສໍາເລັດການສ້າງ ຖານຂໍ້ມູນຂ່າວສານການທ່ອງ ທ່ຽວ ໃຫ້ເປັນລະບົບເຊື່ອມຕໍ່ 8 ແຂວງພາກເໜືອ ແລະ ເຊື່ອມຕໍ່ລະບົບຂອງ ກະຊວງ ຖວທ, ສ້າງປະ ຕິທິນທ່ອງທ່ຽວບຸນປະເພນີ ຊົນເຜົ່າຂອງແຂວງ, ອັບເດດຂໍ້ມູນຂ່າວສານການທ່ອງທ່ຽວ, ຕາຕະລາງລົດ ເມ, ຖ້ຽວບິນ ແລະ ອື່ນໆໄດ້ 5 ຄັ້ງ ແລະ ອອກແບບສື່ສິ່ງພິມໂຄສະນາ ເປັນພາສາລາວ-ອັງກິດໄດ້ 5 ແບບ ແລະ ສໍາເລັດການອອກແບບ ປະຕິທິນທ່ອງທ່ຽວ 2024 ຂອງແຂວງ ໂດຍພື້ນຖານ.

ຜ່ານການຈັດຕັ້ງປະຕິບັດວຽກງານ ຖວທ ໃນໄລຍະຜ່ານມາ ກໍຄື ການຈັດຕັ້ງປະຕິບັດກິດຈະກຳ ປີທ່ອງທ່ຽວລາວ 2024 ສາມາດດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໄດ້ທັງໝົດ 53.162 ຄົນ (ປະຕິບັດໄດ້ເກີນແຜນ). ໃນນັ້ນ, ນັກທ່ອງທ່ຽວພາຍໃນ 16.811 ຄົນ (ທຽບໃສ່ແຜນ ການປະຕິບັດໄດ້ 102%), ນັກທ່ອງທ່ຽວຕ່າງປະເທດ 36.351 ຄົນ (ທຽບໃສ່ແຜນການປະຕິບັດໄດ້ 118%). ໃນນັ້ນ, ສາມາດສ້າງລາຍຮັບສະເລ່ຍໃຫ້ແກ່ສັງຄົມ ຈາກວຽກງານທ່ອງທ່ຽວໄດ້ທັງໝົດ 58 ຕື້ກວ່າກີບ (ທຽບໃສ່ແຜນປີປະຕິບັດໄດ້ 115%).

ທ່ານ ແສງສຸວັນ ສົງຄຳ  ໃຫ້ຮູ້ອີກວ່າ: ໃນປີ 2025 ຄາດວ່າຈະໃຫ້ມີນັກທ່ອງທ່ຽວເຂົ້າມາທ່ຽວ ແຂວງຫົວພັນ ທັງໝົດ 56.426 ຄົນ. ໃນນັ້ນ, ນັກທ່ອງທ່ຽວພາຍໃນ 22.570 ຄົນ, ນັກທ່ອງທ່ຽວຕ່າງປະເທດ 33.856 ຄົນ, ສ້າງລາຍຮັບເຂົ້າສູ່ແຂວງໄດ້ ປະມານ 78 ຕື້ກວ່າກີບ.

ຂ່າວ: ທະນູທອງ

ພາບ: ຂັນໄຊ

KPL