ຂປລ.ວິທະຍຸ ສາກົນແຫ່ງ ສປ ຈີນ,ເມື່ອບໍ່ດົນມານີ້, ທ່ານ ສີ ຈິ້ນຜິງ, ເລຂາທິການໃຫຍ່ ຄະນະກຳມະການ ສູນກາງພັກກອມມູນິດຈີນ, ປະທານປະເທດຈີນ ໄດ້ສົນທະນາກັບ ທ່ານ ໂຕ່ເລີ່ມ, ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດ ຫວຽດນາມ ໂດຍຜ່ານທາງໂທລະສັບ.ໃນໂອກາດນີ້ ທ່ານ ສີ ຈິ້ນຜິງ ກ່າວວ່າ: ປີນີ້ ແມ່ນປີສຸດທ້າຍ ຂອງການປະຕິບັດ ແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີຄັ້ງທີ 14 ຂອງ ສປ ຈີນ ແລະ ກໍເປັນປີສຳຄັນ ຂອງພັກກອມມູນິດຫວຽດນາມ ທີ່ກະກຽມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 14, ເວົ້າສຳລັບ ສປ ຈີນ ແລະ ສສ ຫວຽດນາມແລ້ວ ກໍມີຄວາມໝາຍສຳຄັນ ທີ່ສືບຕໍ່ ເສີມຂະຫຍາຍ ທັງອັນເກົ່າ ແລະ ໃໝ່. ທັງສອງຝ່າຍ ເສີມຂະຫຍາຍ ບົດບາດການນຳພາ ທາງດ້ານການເມືອງ ຂອງການໄປມາຫາສູ່ແລກປ່ຽນກັນ ລະຫວ່າງ ການນຳຂັ້ນສູງຢ່າງເຕັມທີ່, ສືບຕໍ່ຮັກສາການໄປມາຫາສູ່ກັນ ຢ່າງໃກ້ຊິດ. ຕ້ອງຊຸກຍູ້ ການຮ່ວມມື ແບບຕ່າງຝ່າຍ ຕ່າງມີຜົນປະໂຫຍດ ໃຫ້ໄດ້ຮັບໝາກຜົນ ຫລາຍກວ່າເກົ່າ, ເລັ່ງຊຸກຍູ້ ການເຊື່ອມຈອດ, ຮ່ວມກັນ ສ້າງເວທີ ການຮ່ວມມື ດ້ານກຳລັງ ການຜະລິດໃນຄຸນນະພາບໃໝ່, ສ້າງຕ່ອງໂສ້ ອຸດສາຫະກຳ ແລະ ຕ່ອງໂສ້ການສະໜອງ ຂ້າມຊາດ ທີ່ໝັ້ນທ່ຽງ ແລະ ໂລ່ງລ່ຽນ. ຕ້ອງເພີ່ມທະວີ ການປະສານງານ ໃນສາກົນ ແລະ ພາກພື້ນ, ຮັກສາຄວາມເປັນທຳ ແລະ ຍຸຕິທຳ ໃນສາກົນ, ຮ່ວມກັນສ້າງປະຊາຄົມ ຮ່ວມຊາຕາກຳ ຂອງມວນມະນຸດ. ຈາກນັ້ນ ທ່ານ ໂຕ່ເລີ່ມ ກ່າວວ່າ: ສສ ຫວຽດນາມ ສະແດງຄວາມຊື່ນຊົມຢ່າງຈິງໃຈ ຕໍ່ໝາກຜົນ ການພັດທະນາ ອັນຍິ່ງໃຫຍ່ ທີ່ປະຊາຊົນຈີນ ຍາດມາໄດ້ ພາຍໃຕ້ ການນຳພາ ຂອງພັກກອມມູນິດຈີນ, ເຊື່ອວ່າ ສປ ຈີນ ຈະເສີມຂະຫຍາຍທ່າແຮງ ຂອງຕົນ ທາງດ້ານຂະໜາດ ເສດຖະກິດ ແລະ ການພັດທະນາ ກຳລັງການຜະລິດ ໃນຄຸນນະພາບໃໝ່ ແລະ ຈະໄດ້ຮັບໝາກຜົນ ການພັດທະນາ ອັນໃຫຍ່ຫລວງ ກວ່າເກົ່າ ຢ່າງບໍ່ຢຸດຢັ້ງ. ສສຫວຽດນາມ ຕັ້ງໜ້າສະໜັບ ສະໜູນ 3 ຂໍ້ລິເລີ່ມທົ່ວໂລກທີ່ ທ່ານ ສີ ຈິ້ນຜິງ ສະເໜີອອກ ແລະ ຍິນດີ ເພີ່ມທະວີການຮ່ວມມືກັບ ສປ ຈີນ ໃນຂອບ 3 ຂໍ້ລິເລີ່ມນີ້./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL