ຂປລ
ຂປລ. ສວນວັດທະນະທໍາ “ສາມໝື່ນຕູບເຟືອງ” ຕັ້ງຢູ່ບ້ານນາທົວ ເມືອງເຟືອງ ແຂວງວຽງຈັນ ໄດ້ເປີດໃຫ້ບໍລິການແກ່ນັກທ່ອງທ່ຽວ ຢ່າງເປັນທາງການ ໃນທ້າຍເດືອນທັນວາ ຜ່ານມາ
ຂປລ. ສວນວັດທະນະທໍາ “ສາມໝື່ນຕູບເຟືອງ” ຕັ້ງຢູ່ບ້ານນາທົວ ເມືອງເຟືອງ ແຂວງວຽງຈັນ ໄດ້ເປີດໃຫ້ບໍລິການແກ່ນັກທ່ອງທ່ຽວ ຢ່າງເປັນທາງການ ໃນທ້າຍເດືອນທັນວາ ຜ່ານມາ, ພາຍໃນສວນ ໄດ້ມີການຈໍາລອງ ວິຖີຊີວິດ-ຮີດຄອງປະເພນີອັນດີງາມ ຂອງພໍ່ແມ່ປະຊາຊົນເຜົ່າຕ່າງໆ ຕັ້ງແຕ່ບູຮານ ເຊິ່ງຫາເບິ່ງໄດ້ຍາກແລ້ວໃນປັດຈຸບັນ.
ທ່ານ ນາງ ວອນມະນີວົງ ສະເຕີນ ປະທານສະມາຄົມ ນັກທຸລະກິດເຮືອນແພເມືອງຟືອງ ໄດ້ໃຫ້ຮູ້ວ່າ: ສວນວັດທະນະທໍາ “ສາມໝື່ນຕູບເຟືອງ” ເປັນສະຖານທີ່ທ່ອງທ່ຽວແຫ່ງໃໝ່ ໂດຍເປີດໃຫ້ບໍລິ ການທຸກໆວັນ ແຕ່ເວລາ 08:00 ໂມງ ຈົນຮອດ 22:00 ໂມງ ໂດຍຈະມີຂາຍເຄື່ອງຫັດຖະກໍາ, ເຄື່ອງຝາກຂອງຕ້ອນ, ຮ້ານກາເຟ, ຮ້ານອາຫານ ແລະ ຜົນລະປູກ ຂອງປະຊາຊົນ. ນອກນີ້, ຍັງມີເຮືອນຈໍາລອງບັນດາຊົນເຜົ່າຕ່າງໆ ໃນສະໄໝບູຮານ ເປັນຕົ້ນ ເຜົ່າມົ້ງ, ເຜົ່າລາວ, ເຜົ່າກຶມມຸ, ໄທດໍາ, ໄທແດງ ແລະ ອື່ນໆ ເພື່ອໃຫ້ນັກທ່ອງທ່ຽວໄດ້ເຫັນເຖິງວິຖີຊີວິດ, ຮີດຄອງປະເພນີດັ້ງເດີມຂອງຊົນເຜົ່າຕ່າງໆໃນລາວ ເຊິ່ງນັກທ່ອງທ່ຽວສາມາດໃສ່ຊຸດຂອງແຕ່ລະເຜົ່າ ເພື່ອເລາະຖ່າຍຮູບບັນຍາກາດຕ່າງໆ. ຈາກຈຸດທີ່ຕັ້ງຂອງສວນນີ້, ສາມາດແນມເຫັນ ຜາທໍ່ໜໍ່ຄໍາ ແລະ ຖ້າມີກ້ອງສ່ອງທາງໄກ ຈະສາມາດສ່ອງເຫັນໜໍ່ຄໍາ 2 ໜໍ່ຕັ້ງຢູ່ຜາດັ່ງກ່າວ.
ທ່ານ ນາງ ວອນມະນີວົງ ສະເຕີນ ຍັງໃຫ້ຮູ້ອີກວ່າ: ສໍາລັບການ ເຂົ້າຊົມ ສວນວັດທະນະທໍາ ສາມໝື່ນຕູບເຟືອງ ຈະບໍ່ໄດ້ເກັບຄ່າເຂົ້າຊົມ ເພາະພວກເຮົາຢາກຈະເຜີຍແຜ່ ວັດທະນະທຳ, ຮີດຄອງປະເພນີດັ້ງເດີມ ທີ່ເປັນເອກະລັກ ຕິດພັນກັບປະຫວັດສາດ ຄວາມເປັນມາຂອງສາມໝື່ນຕູບເຟືອງ ທີ່ເຄີຍຊ່າລື. ນອກຈາກ, ມາທ່ຽວຊົມ ມາຮັບປະທານອາຫານແລ້ວ, ນັກທ່ອງທ່ຽວສາມາດມາພັກຜ່ອນ ຢູ່ເຮືອນຂອງບັນດາເຜົ່າ ພວກເຮົາກໍມີໃຫ້ບໍລິການພັກແຮມ ຕື່ມອີກ.
ໃນອະນາຄົດ, ສວນວັດທະນະທໍາ “ສາມໝື່ນຕູບເຟືອງ” ຍັງມີແຜນຈະເປີດຕະຫລາດສົດໃນຕອນເຊົ້າ ໂດຍເນັ້ນຂາຍພືດຜັກປອກສານພິດ, ຈະໃຫ້ປະຊາຊົນມີສ່ວນເຮົາເຂົ້ມາຂາຍເຄື່ອງ, ທຸກໆຕອນເຊົ້າວັນສຸກ, ເສົາ ແລະ ວັນອາທິດ ແມ່ນຈະມີພະມາບິນທະບາດ ຕື່ມອີກ.
ຂ່າວ: ຈັນທະລອນ
KPL
