*ນັບແຕ່ໄດ້ເປີດໃຫ້ບໍລິການເສັ້ນທາງລົດໄຟລາວ-ຈີນ 3 ປີຜ່ານມາ, ຂະບວນລົດໄຟລາວ-ຈີນ ໄດ້ແລ່ນໃຫ້ບໍລິການຖີ່ຂຶ້ນນັບມື້ທັງກາງເວັນ ແລະ ກາງຄືນຜ່ານບັນດາບ້ານ, ເມືອງ ແລະ ແຂວງຕ່າງໆຈາກສູນກາງນະຄອນຫລວງວຽງຈັນ ໄປຫາແຂວງຫລວງນໍ້າ ໃນພາກເໜືອຂອງ ສປປ ລາວ ດ້ວຍໄລຍະທາງ 400 ກວ່າກິໂລແມັດແລ້ວມຸ່ງໜ້າອອກສູ່ ສປ ຈີນ ແລະ ມຸ່ງໜ້າໄປຂົງເຂດອື່ນໆເຊິ່ງໄດ້ສະທ້ອນໃຫ້ເຫັນໝາກຜົນຕົວຈິງທີ່ບໍ່ສາມາດມະໂນພາບໄດ້ຂະນະທີ່ເຂດພັດທະນາເສດຖະກິດໃໝ່, ການຜະລິດກະສິກໍາຂອງປະຊາຊົນລາວບັນ ດາເຜົ່າ,ພາກອຸດສາຫະກໍາທ່ອງທ່ຽວ ແລະ ພື້ນຖານໂຄງລ່າງໄດ້ເກີດເປັນໜໍ່ແໜງໃໝ່ ແລະ ເບັ່ງບານຂຶ້ນຄ້າຍກັບ “ ດອກເຫັດ ” ຕາມແລວເສັ້ນທາງລົດໄຟລາວ-ຈີນ.

     ເມື່ອ 10 ປີກ່ອນໜ້ານີ້, ຜູ້ຂຽນໄດ້ມີໂອກາດນັ່ງລົດເມໄປເຮັດວຽກຢູ່ເມືອງມໍລະດົກໂລກຫລວງພະບາງເຫັນຖະໜົນຫົນທາງຍັງຫຍຸ້ງຍາກທຸລະກັນດານ ແລະ ໃຊ້ເວລາເກືອບ 5 ຊົ່ວໂມງ, ແຕ່ປັດຈຸບັນໃຊ້ເວລານັ່ງລົດໄຟໄປຫລິ້ນຫລວງພະບາງພຽງ 1 ຊົ່ວໂມງເທົ່ານັ້ນ ແລະ ຍັງເຮັດໃຫ້ປະຢັດເງິນ, ປະຢັດເວລາ ແລະ ມີຄວາມປອດໄຟສູງອີກດ້ວຍ.

     ຜູ້ຂຽນຍັງຈື່ໄດ້ອີກວ່າ: ສົກປີ 2018-2019 ສອງພັກ-ລັດລາວ-ຈີນ ໄດ້ຮ່ວມກັນເປີດປີທ່ອງທ່ຽວເຫັນວ່າເວລານັ້ນສາມາດດຶງດູດນັກທ່ອງທ່ຽວທັງໝົດໄດ້ເກືອບ 5 ລ້ານກວ່າຄົນ ໃນນັ້ນນັກທ່ອງທ່ຽວຊາວຈີນມີເຖິງ 1 ລ້ານກວ່າຄົນ ແຕ່ເຖິງແນວໃດກໍດີ ມາເຖິງປັດຈຸບັນນີ້ ຕາມການລາຍງານຂອງໂທລະພາບ ແຂວງຫລວງພະບາງ ໃຫ້ຮູ້ວ່າ: ນັບແຕ່ເດືອນມັງກອນ ມາຮອດວັນທີ 25 ທັນວາ 2024 ມີນັກທ່ອງທ່ຽວເຂົ້າໄປມາທ່ຽວ ແຂວງຫລວງພະບາງ ທັງໜົດ 2.326.758 ຄົນ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 1.297.060 ຄົນ, ເທົ່າກັບ 125,96 %. ໃນນີ້ ມີນັກທ່ອງທ່ຽວພາຍໃນ 775.424 ຄົນ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂື້ນ 510.322 ຄົນ, ເທົ່າກັບ 192,50% ; ນັກທ່ອງທ່ຽວສາກົນ 1.551.334 ຄົນ, ທຽບໃສ່ປີຜ່ານມາເພີ່ມຂື້ນ 786.738 ຄົນ, ເທົ່າກັບ 102,89 %. ສໍາລັບນັກທ່ອງທ່ຽວສາກົນ ທີ່ມາທ່ຽວຫລວງພະບາງ ຫລາຍກວ່າໝູ່ໂດຍໄດ້ຈັດ 10 ອັນດັບດັ່ງນີ້ 1. ນັກທ່ອງທ່ຽວ ຈີນ 459.297 ຄົນ 2. ນັກທ່ອງທ່ຽວ ໄທ : 175.575 ຄົນ 3. ນັກທ່ອງທ່ຽວ ສ.ເກົາຫຼີ : 151.189 ຄົນ 4. ນັກທ່ອງທ່ຽວ ສ.ອາເມລິກາ : 113.164 ຄົນ 5. ນັກທ່ອງທ່ຽວ ຝລັ່ງ : 90.499 ຄົນ 6. ນັກທ່ອງທ່ຽວ ຍີ່ປຸ່ນ : 80.885 ຄົນ 7. ນັກທ່ອງທ່ຽວ ເຢຍລະມັນ : 59,607 ຄົນ 8. ນັກທ່ອງທ່ຽວ ການາດາ : 51.325 ຄົນ 9. ນັກທ່ອງທ່ຽວ ອົດສຕາລີ: 43.560 ຄົນ 10. ນັກທ່ອງທ່ຽວ ອັງກິດ : 41.254 ຄົນ ເຊິ່ງຕົວເລກທັງໝົດນັ້ນໄດ້ຊີ້ວັດຢ່າງຈະແຈ້ງວ່າ:ເສັ້ນທາງລົດໄຟລາວ-ຈີນກາຍເປັນພື້ນຖານ ແລະ ປັດໃຈສໍາຄັນຊ່ວຍຊຸກຍູ້ໃຫ້ພາກອຸດສາຫະກໍາລະຫວ່າງ ສປປ ລາວ, ອາຊຽນ, ສປ ຈີນ ແລະ ພາກພື້ນອື່ນໆເຕີບໃຫຍ່ຂະຫຍາຍຕົວເຂັ້ມ ແຂງເປັນຄູ່ຂະໜານກັບຂະແໜງການອື່ນໆຢ່າງຕັ້ງໜ້າ. ທາງລົດໄຟຈີນ-ລາວ ຫາກໍໄດ້ເປີດນຳໃຊ້ຢ່າງເປັນທາງການຄົບຮອບ 3 ປີຜ່ານມາແລ້ວ, ສາມາດເຫັນທ່າອ່ຽງພົ້ນເດັ່ນຫລາຍດ້ານໂດຍສະເພາະຂະບວນລົດໄຟໂດຍສານຂ້າມຊາດ ໄດ້ເຮັດໃຫ້ຜູ້ໂດຍສານມີໂອກາດໃຊ້ເວລາຢ່າງເຕັມທີ່ຄື “ຕອນເຊົ້ານັ່ງກິນເຂົ້າປຸ້ນຢູ່ນະຄອນຄຸນໝິງ ແລະ ຕອນແລງມາກິນກາເຟຢູ່ນະຄອນຫລວງວຽງຈັນ”; ສ່ວນຂະບວນລົດໄຟຂົນສົ່ງ “ໝາກໄມ້ ຫລື ພືດກະສິກໍາຕ່ງໆ” ກໍສາມາດແລ່ນຢ່າງສະດວກສະບາຍດ້ວຍລະບົບເຕັກໂນໂລຊີທັນສະໄໝມີ (ຫ້ອງແອເຢັນ) ສາມາດຖະໜອມໝາກໄມ້ໃຫ້ມີຄວາມສົດຕະຫລອດ ແລະ ມີຄວາມວ່ອງໄວໄປເຖິງມືລູກຄ້າຢ່າງປອດໄພ. ເມື່ອບໍ່ດົນມານີ້ “ຂະບວນລົດໄຟສາຍດ່ວນແມ່ນ້ຳລ້ານຊ້າ-ແມ່ນ້ຳຂອງ” ກຳລັງເປີດກວ້າງຮູບແບບຕ່າງໆ ເຊັ່ນ “ການຄ້າເອເລັກໂຕຣນິກ” “ຂະບວນລົດໄຟຈີນ-ເອີຣົບ” ແລະອື່ນໆ ເຊິ່ງໄດ້ເປັນຫົວໃຈສໍາຄັນອີກອັນໜຶ່ງ ແລະ ໃນຮອບ 3 ປີທີ່ຜ່ານມາ, ທາງລົດໄຟຈີນ-ລາວໄດ້ກາຍເປັນຊ່ອງທາງຂົນສົ່ງສິນຄ້າອັນພົ້ນເດັ່ນທີ່ສຸດ ເຊິ່ງໄດ້ເປັນການຄ້ຳປະກັນຢ່າງແຂງແຮງໃຫ້ແກ່ການພັດທະນາການຄ້າເອເລັກໂຕຣນິກຂອງອາຊີຕາເວັນອອກສຽງໃຕ້.

    ທາງລົດໄຟສາຍດັ່ງກ່າວໄດ້ຫລຸດຕົ້ນທຶນ ແລະ ເວລາຂອງການຂົນສົ່ງພາຍໃນພາກພື້ນຢ່າງຫລວງຫລາຍ. ເວລາການຂົນສົ່ງດ້ວຍທາງລົດໄຟຈາກລາວ ແລະ ໄທ ໄປສູ່ເອີຣົບໄດ້ຫລຸດລົງເປັນ 15 ວັນ; ຕົ້ນທຶນການຂົນສົ່ງຈາກນະຄອນຄຸນໝິງຂອງຈີນໄປຫາລາວ ແລະ ໄທໄດ້ຫຼຸດລົງ 30%-50%, ຕົ້ນທຶນການຂົນສົ່ງພາຍໃນປະເທດລາວໄດ້ຫລຸດລົງ 20%-40%. ຕາມຂ່າວລາຍງານວ່າ: ມາຮອດວັນທີ 2 ທັນວານີ້, ທາງລົດໄຟຈີນ-ລາວໄດ້ຂົນສົ່ງສິນຄ້າເຖິງ 48,3 ລ້ານໂຕນ, ໃນນັ້ນ, ຂົນສົ່ງສິນຄ້າຂ້າມຊາດເຖິງ 10,6 ລ້ານໂຕນ ໂດຍເພີ່ມຂຶ້ນຈາກ 500 ກວ່າຊະນິດໃນເມື່ອກ່ອນເປັນ 3.000 ກວ່າຊະນິດໃນປັດຈຸບັນ. ປັດຈຸບັນ, ທາງລົດໄຟຈີນ-ລາວ ໄດ້ກາຍເປັນສ່ວນປະກອບອັນສຳຄັນຂອງເຄືອຂ່າຍຄົມມະນາຄົມຂອງອາຊີຕາເວັນອອກສຽງໃຕ້ ໂດຍໄດ້ເຊື່ອມຕໍ່ກັບທາງຫຼວງ, ທາງນ້ຳ ແລະ ຊ່ອງທາງອື່ນໆ ເຊິ່ງໄດ້ສະໜອງທາງເລືອກອັນຫຼາກຫຼາຍໃຫ້ແກ່ການຈໍລະຈອນສິນຄ້າສຳລັບການຄ້າເອເລັກໂຕຣນິກ.

    ສໍາລັບຢູ່ນະຄອນຫຼວງວຽງຈັນຂອງລາວ, ທາງລົດໄຟຈີນ-ລາວໄດ້ເຊື່ອມຕໍ່ກັບການຂົນສົ່ງທາງຫຼວງຢ່າງແໜ້ນແຟ້ນ ເຊິ່ງໄດ້ຍົກສູງຄວາມຄ່ອງແຄ້ວ ແລະ ປະສິດທິພາບຂອງການຂົນສົ່ງສິນຄ້າ. ຍົກຕົວຢ່າງຄື ໃນເມື່ອກ່ອນ, ຜະລິດຕະພັນກະສິກຳທີ່ມີມູນຄ່າເພີ່ມສູງຂອງລາວ ມີຂະໜາດການສົ່ງອອກໜ້ອຍ ທັງສູນເສາຍຫຼາຍ ຍ້ອນເງື່ອນໄຂການສົນສົ່ງມີຄວາມຈຳກັດ. ຫຼັງຈາກທາງລົດໄຟຈີນ-ລາວເປີດນຳໃຊ້ແລ້ວ, ປະສິດທິພາບການຂົນສົ່ງໄດ້ຮັບການຍົກສູງຂຶ້ນຢ່າງຫຼວງຫຼາຍ, ຜະລິດຕະພັນກະສິກຳສາມາດເຂົ້າສູ່ເວທີການຄ້າເອເລັກໂຕຣນິກໂດຍຜ່ານຂະບວນລົດໄຟຕູ້ແຊ່ເຢັນ.

ໂດຍ: ເກີດຂວັນໃຈ ມາລີຈັນສີ