ເນື່ອງໃນໂອກາດ ວັນຊາດ ກຳປູເຈຍ(Cambodia) ຫລື ຣາ​ຊະອາ​ນາ​ຈັກ ກຳ​ປູ​ເຈຍ (Kingdom of Cambodia) ຄົບຮອບ 72 ປີ (9/11/1953-9/11/2025). ໂດຍມີ ນະຄອນຫລວງ ຊື່ວ່າ: ພະ​ນົມ​ເປັນ (Phanompenh), ຕັ້ງ​ຢູ່​ໃນເຂດອາຊີ ທາງພາກຕາ​ເວັນ​ອອກສຽງ​ໃຕ້ ມີ​ຊາຍ​ແດນ​ ທາງທິດ​ໃຕ້​ຕິດ​ກັບ ອ່າວ​ໄທ, ທິດຕາ​ເວັນ​ຕົກ ຕິດ​ກັບ ​ໄທ; ທິດ​ເໜືອ​ຕິດ​ກັບ​ ລາວ ​ແລະ ​ໄທ; ທິດຕາ​ເວັນ​ອອກ​ຕິດ​ກັບ ຫວຽດນາມ, ​ໂດຍ​ລວມ​ແລ້ວ ກຳປູ​ເຈຍ ມີ​ຊາຍ​ແດນ​ຕິດ​ກັບ ປະ​ເທດ ​ເພື່ອນ​ບ້ານ ມີ​ໄລຍະ​ທາງ 2.572 ກິ​ໂລ​ແມັດ ​ແລະ ມີເນື້ອທີ່ ປະມານ 181.035 ກິ​ໂລ​ຕາ​ແມັດ ສ່ວນ​ໃຫຍ່​ ເປັນ​ພື້ນ​ທີ່​ຕໍ່ານໍ້າ​ຖ້ວມ​ເຖິງ; ປະຊາກອນ 16,7 ລ້ານຄົນ (ປີ2024); ປະຊາຊົນສ່ວນໃຫຍ່ນັບຖືສາສະໜາພຸດ 96,9%; ໃຊ້ພາສາ ກຳປູເຈຍ ເປັນພາສາທາງການ; ຫົວໜ່ວຍສະກຸນເງິນ ແມ່ນຣຽວ(Riel). ​

ກຳປູເຈຍ ເປັນປະເທດໜຶ່ງທີ່ມີເສດຖະກິດ ຈະເລີນເຕີບໂຕຢ່າງວ່ອງໄວທີ່ສຸດຂອງໂລກ ໂດຍຂັບເຄື່ອນຈາກ ຂະແໜງອຸດສາຫະກຳ, ການບໍລິການ ແລະ ກະສິກໍາ, ປັດຈຸບັນ ກຳປູ​ເຈຍ ​ເນັ້ນ​ການ​ພັດທະນາ ​ພື້ນຖານ​ໂຄງ​ລ່າງ ​ເພື່ອ​ສົ່ງ​ເສີມການ​ຂະຫຍາຍຕົວ ​ຂອງ ເສດຖະກິດ​ ພາຍໃນ​ປະ​ເທດ ​ແລະ ຮອງ​ຮັບ​ການ ​ເຊື່ອມ​ໂຍງ​ເສັ້ນທາງ​ຄົມມະນາຄົມ ກັບປະ​ເທດ​ເພື່ອນ​ບ້ານ​ໃຫ້​ຫລາຍ​ຂື້ນ ​ເພື່ອ​ສ້າງ​ລາຍ​ໄດ້ໃຫ້​ແກ່ປະ​ເທດ, ຊຶ່ງເຮັດໃຫ້ລວມຍອດຜະລິດຕະພັນພາຍໃນປະເທດ(GDP) ລວມມີ 32 ຕື້ກວ່າ​ໂດ​ລາສະຫະລັດ (​ໃນ​ປີ 2024); ລາຍ​ໄດ້​ສະ​ເລ່ຍ ຕໍ່​ຫົວ​ຄົນ 1.912 ກວ່າ​ໂດ​ລາ​ສະຫະລັດ ​ຕໍ່​ປີ; ອັດຕາ​ການ​ເຕີບ​ໂຕ  ດ້ານ​ເສດຖະກິດ ​ສະ​ເລ່ຍແມ່ນ 5,4% ຕໍ່​ປີ. ສິນຄ້າ ການ​ສົ່ງ​ອອກ​ແມ່ນ ​ເສື້ອ​ຜ້າ​ສຳ​ເລັດ​ຮູບ, ຊິ້ນສ່ວນເອເລັກໂຕຣນິກ, ທັນຍາພືດ, ຢາງພາລາ, ເຄື່ອງໃຊ້ໄຟຟ້າ,  ​ເຂົ້າ ​ແລະ ສິນຄ້າການ​ປະມົງ. ສ່ວນ​ສິນຄ້າ​ການ​ນຳ​ເຂົ້າ  ​ແມ່ນ​ວັດຖຸ​ກໍ່ສ້າງ, ວັດຖຸ​ດີບ ສຳລັບການ​ຜະລິດ​ນຳ້ມັ ​ເຊື້ອ​ໄຟ ​ແລະ ຢາ​ປິ່ນປົວ​ພະຍາດ ຫລື ຢາສູບ ​ແລະ ​ເຄື່ອງ​ດື່ມ ​ແອ​ລກໍ​ຮໍ, ເຄື່ອງໃຊ້ໄຟຟ້າ ແລະ ສ່ວນປະກອບ. ສຳລັບ ​ຄູ່​ການ​ຄ້າ​ທີ່​ສຳຄັນ​ເຊັ່ນ: ຈີນ, ສະຫະພາບ​ເອີຣົບ, ​ໄທ, ສ.ອາ​ເມ​ລິ​ກາ, ຫວຽດນາມ, ສ.ເກົາຫລີ ​ແລະ ຍີ່ປຸ່ນ ຕາມ​ລຳດັບ.

ນອກນີ້ ຍັງ​ມີ ​ສະ​ຖານ​ທີ່​ທ່ອງ​ທ່ຽວ ສວຍ​ງາມຫລາຍແຫ່ງ ເປັນຕົ້ນນະຄອນຫລວງ ພະນົມເປັນຄື: ພະລາສະວັງ; ນະຄອນວັດ ເປັນ1 ໃນ 7 ສິ່ງມະຫັດສະຈັນ ຂື້ນທະບຽນ ເປັນມໍລະດົກໂລກໃຫຍ່ສຸດມີຂະໜາດ 200.000 ກິໂລຕາແມັດ, ສູງ 60 ແມັດ; ປະສາດພະວິຫານ ແລະ ແຫລ່ງບູຮານຄະດີ ສົມບູນໄພຄຸກ ແລະ ອື່ນໆ.

ໂດຍປະ​ເທ​ດ ກຳປູ​ເຈຍ ແລະ ປະເທດສປປລາວ​ ໄດ້​ສ້າງ​ຕັ້ງ​ສາຍ​ພົວ​ພັນ ທາງ​ການ​ທູດ​ຮ່ວມ​ກັນ ​ໃນ​ວັນ​ທີ 15.06.1956, ຫລັງຈາກນັ້ນທັງ​ສອງ​ປະ​ເທດ ​ໄດ້​ພ້ອມ​ກັນ​ເສີມ​ສ້າງສາຍ​ພົວ​ພັນ, ຊ່ວຍເຫລືອຊຶ່ງກັນ ແລະ ກັນ ຮ່ວມ​ມື​ກັນ​ພັດທະນາ ລະຫວ່າງສອງປະເທດ ໃຫ​້​ນັບ​ມື້​ແໜ້ນ​ແຟ້ນ ແລະ ແຕກດອກ​ອອກ​ຜົນ​ຍິ່ງ​ຂຶ້ນເລື້ອຍໆ ຊຶງເຫັນໄດ້ຈາກ ການໄປມາ ຫາສູ່ການມີການ ແລກປ່ຽນການຢ້ຽມຢາມ ລະດັບປະມຸກລັດ, ຫົວໜ້າລັດຖະບານ,​ ຂະແໜງ ການອື່ນໆ, ຕະຫລດເຖິງທ້ອງຖິ່ນ ທີ່ີມີຊາຍແດນຕິດຈອດກັນ .

ໂດຍ:ດາ​ວັນ