*ທ່ານ ຄອນປະພັນ ເລືອງສີຈັນທອງ ສະມາຊິກສະພາແຫ່ງຊາດ ເຂດເລືອກຕັ້ງທີ 8 ແຂວງຫົວພັນ ໃຫ້ສຳພາດຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 9  ວ່າ: ສິ່ງທີ່ພົ້ນເດັ່ນພາຍໃນ ແຂວງ ແລະ ສິ່ງທີ່ຄວນເອົາໃຈໃສ່ແກ້ໄຂນັ້ນ, ຄະນະພັກ ແລະ ອົງການປົກຄອງແຂວງ, ເມືອງແຕ່ລະຂັ້ນ ໄດ້ສຸມໃສ່ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນ ດ້ວຍການຊຸກຍູ້ການຜະລິດກະສິກໍາ ໂດຍສະເພາະການປູກ-ການລ້ຽງ ເພື່ອສົ່ງອອກເປັນສິນຄ້າ, ການອໍານວຍຄວາມສະດວກໃຫ້ນັກທຸລະກິດທັງພາຍໃນ ແລະ ຕ່າງປະເທດເຂົ້າມາດໍາເນີນທຸລະກິດຢູ່ພາຍໃນແຂວງ ມີຫລາຍກິດຈະກໍາຄື: ໂຄງການຂຸດຄົ້ນແຮ່ທາດ, ໂຮງງານຕັດຫຍິບ ແລະ ອື່ນໆ.

    ທ່ານ ຄອນປະພັນ ເລືອງສີຈັນທອງ ກ່າວຕື່ມວ່າ: ຄຽງຄູ່ກັບການພັດທະນາດັ່ງກ່າວນັ້ນ ຍັງມີບັນຫາຕ່າງໆທີ່ສົ່ງຜົນກະທົບຕໍ່ການຜະລິດກະສິກໍາ ແລະ ການດໍາລົງຊີວິດຂອງປະຊາຊົນເຊັ່ນ: ໄພພິບັດຈາກທໍາມະຊາດ ດິນເຈື່ອນ,  ນໍ້າຖ້ວມຊຸເຮືອນຊານຂອງພະ ນັກງານ ແລະ ປະຊາຊົນ, ນໍ້າຖ້ວມນາຫລວງ ຫລາຍ, ເຮັດໃຫ້ການເກັບກ່ຽວບໍ່ໄດ້ຮັບໝາກຮັບຜົນ, ໂຄງການຂຸດຄົ້ນແຮ່ຕ່າງໆ ສົ່ງຜົນກະທົບຕໍ່ການປູກ- ການລ້ຽງ ແລະ ການດໍາລົງຊີວິດຂອງປະຊາຊົນ ເຮັດໃຫ້ການຈັດຕ້ັງປະຕິບັດແຜນພັດທະນາເສດຖະກິດ-ສັງ ຄົມ ບາງດ້ານບໍ່ໄດ້ຕາມແຜນການທີ່ວາງໄວ້.

    ແນວໃດກໍ່ຕາມເພື່ອຮັບປະກັນໃຫ້ແກ່ການປະບັດແຜນການບັນລຸ ຄວນເອົາໃຈໃສ່ເພີ່ມທະວີການນໍາພາ-ຊ້ີນໍາໃນການສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນ, ສະມາຊິກພັກ, ກໍາລັງປະກອບອາວຸດ ແລະ ປະຊາຊົນບັນດາເຜົ່າ ຊັ້ນຄົນໃຫ້ທົ່ວເຖິງ; ຊຸກຍູ້, ສົ່ງເສີມຕາມ 5 ທ່າແຮງຂອງແຂວງຢ່າງມີແຜນການ, ຈຸດສຸມໃນແຕ່ລະວຽກງານ; ສືບຕໍ່ຈັດຕັ້ງປະຕິບັດ 2 ວາລະແຫ່ງຊາດ; ເອົາໃຈໃສ່ດຶງດູດການລົງທຶນຂອງພາກເອກະຊົນພາຍໃນ ແລະ ຕ່າງປະເທດໃຫ້ນັບມື້ນັບຫລາຍຂຶ້ນ, ປັບປຸງຂອດບໍລິການຜ່ານປະຕູດຽວ ໃຫ້ມີຄວາມວ່ອງໄວສ້າງເງື່ອນໄຂອໍານວຍຄວາມສະດວກໃຫ້ແກ່ນັກລົງທຶນດ້ວຍຄວາມຈິງໃຈໂປ່ງໃສ ສາມາດກວດສອບໄດ້ ແລະ ອື່ນໆ.

   ໂດຍ: ຢ່າຕົ່ງ

KPL