ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ເຜີຍແຜ່ບັນດາ ຮ່າງການຈັດຕັ້ງ, ຕຳແໜ່ງງານ, ທີ່ຕັ້ງ, ພາລະບົດບາດໜ້າທີ່, ຂອບເຂດສິດ ແລະ ຂໍ້ກຳນົດການຈັດຕັ້ງຄຸ້ມຄອງ ການຮຽນ-ການສອນ ໃຫ້ສະຖານການສຶກສາໃນກອງທັບ ໃນວັນທີ 12 ທັນວາ 2024 ໂດຍການເປັນປະທານຂອງ ທ່ານ ພັນເອກ ເພັດສະໝອນ ວິລະວອນ ຫົວໜ້າການທະຫານ ໂຮງຮຽນວັດທະນະທຳຊົນເຜົ່າກອງທັບ ພ້ອມດ້ວຍ 2 ກອງພັນ ແລະ ພະນັກງານ-ນັກຮົບ ທົ່ວໂຮງຮຽນເຂົ້າຮ່ວມ.

ທ່ານ ພັນໂທ ສຸກິນດາ ເຮື່ອງວິສິດ ຫົວໜ້າພະແນກກຳລັງພົນ ໄດ້ຜ່ານຂໍ້ຕົກລົງຂອງກົມໃຫຍ່ເສນາທິການກອງທັບ ວ່າດ້ວຍໂຄງປະກອບການຈັດຕັ້ງ, ຕຳແໜ່ງງານ ແລະ ຈຳນວນພົນ ໂຮງຮຽນວັດທະນະທຳຊົນເຜົ່າກອງທັບ (ທຽບເທົ່າກອງພົນ) ແຕ່ປີ 2022-2025, ອີງຕາມແຜນຍຸດທະສາດຄຸ້ມຄອງ ກຳລັງພົນກອງທັບ ຂອງກະຊວງປ້ອງກັນປະເທດ ແຕ່ປີ 2021-2025 ສະບັບເລກທີ 1081/ກປທ, ລົງວັນທີ 26 ມີນາ 2021 ແນໃສ່ຄຸ່ມຄອງກໍາລັງພົນທົ່ວກອງທັບໃຫ້ເປັນລະບົບ, ຖືກຕ້ອງຕາມໂຄງປະກອບການຈັດຕັ້ງ, ຕຳແໜ່ງງານ ແລະ ຈຳນວນພົນທີ່ກຳນົດ; ອີງຕາມ ມະຕິຕົກລົງຂອງຄະນະພັກ ກະຊວງປ້ອງກັນປະເທດ ຄັ້ງທີ I ສະໄໝທີ V ສະບັບເລກທີ 01/ຄພກປຊ, ລົງວັນທີ 16 ກໍລະກົົດ 2021 ວ່າດ້ວຍການເພີ່ມທະວີ ການກໍ່ສ້າງກຳລັງດ້ານການເມືອງ, ແນວຄິດ, ການຈັດຕັ້ງປະກອບຈຳນວນພົນ, ການປັບປຸງລະບຽບແບບແຜນ ແລະ ການຝຶກແອບ-ຝຶກຊ້ອມການທະຫານ ທີ່ນຳໃຊ້ພາຫະນະອາວຸດທັນສະໄໝ.

ທ່ານ ພັນເອກ ສັງທອງ ສຸກສີສະຫວາດ ຮອງຫົວໜ້າການທະຫານ ຫົວໜ້າຫ້ອງສຶກສາ ໄດ້ຜ່ານຂໍ້ກຳນົດ ຂອງກົມໃຫຍ່ເສນາທິການກອງທັບ ວ່າດ້ວຍການຈັດຕັ້ງຄຸ້ມຄອງ ການຮຽນ-ການສອນ ຢູ່ສະຖານການສຶກສາໃນກອງທັບ, ອີງຕາມ ຂໍ້ກຳນົດຂອງກອງທັບປະຊາຊົນລາວກ່ຽວກັບ 7 ລະບອບ 18 ວຽກ ແລະ ບັນດານິຕິກໍາຕ່າງໆທີ່ມີແລ້ວ, ອີງຕາມການປັບປຸງລະບຽບແບບແຜນຕົວຈິງ ຢູ່ 5 ວິທະຍາຄານ ແລະ ໂຮງຮຽນກໍ່ສ້າງນາຍສິບທະຫານຮາບເລກ 1, ເລກ 2 ໃນສົກຮຽນ 2022-2023 ທັງນີ້ກໍເພື່ອຮັບປະກັນ ແກ່ສະຖານການສຶກສາໃນກອງທັບ ມີຄວາມເປັນເອກະພາບ, ມີຄວາມເປັນລະບຽບ ໃນການຈັດຕັ້ງ ການຮຽນ-ການສອນ ແລະ ການຝຶກອົບຮົມຫັດແອບ ໃຫ້ມີຄຸນນະພາບສູງ.

     
    
ໂອກາດນີ້, ທ່ານ ພັນເອກ ເພັດສະໝອນ ວິລະວອນ ຍັງໄດ້ໃຫ້ທິດຊີ້ນຳ ພ້ອມທັງເຜີຍແຜ່ເນື້ອໃນທີ່ສຳຄັນ ແຜນການຈັດຕັ້ງຝຶກຊ້ອມ, ທີ່ຕັ້ງ, ພາລະບົດບາດ, ໜ້າທີ່ຂອບເຂດສິດ, ໂຄງປະກອບການຈັດຕັ້ງ, ຕຳແໜ່ງງານ ແລະ ການປະຕິບັດຂໍ້ກຳນົດ ການຄຸ້ມຄອງການຮຽນ-ການສອນ ໃນສະຖານການສຶກສາ ຂອງໂຮງຮຽນ ໃຫ້ບັນດາພະນັກງານ-ນັກຮົບ ຮັບຮູ້, ເຂົ້າໃຈ ແລະ ເຊື່ອມຊຶມຢ່າງເລິກເຊິ່ງ ເພື່ອພ້ອມກັນນຳເອົາເນື້ອໃນເອກະສານ ບັນດາຂໍ້ກຳນົດຕ່າງໆ ນຳໄປຈັດຕັ້ງປະຕິບັດ ຢູ່ໃນກົມກອງຂອງຕົນ ໃຫ້ຖືກຕ້ອງ ແລະ ເຂົ້ມງວດ, ສຸມເຮື່ອແຮງ ສະຕິປັນຍາ ຄວາມສາມາດ ປະກອບສ່ວນເຂົ້າໃນ ທຸກວຽກງານຮອບດ້ານ ໃຫ້ມີບາດກ້າວ ແລະ ຜົນສຳເລັດອັນຍິ່ງໃຫຍ່ກວ່າເກົ່າ.

 ຂ່າວ: ໂອລິນ ມິ່ງມີໄຊ

KPL