ຂປລ. ໃນວັນທີ 10 ທັນວາ 2024 ທີ່ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ອານນາ ເອັສເຕີ ບຽນທ໌ ວານເດັດສ (Enna Esther Viant Valdes) ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ກູບາ ປະຈໍາ ສປປ ລາວ.

ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການພົວພັນຮ່ວມມື ທີ່ມີມູນເຊື້ອອັນດີງາມມາແຕ່ຍາວນານ ລະຫວ່າງ ສອງປະເທດ ສປປ ລາວ ແລະ ສ ກູບາ  ບົນພື້ນຖານແຫ່ງການເຂົ້າອົກເຂົ້າໃຈ ແລະ ຊ່ວຍເຫລືອເຊິ່ງກັນ ແລະ ກັນ ທັງໃນຂອບສອງຝ່າຍ ແລະ ຫລາຍຝ່າຍ, ເຊິ່ງສະແດງອອກໃນການໄປມາຫາສູ່ແລກປ່ຽນການຢ້ຽມຢາມ ຂອງການນໍາຂັ້ນສູງຂອງສອງປະເທດ, ການສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນຂົງເຂດຕ່າງໆ ແລະ ໃນໂອກາດສໍາຄັນຕ່າງໆ ກໍໄດ້ມີການສົ່ງສານອວຍພອນເຖິງກັນ ແລະ ກັນ ຢ່າງເປັນປົກກະຕິ. ພິເສດ, ໃນປີ 2024 ນີ້ ສປປ ລາວ ແລະ ສ ກູບາ ໄດ້ຮ່ວມກັນຈັດບັນດາກິດຈະກໍາຕ່າງໆ ເພື່ອສະເຫລີມສະຫລອງການສ້າງຕັ້ງສາຍພົວພັນການທູດ ຄົບຮອບ 50 ປີ (4 ພະຈິກ 1974-4 ພະຈິກ 2024) ຢ່າງເປັນຂະບວນຟົດຟື້ນ, ເຊິ່ງຖືເປັນປີທີ່ມີຄວາມໝາຍສໍາຄັນ ທັງຍັງເປັນການປະກອບສ່ວນ ເຂົ້າໃນການເສີມຂະຫຍາຍການພົວພັນຮ່ວມມື ລະຫວ່າງສອງປະເທດ ໃຫ້ແໜ້ນແຟ້ນຍິ່ງໆຂຶ້ນ.

ໃນໂອກາດດຽວກັນນີ້, ທ່ານເອກອັກຄະລັດຖະທູດ ອານນາ ເອັສເຕີ ບຽນທ໌ ວານເດັດສ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງສະແດງຄວາມຊົມເຊີຍຕໍ່ ທ່ານ ທອງສະຫວັນ ພົມວິຫານ ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງ ເປັນລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ຄົນໃໝ່ ແລະ ສະແດງຄວາມຢືນຢັນ ທີ່ຈະສືບຕໍ່ເຮັດສຸດຄວາມສາມາດ ໃນການເປັນຂົວຕໍ່ ປະກອບສ່ວນເຂົ້າໃນການເສີມຂະຫຍາຍ ການພົວພັນຮ່ວມມືກັບ ສປປ ລາວ ໃນຊຸມປີຕໍ່ໜ້າ ໂດຍສະເພາະ ໃນດ້ານກະສິກໍາ, ການສຶກສາ-ກິລາ ແລະ ດ້ານອື່ນໆທີ່ສອງຝ່າຍມີທ່າແຮງ ແລະ ເຫັນວ່າມີຜົນປະໂຫຍດຮ່ວມກັນ.

ໃນມື້ດຽວກັນນີ້, ທ່ານ ລັດຖະມົນຕີ ກະຊວງການຕ່າງປະເທດ ຍັງໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ອັບເດີຣາຮິມ ຣາຮາລີ (Abderranhim RAHHALY) ເອກອັກຄະຣາຊະທູດ ແຕ່ງຕັ້ງ ແຫ່ງ ຣາຊະອານາຈັກ ມາຣົກ ປະຈໍາ ສປປ ລາວ ທີ່ມີສໍານັກງານການທູດຕັ້ງຢູ່ບາງກອກ, ຣາຊະອານາຈັກໄທ, ຊຶ່ງຈຸດປະສົງຫລັກຂອງການມາຢ້ຽມຂໍ່ານັບໃນຄັ້ງນີ້ ເພື່ອສະແດງຄວາມຊົມເຊີຍຕໍ່ ທ່ານ ທອງສະຫວັນ ພົມວິຫານ ໃນໂອກາດທີ່ໄດ້ຮັບການແຕ່ງຕັ້ງ ໃຫ້ດຳລົງຕຳແໜ່ງເປັນ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ຄົນໃໝ່ ພ້ອມທັງປຶກສາຫາລື ເພື່ອເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ມາຣົກ ໃນຊຸມປີຕໍ່ໜ້າ.

KPL